Read Komrem TIMOTHY INHNINA 1 Bible Online

TIMOTHY INHNINA 1 - Komrem bible

TIMOTHY INHNINA 1

¹Pathen lungdo dungjuia Jesu Christa sonle Paul a inphut, Jesu Christa a inchunna shunga nichen jo ṭongtepna hringna kha hri manthangna sik —

²Kasapa marit Timothy hneng kahei manrôn che kae: Pa Pathen leh ni-Rōngpu Jesu Christa khan lungsetna, maritna leh lung mōngna pek che rasoh.

³Kei mandon ṭhen theina inthengseng vâng, kapu sōnhei taleitlo kapōa, karazen Pathen kha kamanpâk. Sûn leh jân a kaderna rakip a nang kaman donsōtna che akaia ama kamanpâk a kae.

⁴Nahmit rathli sōk kamandonsōt, pui katluk a ka’npâk theina sik, ka’nhmupui hnōmhêr che.

⁵Malung inthengtak a nataksenna kha kamandonsōt, napi Lois leh nanu Eunice hei taksen je hei kha’m kamandonsōt. Nang inum khava taksenna kha nanei ti inchênna kahlamrina kae.

⁶Hiva sik jâra nachunga ke’n kakut kakalânglaia Pathen tapek che kutchoi pekna kha akahringa nada ṭhakna sik a hi kahei hri kae.

⁷Ajârchu Pathen tapek me rathla khan niṭit manse mak; khava kanek a, rathla khan eini ratha hratna, lungsetna leh binga insur theina vâng amansip jôk mea kae.

⁸Ni-Rōngpu sâkhi sik a inzak mak roh; khana Christa sik a kurkhum a ka-om kei sik um inzak mak roh. Khava kanek a, ratha ngarna Pathen in apek che dungjuia, Ṭong kaṭha sik a inrengna nachen kha inlo jôk roh.

⁹Eini’n heikhat nitlo jâra changloa, tâk amarit me jâra leh amantlukna jâra, ami kachang sik a abek mea ahuk jo me kae. Hiva maritna hi pha ale’nphut mak hma Jesu Christa jâra aleipek jo me kae,

¹⁰tâk-kha tûnchu nikahuk inhring Jesu Christa ajōng jâra eini hneng amalârpek jo me. Ama’n thina ratha neina kha amanchai jo khana ṭong intheng vânga akathimak sik hringkhō kha amalâr jo.

¹¹Ṭong kaṭha kahri inthangle sik a sonle leh oja inkhat kachang sik a Pathen in akadei jo eng,

¹²khava sik jâra ke’n khōdeng kathei kae. Tâk-kha tûn katlung kei inngamna kanei, ajârchu ke’n kataksen ama kha kamanhret, khana ama’n kei amannganna eng Kani kha ajōng tlung mak kârseng ama’n kei ahuk tor eng ti hi kamanhret manchên.

¹³Nang tajui sik manhmuna, ṭong kadik kamanthei che kha matu manchak roh, khana Christa Jesua ni’nchunna shunga nita kachang jo lungsetna leh taksenna khan omṭhak roh.

¹⁴Eini shunga ka-om Rathla Intheng ratha hratna vâng khan akaṭha neinâk ngansena che kha kaṭha inda roh.

¹⁵Phygelaus leh Hermogenes inveina, Asia ram a mihei seng in antadahlon jo eng kha nang in namanhret a kae.

¹⁶Onesiphorus innshung mihei chunga Rōngpu’n lungsetna malâr rasoh, ajârchu ama’n pha katamtak a malung hōina apek enga kae. Kei khuma ka-om hi ama inzak mak,

¹⁷tâk ama Rome aheitlung tlung leh anihmu mak kârseng ani heijonga kae.

¹⁸Khava Kani ning khan Rōngpu’n maritna kha pek rasoh! Khana Ephesus a ama’n kei sik ṭōn kaṭha heituk-hrep a atlo mo ti kha nang in kaṭha nenga namanhret.