Read Komrem JOSHUA 8 Bible Online

JOSHUA 8 - Komrem bible

JOSHUA 8

¹RŌNGPU’n Joshua hneng ati, “Remi rakip ṭhōi hei roh khana Ai a vase ruh. Ṭitmak roh khana malung mathla mak roh. Ai reng chunga torna kapek sik che; Ai mi, akhōpui leh aram nangta sik hei kae.

²Jericho leh areng chunga naleitlo kapōa Ai leh areng chunga natlo sik kae; tâk tuna chunga hinchu anneinâk leh anranhei kha nangni sik nan-inda thei sik hei. Khōpui chôr tinga inphut manhret manloa buhluna sik a intluk ruh.”

³Khava jâra Joshua kha aremi seng leh Ai a sena sik intluk jo. Ama’n aremi kaṭhapen 30,000 akadei heia jân a atir jo hei

⁴ṭong hi apek heia: “Khōpui lang khat ting inthup ruh, tâk akahlareia om mak ruh; khan buhluna sik intluk ruh.

⁵Kei leh kami rup khat he’n khōpui kha kanheisor sik. Ai mihe’n nikadōia anheisōk pha, ahma inkeia nileitlo kapōa, keini inhe sik unga kha katlân sik ung.

⁶Anmani khōpuia inphut kankeisōtna sik hei hmun katlunga anhei hnong sik ung. Anmani’n chu keini kha, hma nileitlo kapōa, anhnenga inphut akatlân jo chei kae tia anmandon sik.

⁷Khava pha nangni rup nan-inthupna inphut heikasōk sik chei khana khōpui kha nanta hlō sik kae. RŌNGPU nan-Pathen in nanhnenga apek sik chei.

⁸Khōpui kha nanlo pha, RŌNGPU ṭong pek chei kapōa, hmeia ro ruh. Hihei hi nangni ṭong pekna chei kae.”

⁹Khava jâra Joshua’n atirsōt jo hei, an-inthupna hmun a kase jo hei, Ai tlaitlâk tinga, Ai leh Bethel kâra anhngâk a ka-om hei. Joshua, jân kha rephōra karek jo.

¹⁰Jîngkâr hmatak a Joshua kha kathōisōt a remi rup seng abek mantûp jo hei. Khana ama leh Israel hlamkakei he’n Ai ting inṭhōi jo hei.

¹¹A’nṭhōipui remi he’n khōpui hlutna kotpui ting kase heia sak intonga rephōr anmatung, anmani leh Ai kâra phaichama khan.

¹²Ama’n pase 5,000 aṭhōi heia khōpui tlaitlâk ting, Ai leh Bethel kâra amanthup hei.

¹³Khōpui sak tinga rephōra leh tlaitlâk tinga mihei khan re tuk sik a intluk jo hei. Joshua jân kha phaichama karek.

¹⁴Ai rengpa’n Joshua mihei kha ahmu hei pha, inranga intluk jo. Ama leh ami seng hma intukna hmun mama, Jordan Phaichama Israel re katuk sik a heikasōk jo hei, ama kahnungtinga inphut anta heibuhlu sik khachu manhret mak.

¹⁵Joshua leh ami he’nchu kahnung inle inhlem heia ramhâng ting katlân jo hei.

¹⁶Anmani kahnong sik a khōpuia aka-om mi rakip anbeksōt hei, Joshua kha anhnonga khōpuia inphut kahlajap jo hei.

¹⁷Ai a aka-om mi rakip Israel kahnonga kase jo hei, khana khōpui kha akahrung sik tûte omloa, inhlângkanga andahlon jo.

¹⁸Khava sōa RŌNGPU’n Joshua hneng ati, “Nakasei kha Ai a khing roh; Ke’n kapek jo che kae.” Ahnenga a’nhri kapōa Joshua’n atlo jo,

¹⁹khana akut kha ahei kalânglim leh, lang khat tinga ale’nthup mihei kha inranga heikangirsōt heia khōpui shunga katlân inhlut jo heia anvahlō jo. Inrangtak a khōpui kha hmei vâng anro jo.

