Read Komrem JOSHUA 9 Bible Online

JOSHUA 9 - Komrem bible

JOSHUA 9

¹Jordan tlaitlâk tinga reng rakip in Israelhei retorna hi anmanhretsō jo, hmebunghei leh akhama, Mediterranean tuipui pang kajuia phaicham rakip, sak tinga Lebanon katlung; hihei hi Hit, Amor, Canaan, Periz, Hiv leh Jebush renghei kae.

²Anmani hong intûppet heia Joshua leh Israel chunga re katuk sik a anremi anmanchun jo hei.

³Tâk-kha Gibeon mihei, Hivhei khan chu Joshua in Jericho leh Ai hnenga aleitlo kha anthei jo,

⁴khana ama hōn sik a anmandon jo. Anmani kase heia sâk leh in ṭhahrep leh bora kaṭetsâp hei, khana ju shavunpeng a’nphôt leh anshakōrtung chung heia anrôna kase jo hei.

⁵Anmani kha pōn kase leh kekōk kaṭet antaphôt hei ansia ankei heia kae. Anbuhlom choi kha’m akachâr jo khana aka-ap jo kae.

⁶Khava sōa anmani Gilgal rephōra vakase heia Joshua leh Israelhei hnenga anti, “Keini ram kahlatak a inphut akahong ung kae. Keini’n inhnōmna inkhat nantaneipui sik ung kanmadu.”

⁷Tâk-kha Israel he’n anti, “Heisik a mo inhnōmna kantaneipui sik chei? Kanhneng vena aka-om um kachang thei chei.”

⁸Anmani’n Joshua hneng anti, “Keini nangni inzen ung kae.” Joshua’n ader hei, “Nangni tu chei mo? Khona inphut akahong chei mo?”

⁹Khanachu hiva thuhming hi anleihri pek: “Apu, keini ram kahlatak a inphut akahong ung kae, ajârchu RŌNGPU nan-Pathen chunga kanleithei jo. Ama’n Egypt a aleitlo rakip chunga

¹⁰khana Jordan nisōa Amor reng 2 hei: Heshbona Reng Sihon leh Ashtaroth a ka-om, Bashana Reng Og chunga aleitlo rakip kanthei jo.

¹¹Kanhlam kakeihei leh kanram shunga aka-om mipui seng in kanhlam hrona sik a sâk leh in ṭhahrep anmantluk a hin kanhongna sik leh nangni inhmupuina sik a anmanthei ung. Keini’n nangni razen sik khana keini leh inhnōmna inkhat nantaneipui sik unga anmanthei ung.

¹²Kanbuhlom hei hi enruh. Inn kanhei dahlona nangni inhmupui sik kanhei inphut pha khan chu alakalum hei kae. Tâk enruh! Tûnchu kachârber jo hei khana ka-ap jo hei.

¹³Hiva jupeng hei hi kanmansip pha, atherpet hei kae, tâk enruh hi! Inhlersō jo hei. Kanhlam hro ahlarei jâra kanpōn hei leh kankekōk hei kaṭet jo hei.”

¹⁴Israel he’n anmani sâk leh in ṭhahrep anleirahlâng, tâk khava chunga RŌNGPU hneng chu leider mak jo hei.

¹⁵Joshua’n Gibeon mihei leh inhnōmna aneipui heia anka-om sik a ahnōm pek jo hei. Israel jât hlamkakei he’num an-inhnōmna kha kannit sik tia intep jo hei.

¹⁶Inhnōmna kha ansyemsō ni 3 ning, khava mihei kha anhneng vena aka-om mi anchang kha Israel he’n anhong manhret jo.

¹⁷Khava jâra Israel he’n inphut heia nithumsōa khava mihei omna khōpui heia heikatlung jo hei: Gibeon, Chephirah, Beeroth, leh Kiriath Jearim.

¹⁸Tâk Israel he’n leithat tor mak jo hei, ajârchu anhnenga anhlam kakei he’n ka-ôrtak a RŌNGPU, Israelhei Pathen rahminga intepna anleineipui jo hei. Hiva chungchânga mipui he’n anhlam kakeihei chunga inphin jo hei,

¹⁹tâk anmani’n anmasôn hei, “Keini’n RŌNGPU, Israelhei Pathen rahminga ka-ôrtak a intepna anhnenga kanleinei jo. Tûnchu anmani sukset theimak min.

²⁰Nilei intepna dungjuia nimanhring sik hei kae; khanga nitlo mak inchu, Pathen in eini akarâk sik jo me.

²¹Hring jo hei rasoh, tâk anmani’n nithing antuk pek sik me khana nitui anthepek sik me.” Hivahi hlamkakeihei mantlukna kha kae.

²²Joshua’n Gibeon mihei kha ahnenga anheiṭhōina sik heia ṭong apek hei khana anhnenga ader hei, “Heisa mo nantahōn unga ram kahlatak a akahong ung kae nantati, ami leh kha hinahin ka-om cheia?

²³Nangni’n hi nantlo jâra, Pathen in maset apek jo chei. Nanmipuihei ahei tik a sōk kachang sik hei, keini Pathen hmun inthenga hmang sik a thing antuk sik khana tui anthe sik.”

²⁴Anmani’n anmasôn, “Apu, kanleihōn jo chei, ajârchu RŌNGPU nan-Pathen in nanhnenga ram pumpui hi pek sik a leh ram nanheihlō chenna ashunga ka-om mihei kha thatpetna sik a Moses hneng ṭong aleipek kha akadik khet kae ti kha keini’n kanmanhret. Keini’n kanleihōn jo chei, ajârchu nangni kanṭit hêr chei; kanhringkhō sik a leikaṭi jo ung.

²⁵Tûnchu keini hi nanratha neina shunga ka-om jo ung; kadik nantati dungjuia kanchunga tlo jo ruh.”

²⁶Khava jâra Joshua’n aleitlo khachu hi kae: ama’n ahrung heia Israel mihe’n antathat sik hei kha leihnōm mak jo.

²⁷Tâk-kha anmani sōk amanchang jo hei, Israelhei sik leh RŌNGPU maichâm sik a thing karôn leh tui kathe sik a. Tuning katlung RŌNGPU kamukna sik kadeisōt hmun a hiva ṭōn hi antlo manjōm a kae.