Read Komrem THESSALONIANHEI INHNINA 1 Bible Online

THESSALONIANHEI INHNINA 1 - Komrem bible

THESSALONIANHEI INHNINA 1

¹Paul leh Silas khana Timothy, Heia inphut Pathen leh ni-Rōngpu Jesu Christa ta kachang, Thessalonica bekrup mihei hneng kantahei mazet kae.

²Pa Pathen leh Rōngpu Jesu Christa khan maritna leh malung mōngna pek chei rasoh.

³Sōpuihei, nangni jâra keini’n Pathen kantamanpâk ṭhak sik kae. Ajârchu nangni inkhat et in milak sik a lungsetna nantanei kha kalen chet-chet a, khana nantaksenna kha hingtuk hrep akhangtou jâra Pathen kantamanpâk sik hi akadik kae.

⁴Khava jâra nangni Pathen bekrup-hei chunga kanbinga intei unga kae. Kan-inteina jârpen khachu nantahongde injôn leh nantaksenna injôn jâra kae.

⁵Hiva rakip hi Pathen ṭongtan kha kadik ti malârna kha kae, khava kara khachu nangni’n malung inrengna kha nanlanei, ama Rengram sik a rahōi akasōk sik chei kae.

⁶Pathen in akadik kha atlosōt sik: ti chu nankhōdeng inthei hei kha ama’n khōdeng amanthei sik hei,

⁷khana nangni khōdeng kathei chei kha leh keini’m hōina apek sik me. Hivahi Rōngpu Jesu khan amarvân ngeva kalenhei leh inṭhōia ajōng inlâr pha leh hi atlosōt sik jo,

⁸Pathen kahlonsōt hei leh, ni-Rōngpu Jesu Christa Ṭong kaṭha kajuimak hei kha ama’n hmeimale vâng karâkna anei sik hei.

⁹Anmani Rōngpu lûrna kalentak leh ahmai kunga inphut ṭhensōt a ka-om sik heia kha, kumleikōa suk manhmangna karâkna kha antathōk sik kae,

¹⁰khava ama’n amihei senga inphut lûrna leh akataksenhei senga inphut kajana achenna sik a ajōngna Kani ning akasōk sik kae. Nangni um ankâra invei sik chei, ajârchu kantamanthei chei ṭong kha nantaksena kae.

¹¹Khava jâra nangni sik kantader pek ṭhak chei kae. Ama’n abekna chei hringkhōa akahring sik a rahōi kasōk inkhat a asyemna sik chei ni-Pathen hneng kandera kae. Nangni’n akaṭha nanta madu hei leh nantaksenna ṭōnhei kha aratha hratna vâng pui mathluk pek chei rasoh.

¹²Khang’khan ni-Pathen leh Rōngpu Jesu Christa maritna jâra, nangnia inphut ni-Rōngpu Jesu rahming khan lûrna anei sik, khana nangni’n ama inphut lûrna kha nantachen sik kae.