²⁰Ai mihe’n ankahnung anhei en pha, hmeikhu chungtinga ake kha anleihmu. Anmani tlânsōtna sik ahlam leiom mak jo, ajârchu ramhâng ting aleikatlân Israelhei kha anmani re katuk sik a tûnchu hong inle jo hei.

²¹Anloi ṭhahrep in khōpui kha anhlōa hmei vâng antaro kha Joshua leh ami he’n anhmu pha, hong inle heia Ai mihei kha that anphut jo.

²²Khōpui shunga Israelhei kha re tuk invei sik a tûnchu heikaṭumsuk jo hei. Khang’khan Ai mihei kha Israel mihe’n ankakekhumsō jo hei, khana ankhenga anthat jo hei.

²³Inkhatbek sōksōt mak jo hei, khan hringsōt mak jo hei, Ai rengpa tei loa. Ama chu ansura Joshua hneng anheikei.

²⁴Israel he’n an-inrepuihei kha anmani anta leihnongna ramhânga khan anthatpet hei. Khana Ai ting inle nôk heia khana aka-om rakip anthatsō hei.

²⁵Joshua khan akasei kha Ai ting akhinga khana aka-om mi rakip anthatsō mak kârseng khavakha kei mathla mak. Khava ning Ai mi pumpui anthat manramsō hei, pase nuhmei 12,000 hei kae.

²⁷Khōpuia anta heichom ranhringhei leh neinâk-hei kha RŌNGPU’n Joshua hneng aleihri pek kapōa, Israel he’n an-inda hei.

²⁸Joshua’n Ai kha hmei vâng aroa karam chera adahlon. Tuning katlung khanga laka-om.

²⁹Ai rengpa kha thinglera amakheia khōhlei katlung ada. Kani ahongtlâk pha Joshua’n akalōng kha keimathlâkna sik ṭong aleipek hei, khōpui sōngkot hlutna anleihlōn mathlâk a kae. Khava chunga hlung katamtak anbuk khum, khavakha tuning katlung laka-om.

³⁰Khava sōa Joshua’n Ebal Tlâng chunga RŌNGPU Israelhei Pathen hnenga maichâm inkhat aleisyem.

³¹Ama’n RŌNGPU sōk Moses’n Israel hnenga mansena aleipek dungjuia khavakha aleisyem, Moses Dân shunga ahri kapōa: “thir hmangchâk vânga a’nkheng mak hlung vânga a’nsyem maichâm,” kae. Achunga khan romanvâm inthoina RŌNGPU hneng anleitōk, khana anmani inlôikhômna inthoina kha’m antōksa.

³²Khana khan, Israelhei hmit-hmua, Joshua’n Moses talei mazet Dân kha hlung chunga aleimazet nôk a kae.

³³Israelhei, anhlam kakeihei, ṭōnpui karônhei, ṭongkatanhei, khana ankâra aka-om jât-hlop hei khan RŌNGPU Intepna Bôm asir inhnia kangir hei, khava indom levi thempuhei kha anhnget heia. Mipui ṭimkhat in Gerizim Tlâng kha hnung ansungsi, aṭim inkhat in Ebal Tlâng kha hnung ansungsi. Anmani mahâmṭhat rahlângna pha kha ahong tlung pha RŌNGPU sōk Moses’n hinga antatlo sik a aleimanthei hei.

³⁴Khava sōa Joshua’n Dân kha, mahâmṭhat leh hâksêrna hei seng kha, kare inhnaktak a, ashunga ale’nzet kha atei jo.

³⁵Moses Dân ṭongpek rakip Joshua’n a’ntûp seng, nuhmei leh naipang, khana ankâra ka-om jât-hlop hei hneng atei jo.