Read Komrem JOSHUA 6 Bible Online

JOSHUA 6 - Komrem bible

JOSHUA 6

¹Jericho khōpui kha asōngkot ankam, Israel sahei kha sōk leh hlut antlo thei makna sik a anleihrunga kae.

²RŌNGPU’n Joshua hneng ati, “Jericho hi areng leh aremi kahrânghei leh inṭhōia nakut chunga kapek jo che.

³Nang leh naremi he’n khōpui akimvea ni khat a vōi khat sâm a’njôk cheia ni 6 nantave sik kae.

⁴Thempu 7 he’n pengkun inkhat et anchoia, Intepna Bôm hma a kase sik hei. Ni 7 tluk ning thempu he’n pengkun anheitum pha, nang leh naremi he’n khōpui kimvea ve 7 a’njôk sik chei kae.

⁵Khava sōa anmani’n pengkun kha antum mansei sik. Khavakha nantheilim leh, mipui in inhnaktak a aka-ông sik hei kae, khan chu khōpui banghei kha kachim sik jo hei. Khava sōa remi rakip khōpui shunga akahlut sik hei kae.”

⁶Joshua’n thempuhei kha abek heia anhnenga ati, “Intepna Bôm kha indom ruh, nangni mi 7 chei in pengkun matu unna ahmating se ruh.”

⁷Khava sōa ama’n mipuihei kha khōpui kimvea, RŌNGPU Intepna Bôm akahrung hmatinga akase hei leh, an-injôkna sik ṭong apek jo hei.

⁸Joshua ṭongpek kapōa, pengkun katum thempuhei hmating, remi akahrung hei khan se anphut jo; hihei kahnunga Intepna bôm indom thempu kahong hei, hihei kahnunga remi akahrung he’n anheijui hei. Hiva pha shung senga pengkun kha anheitum.

¹⁰Tâk-kha Joshua’n ṭong apek mak lai seng, mipui in an-ông makna sik, ṭong inkhatbek anhrisōt makna sik, ṭong pekna aleinei hei.

¹¹Khang’khan ama’n hiva mi ṭhahrep hei hneng RŌNGPU Intepna Bôm kadoma khōpui vekhat et vena sik a amanthei hei. Khava sōa anmani rephōra hong inle heia khana khan jân kha karek hei.

¹²Joshua kha abân kania jîngkâra hmatak leikathō, khana vōi 2 changna, thempuhei leh remi he’n hma kania a’ntlo kapōa khōpui kimvea le’njôk nôk hei: hmapena, akahrung remi hma-inkeihei; abâna, pengkun 7 katum thempu 7 hei; khava sōa, RŌNGPU Intepna Bôm indom thempuhei; khana achaina, hnungtinga akahrung remihei. Hiva pha shung senga pengkun kha anheitum.

¹⁴Hiva ni 2 tluk ning khōpui kimvea va’njôk nôk hei khana rephōra he’nle nôk hei. Anmani’n khanga ni 6 anleitloa kae.

¹⁵Ni 7 ning chu khō ahong vâr pha anmani kathōi heia antatlo ri kapōa, ve 7 anvea kae, anmani’n ve 7 anvea an-injôkna kha khava ning rōk kha kae.

¹⁶Ve 7 tlukna, thempu he’n pengkun antum sik jo pha, mipuihei khan an-ôngna sik Joshua’n ṭong apek heia ati, “RŌNGPU’n khōpui hi apek jo chei!

¹⁷RŌNGPU hnenga inthoina kapōa khōpui leh ashunga ka-om rakip suk manhmang sik kae. Notinu Rahab leh an-innshung rōk kha tônmak sik hei kae, ajârchu amanu’n eini ram ka-en inthlip hei kha aleithup heia kae.

¹⁸Tâk-kha nangni’n suk manhmang sik a ka-om neinâk inkhatbek nanta’nlo mak sik kae; kha nantlo’nchu Israel rephōr shunga inrengna leh insuksetna nantaheirôn sik kae.

¹⁹Dangka, sana, sum-êng leh thir heia ansyem neinâk rakip RŌNGPU sik a ṭhensōt hei kae. Khahei kha RŌNGPU nei manbukna da sik hei kae.”

²⁰Khan chu thempu he’n pengkun antum jo hei. Mipui he’n antheilim leh, kare inhnaktak a ka-ông jo hei, khana banghei kha kachim jo. Khava sōa remi rakip in hmebunga khōpui shunga kahlut hrek heia anhlō jo hei.

²¹Anchemjâm vânga khōpuia aka-om rakip pase, nuhmei, naipang leh kater anthat jo hei. Se, kemōng leh shakōrtung he’m anthatsa hei.

²²Joshua’n ram ka-en inthlip mi 2 hei hneng amanthei hei, “Nangni’n nanlei intepna kapōa, notinu inna se ruh khana ama leh a-innshung heiṭhōi hei ruh.”

²³Khava jâra anmani kase heia Rahab, apa leh anu, anaipa hei leh an-innshung mi seng anhei ṭhōisōt jo hei. Anmani ankhenga, innshung mi leh sōk-hei Israelhei rephōr hnenga anthōi jo hei.

²⁴Khava sōa khōpui leh ashunga ka-om seng kha hmei anro manvâm jo; sana, dangka, sum-êng leh thir vânga ansyem neinâk-hei khachu RŌNGPU neinâk manbukna anda jo hei.

²⁵Tâk-kha Joshua’n Rahab notinu leh a-innshung seng chu aṭhen jo hei, ajârchu ama’n Jerichoa aleitir ram ka-en inthlip 2 hei kha amanu’n aleithup heia kae. (Tuning katlung amanu sōn leh pâr Israelhei kâra laka-om hei.)

²⁶Khava pha Joshua’n ka-ôrtak a ṭongpek kangar inkhat aleimasō: “Tu inkhat Jericho khōpui hi sak nôk sik a a’ntluk kha RŌNGPU hâksêrna thōia aka-om sik kae. Tu inkhat innhmun kadeng mi kha asapa upapen kha inhmang sik; Tu inkhat sōngkot-hei akasyem kha asapa mathlum pen kha inhmang sik.”

²⁷Khanga RŌNGPU’n Joshua kha aleiompui, khana aṭong kha ram pumpuia le’nthanga kae.