Read Komrem TIMOTHY INKHATNA 3 Bible Online

TIMOTHY INKHATNA 3 - Komrem bible

TIMOTHY INKHATNA 3

¹Hivahi ṭong kadik a’nhri kae: mi inkhat in bekrup hlamkakei chang sik amaduhêr inchu, ama’n ṭōn kaṭhatak inkhat amadu kae.

²Bekrup hlamkakei kha masetna kase; nuhmei inkhat rōk kanei, malung kasing, binga ansurtor, bân kaneitak a ṭōnkatlo, a-inna khōhme ralam kathem; mi intheitor akachang sik kae;

³ju inrui mi akachangmak, innâk-inse kakaimak, tâk nunkahōi leh malung kadai akachang sik kae; sêr indu akachangmak sik kae;

⁴innshung kaṭha akahlō, asa he’n kajatak a aṭong antajui mi akachang sik kae.

⁵Ajârchu mi inkhat in a-innshung kaṭha arôn tor mak inchu, heikhong mo Pathen bekrup kha a-ensui tor sik?

⁶Ama kha ahong inlensak a Seitan maset leichen kapōa achang makna sik ama kha taksenna pui katluk akae sik kae.

⁷Ama kha Seitan châng shunga ahlut makna sik leh inzakna achen makna sik, bekrup vângtinga mihei takajathei mi inkhat akachang sik kae.

⁸Bekrup inthōpuihei kha’m malung intheng leh omchen kaṭha akachang sik hei kae; anmani sêr leh suma phâmrai kase leh ju katamtak ka-in akachangmak sik hei kae;

⁹anmani’n mandon ṭhen theina intheng seng vâng khan taksen jâra akadik ahon’lâr kha kahnet a antamatu sik kae.

¹⁰Anmani hma inkeia enmansin sik hei kae, anmani’n khava enmansinna kha antor inchu, ṭōn kha tlo hei rasoh.

¹¹Annuhmeihei kha mi kahri inset mak omchen kaṭha akachang sik hei kae; anmani heirakip a malung kasing leh malung intheng akachang sik hei kae.

¹²Bekrup inthōpui mihei kha nuhmei inkhat rōk kanei, asahei leh a-innshung kaṭha kahlō mi akachang sik hei kae.

¹³Khava ṭōn kaṭha katlohei khan kajana kha anbinga an-inhmua kae khana Jesu Christa antaksenna chunga inngamtak a anhritora kae.

¹⁴Ke’n hiva chithi kaheimazet che hi leh inṭhōia, inranga honga inhmupui sik chea inhōr eng.

¹⁵Tâk-kha kaheisôt joa achang inchu, ṭongdik chopui leh manhngamna akachang, akahring Pathen bekrup, Pathen innshunga khan eini’n heikhong mo akachôn sik me ti hi hiva chithi hin amanthei sik che.

¹⁶Eini bekṭong in-ip lenje hi tûte’n emak titheimak hei ning: Ama mihringa hong inlâr, Rathla khan kadik tia amalâr, khana ngeva he’n anleihmu. Jât-hlop hei kâra ama ṭong le’nhrile, vânhnōi pumpui in anleitaksen, khana marvâna ṭhōitoua leika-om jo.