Read Komrem THESSALONIANHEI INHNINA 2 Bible Online

THESSALONIANHEI INHNINA 2 - Komrem bible

THESSALONIANHEI INHNINA 2

¹Ni-Rōngpu Jesu Christa ajōngna sik leh einihei inpunkhôma ama leh ni’nchunna sik chungchânga: Sōpuihei, kahei ngek chei kae,

²Rōngpu Kani kha jōng katlung jo tia sânkathem inkhat in asânsōt inum kabeitak a inhmak mak ruh a-emak leh malung manrim mak ruh. Khana keini hei taheimazet anti’num kabeitak a taksen mak ruh, ṭimak ruh.

³Tûte’n hiva chunga hin hōnmathlâk mak chei rasoh. Kathiram kahlō sik Akaṭhamak Inkhat hmeikhura akahlut sik a mantluksa kha ahon’lâr mak kârseng khana achaina Re indōina a-om mak kârseng, khava Kani kha jōng tlung mak hi ning.

⁴Ama khan kamuk neinâk rakip leh Pathen inti hei kha ahonghōt sik hei, anchung katōngpena ama abinga hong ka-om sik a kae. Pathen Bek-inn shunga kapha kahlut sik khana in-ong sik Pathen a’nchangsak sik kae.

⁵Mandon sōt mak chei mo? Hiva rakip hei hi nileiom saplai khan ke’n kalei manthei jo chei.

⁶Achang ravâng khava ahong kasōk sik kha, akakhâm heikhat laka-om, khavakha nangni’n hei-achang nanmanhret. Aphahrep a Akaṭhamak Inkhat kha, ahong inlâr sik kae.

⁷A’n-ip Ṭhatmakna khan tûnhin ṭōn atlodek jo, khana khava akakhâmpa inkhat kha amantlûkna inphut a’nkeisōt mak kârseng, ahong kasōk sik omchen kha lahong sōk mak ning.

⁸Khava sō leh Akaṭhamak Inkhat kha jōng inlâr sik, tâk Rōngpu Jesu ajōng pha leh abeia akahu vâng athat sik khana a-omna vâr kadi rik-rak vâng asuk manhmang sik jo.

⁹Khava Akaṭhamak Inkhat kha Seitan ratha leh inṭhōia kajōng sik, ama’n akadik mak ṭōn-inlak leh det-hla hingja atlosōt sik,

¹⁰khana a’nhmang sik hei chunga ṭhatmak rakip kha hōn mathlâkna ahmang sik. Anmani a’nhmang sik hei kae ajârchu anmani’n anhring theina sik lungsetna kadik kha leirahlâng mak hei.

¹¹Khava jâra anmani’n akadik mak kha antaksenna sik akadik mak ratha hratna kha ankâra ṭōn katlo sik Pathen in ajōngtir kae.

¹²Khava kara chu, akadik kataksen mak rakip hei, setna shunga kahōia kasak rakip, maset antachen sik kha kae.

¹³Rōngpu talungset sōpuihei, nangni jâra keini’n ahei tik a, Pathen kantamanpâk ṭhak sik kasōk. Ajârchu nangni’n akadik kha nantaksen jâra Rathla rathahrat vâng Pathen in ama mi intheng amanchangna sik chei hma inkeia hukmanhring sik a akadei jo chei kae.

¹⁴Ni-Rōngpu Jesu Christa lûrna kha nanchenpuina sik, Ṭong kaṭha nanhnenga kanta leihri vâng khan Pathen in abek chei kae.

¹⁵Khava jâra sōpuihei, kanṭong hrilena leh chithi vâng ṭong kadik kantahei manthei chei hi matutlit una ngir inhnet ruh.

¹⁶Ani’nlungset leh amaritna vâng akatlasam mak ratha hrokna leh inhōrna kahnet anikapek ni-Pa Pathen leh ni-Rōngpu Jesu Christa khet khan,

¹⁷ratha hrokna leh ratha hratna kha akaṭha tlona leh hrina sik pek chei rasoh.