Read Komrem JOSHUA 4 Bible Online

JOSHUA 4 - Komrem bible

JOSHUA 4

¹Mipui he’n Jordan kha anhei rakansō pha, RŌNGPU’n Joshua hneng ati,

²“Pase 12, phung rakip a inkhat et kadei hei roh,

³khana Jordan laiṭim a hlung 12, thempuhei leingirna hmunkhet a inphut, anvalona sik a ṭong pek hei roh. Hlunghei kha heikadom hei sona tuninga nan-inṭhumna sik hmun a andana sik manthei hei roh.”

⁴Khava sōa Joshua’n akadeisōt pase 12 hei kha abek heia,

⁵ati, “RŌNGPU nan-Pathen Intepna Bôm hmating Jordan shunga se ruh. Nangni Israel phung inkhat et a, mi inkhat et in nandâra hlung inkhat et heikadom ruh.

⁶Hiva hlunghei hin RŌNGPU’n heimo atlosōt kha mipui hneng mandonsōtna amannei sik hei. Hnunga, nansa he’n hlunghei hi heijâra mo a’nphun hei tia ander chei pha,

⁷RŌNGPU Intepna Bôm khan Jordan anrakan pha tuilōng kha le’nting tia nanhri pek sik hei. Hiva hlung hin hei omchen mo aleikasōk jo ti kha Israel sahe’n anmandonsōt ṭhak sik jo.”

⁸Mihei khan Joshua ṭong kha anjuia kae. RŌNGPU’n Joshua hnenga ṭong apek kapōa, Israel phung rakip a mi inkhat et, Jordan alaiṭima inphut hlung 12 anvalo jo, an-inṭhumna hmun a anchoi heia anda jo hei.

⁹Joshua’num Intepna Bôm indom thempuhei leingirna Jordan alaiṭima hlung 12 aleiphun. (Hlunghei kha tûn katlung laka-om hei.)

¹⁰RŌNGPU’n Joshua hneng mipuihei ṭōn tlo sik amanthei sik a ṭong apek kha, heirakip a’ntlosō mak kârseng thempuhei kha Jordan alaiṭima leikangir hei. Moses ṭong leipek kha hivahi kae. Mipui he’n tuidung kha inranga anleirakan jo.

¹¹Anmani ankhenga tui rekhat ting an-om jo pha, RŌNGPU Intepna Bôm indom thempuhei khan mipuihei hmating kase hei.

¹²Moses’n tlo sik a amanthei hei kapōa, Reuben, Gad leh Manasseh phung ṭimkhat a mihei kha revon invon heia mipuihei hmating tuidung kha anleirakan.

¹³RŌNGPU hmaikunga pase re intuk sik 40,000 he’n Jericho hnenga phaicham anleirakan jo.

¹⁴RŌNGPU’n khava ninga ṭōn atlosōt khan Joshua kha mikalen inkhat kae tia Israel mihei hneng mandonna amannei jo hei. Moses anta leikaja kapōa, ahringkhō katlung bit a Joshua anleikaja a kae.

¹⁵Khava sōa RŌNGPU’n Joshua hneng amanthei,

¹⁶Intepna Bôm indom thempuhei kha Jordana inphut anhei kesōtna sik ṭong apekna sik heia.

¹⁷Joshua’n khanga atlo jo,

¹⁸khana thempuhei khan tuipang anhei phâklim leh tuidung kha vōi khat lōng aphut nôk jo khana apang kha ahongsei-er nôk jo.

¹⁹Mipuihei khan thla hma inkeia ni 10 ning Jordan kha anleirakan khana Jericho nisōa Gigal a rephōr anleisyem.

²⁰Khana khan Joshua’n Jordana inphut a’nlosōt hlung 12 kha aleiphun hei.

²¹Ama’n Israel mipui hneng ati, “Hnunga, nansa he’n hiva hlunghei hi heisik a mo a’nphun hei tia ander chei pha,

²²Israel sahe’n Jordan kachârbera anleirakana chungchânga nanta manthei sik hei kae.

²³Ama’n Tuipui Kasen eini sik a aleimanchâr kapōa, nangni sik a Jordan tuidung kha RŌNGPU nan-Pathen in aleimanchâr tia manthei hei ruh.

²⁴Hiva jâra hin raleichunga aka-om mi rakip in RŌNGPU ratha hi heituk akalen mo anmanhret sik jo, khana nangni’n RŌNGPU nan-Pathen kha ahei tik a nankaja sik joa kae.”