Read Komrem JOSHUA 5 Bible Online

JOSHUA 5 - Komrem bible

JOSHUA 5

¹Jordan tlaitlâk tinga Amor reng rakip, Mediterranean Tuipui panga Canaan reng rakip in Jordan kha Israel mipui he’n anrakansō mak kârseng RŌNGPU’n amanchâr pek hei ti kha anleithei jo. Israelhei jâra anmani leikaṭi hei khana an-in ngamna le’nhmang jo.

²Khava sōa RŌNGPU’n Joshua hneng ati, “Hmeituk hlung vânga chemcha syem roh khana Israelhei kha anvun tanpek hei roh.”

³Khava jâra RŌNGPU ṭongpek dungjuia Joshua’n atlo jo, khana Israel sahei vun leitanna hmun kha vuntan hmebung le’nti.

⁴Israel mipui he’n Egypt andahlon pha, pase rakip chu vun le’ntan jo hei. Achang ravâng, kum 40 shung kha mipui he’n nêrdiram rakanna anleihmang, pase naipang inkhatbek vun leitan mak hei. Khan nôk chu, khava pha inchaiting re tuktheina kum katluk jo pasehei seng kha Egypt anhei dahlon laia hei kha leikathi jo hei ajârchu RŌNGPU ṭong leijui mak heia kae. Ama ale’ntep kapōa, ralei haona leh ralei thaina ram anpu sōnhei pek sik a ale’ntepna kha, anmani tahmu sik a leihnōm pek mak jo hei.

⁷Hiva mihei sahei kha vun anle’ntan hêrmak jâra, Joshua’n vun aleitan hei kha hiva khangtherhei hi kae.

⁸Vuntan kha a’nchaisō leh, annatbi kha andammak kârseng jât pumpui kha rephōra leika-om hei.

⁹RŌNGPU’n Joshua hneng ati, “Tuning Egypt ram nansōk changna inzakna kha nangnia inphut kalosōtpek jo chei.” Khava jâra hiva hmun hi Gilgal anphō jo kae, rahming hi tûn katlung laka-om.

¹⁰Israelhei kha Jericho hnenga phaichama Gilgal a rephōr anmatunglai, khava thla shunga ni 14 tluk ning khōhleia Rakan Kût anleihmang.

¹¹Abân kani kha Canaan ram hmuchi kakek ansâkna hma kakeipen kae: hmuchi kara antakathei leh chephiloa ansyem buhlom kae.

¹²Manna jōngtlâk kha kabâng jo, Israel he’n heite sâk mak jo hei. Khava pha inphut Canaan ram a akakek thlai ansâk jo.

¹³Joshua kha Jericho hnenga aleiomlai, manhret manloa mi inkhat ahmai kunga chemjâm amatua akangir aleihmu. Joshua’n ahnenga kasea aleider, “Nang kanremihei kâra inkhat che mo a-emak leh kankadōi che mo?”

¹⁴Mipa khan amasôn, “Inkhatbek changmak eng. Kei hin RŌNGPU remihei rehlam kakeia aka-om eng kae.” Joshua kha raleia inkuna akamuk a ati, “Kei nasōk eng kae, apu. Heimo namantlo hnōm eng?”

¹⁵Khana RŌNGPU remihei rehlam kakeipa khan amanthei, “Nakekōk kha losōt roh; nang a’ntheng hmun a akangir che kae.” Amanthei kapōa Joshua khan aleitlo.