Read Komrem TIMOTHY INHNINA 2 Bible Online

TIMOTHY INHNINA 2 - Komrem bible

TIMOTHY INHNINA 2

¹Kasapa, Jesu Christa a ni’nchunna shunga nita kachang jo maritna vânga khan akangar chang roh.

²Sâkhi mi katamtak hmaikunga kahri manthang jo insena ṭong, mantheina kha inlo roh, khana nang in taksenthei kachang, mi ralak intheitor hei hneng um nganse hei roh.

³Jesu Christa sepei ṭong kajui inkhat kapōa, demanrimna nachen kha inlo roh.

⁴Sepei re katlo inkhat in achunga ṭong kaneipa malung tlaina sik amandon khana micham hringkhō inrônna leh aṭōn kha manchôm mak.

⁵Resik in-erna katlân mi khan dânhei kha ajui mathluk mak inchu hratman kha rahlâng theimak a kae.

⁶Hlei kathlō mi, ṭōn rahnak a katlo khan ahleia kasōk hma inkeipen kara kha achen sik kae.

⁷Heimo kahri hi mandon kaṭha roh ajârchu Rōngpu’n heirakip manhret theina apek sik che.

⁸Kaṭong hrile Ṭong kaṭha shunga a’nhri kapōa, thina inphut a keimathōi David sōn Jesu Christa kha, mandonṭhak roh.

⁹Ke’n khava Ṭong kaṭha kha kahri jâra, inrengna kha kade khana dân kasuk khōi inkhat kapōa thirhrui vâng kapha ankhit enga kae, tâk Pathen ṭong khachu inkhit mak a kae,

¹⁰khava jâra Pathen takadeisōt mihei sik a heirakip hi kathōk, Jesu Christa inphut huk manhringna leh kumsôt lûrna heikachoi kha anmani kha’num anchen theina sik a kae.

¹¹Hivahi akadiktak hrina kae: “Eini ama leh nithisap inchu, ama leh kahringsap sik me.

¹²Eini’n nide manrimṭhak inchu, ama leh vai nirônsap sik a kae. Ama nihnōm mak inchu, ama’num eini ahnōm mak ning.

¹³Eini taksenthei nichang mak inum, ama chu taksenthei kachang ṭhak a kae, ajârchu ama abinga inhōn inthla theimak a kae.”

¹⁴Hivahi namihei hneng mandonsōtna pek hei roh, khana ṭong chungchânga inkhe-beitamna annei makna sik Pathen hmaikunga hi manse hei roh. Inkhe beitam hi aṭhatna om mak, a’nngei hei inhmangna hrep kha kae.

¹⁵Pathen dikna ṭong kha kadik a inthei, aṭōn tlona chunga inzakna kaneimak mi inkhat kapōa Pathen hmaikunga pui katluk manṭhatna chenna sik nator chenna intlo roh.

¹⁶Khava Pathena inphut kahlatak a nihei kaṭhōisōt, Pathen kahnōise hei leh akamohei inhoulimna inphut tlânsōt roh.

¹⁷Khava intheina khachu taksa kapât ravōi kasâk inṭopsō kapō kha kae. Khava oja 2 hei khachu Hymenaeus leh Philetus hei kae.

¹⁸Anmani’n akadik hlam kha andahlona, einihei thōisōtna chu kasōkdek jo antia akataksen ṭhahrep hei taksenna kha anmanhmak pek heia kae.

¹⁹Tâk-kha Pathen innhmun deng kahnet khachu inhlingtor mak; khava chunga khan hiva ṭong hi inzet: “Rōngpu khan amihei seng amanhret” khana “Rōngpu ta eng kati mi rakip khan dikmak ṭōn tlona inphut a akatlânsōt nger sik hei kae.”

²⁰Innpui kalen inkhat shunga be leh thleng ajât katamtak ka-om: ṭhahrep sana leh dangka vâng insyem hei, alak kha thing leh matlak vânga insyem hei; khavahei kha ṭhahrep chu marittak a hmang sik, khana alak-hei kha angaia hmang sik hei kae.

²¹Tu inkhat in hiva ṭhatmak heirakip a inphut abinga a’nsuk intheng inchu, khahei kha marittak a hmang sik hei kae, ajârchu anmani a’ntōksōt leh an-Kapu tahmang thei jo hei kha kae, ṭōn kaṭha a hmang sik a mantluk hei kae.

²²Khangdông laia madu rangei dahlon roh, khana malung inthengtak a Rōngpu inthōpuina sik a akabek hei leh inṭhōia dikna, taksenna, lungsetna leh lung mōngna hei hi tak tlo inna jong roh.

²³Tâk-kha akamohei leh hei-inhret mak hei inkhe-beitamna inphut tlânsōt roh; achaina anmani innâk-inse sik hei ti nang in namanhret.

²⁴Rōngpu sōk kachang inkhat in, mi leh a’nkhemak sik chei kae. Mi rakip nalungset heia, akaṭha leh akadehrat oja inkhat akachang sik che kae,

²⁵nakadōihei kha nun innemtak a namandik sik hei kae, ajârchu Pathen in anmani kha malung thlengna pha apek heia akadik kha heimanhret um aja a kae.

²⁶Khan chu Diabol in asur heia aṭong amanjui jo hei khan manhret theina kha anheinei sik khana achâng kam a inphut heikasōksōt sik jo hei.