Read Komrem TIMOTHY INHNINA 3 Bible Online

TIMOTHY INHNINA 3 - Komrem bible

TIMOTHY INHNINA 3

¹Kani hnung intongting chu intakna pha kachang sik, mandon ruh.

²Mihe’n tabing anjong sik, phâmraiset anjong sik, inlensak sik hei, lungthim antlo sik; inzakna anchen sik, nu leh pa ṭong juimak hei ning, tlopekman manhret mak hei, bekṭong neimak hei;

³lum lona kaneimak, lungsetna kase, mi kateitôm, innâk-inse katlo, khana mi kakhôk kachang sik hei; akaṭha kha anhōt sik;

⁴mi anhōn sik, hnunga heimo kasōk sik khôk kasak mak kachang sik hei; inlensakna kasip sik hei; Pathen kanek a hōina rōk anmadu sik;

⁵khana avângting rōk nibekṭong kha anmatu sik, tâk aratha neinakhet khachu anhlonsōt sik. Khang khava miheia inphut sesōt roh.

⁶Anmani ṭhahrep chu mi inna kase lele heia nupui katlâksam hei, ansetna phurhrik takabuksi hei, khana maduna rakip in aṭhōi jo hei kha anthlim hei,

⁷khava nuhmeihei ahei tik a inthem chûkna sik a a’ntluk hei tâk akadik inti hi antamanhret tor hêrmak jo hei kha.

⁸Janne leh Jambre in Moses antadōi kapōa, hiva mihei hinum akadik kha andōia kae, anmani kha mandonna kaneimak leh taksenna katlâksam hei kae.

⁹Tâk-kha anmani akahla tlungtor mak hei ning, ajârchu anmani heituk a akamohei mo ti kha mi rakip in anhong manhret sik jo hei. Khang hrep a khan Janne leh Jambre chunga aleikasōk jo kae.

¹⁰Tâk-kha nang chu, kei mantheina, omchen, kahringkhōa ṭōn mantlukna hei kha najui jo; kataksenna, kade hratna, kalungsetna, kathōkna hei,

¹¹kei inrim thōkna, leh kei inrengna hei nahmu jo. Khan chu Antioch a, Iconiuma, Lystra a ṭit ka-om tak suk manrimna kalei thōk kha namanhret. Tâk-kha heirakip a inphut Rōngpu’n alei huksōt eng.

¹²Christa Jesu leh inchunna shunga bek-ôi hringkhō indu rakip suk manrim sik hei kae;

¹³mikaṭhamak-hei leh a’nṭhat hlemsak-hei kha anbinga inhōn inthla sik hei, khana milak um anhōn sik hei, mise anchangna inphut akasechet kachang sik hei.

¹⁴Tâk-kha nang chu, ale’nthei jo che, kahnet a nataksen jo akadik a khan omṭhak roh. Ajârchu na-ojahei kha tu-anchang namanhret hei,

¹⁵khana nasinlaia inphut a, singna nakapektor Jesu Christa taksen jâra hukmanhringna ting ani kaṭhōi Ṭong intheng namanhret jo kha mandonsōt roh.

¹⁶Ṭong intheng rakip hi Pathen kaphuk masakhum kae khana kahnem hêr, akadik mantheina sik, akadik mak raseina sik, akaṭhe mandikna sik, khana kadik a hringna sik a mansena sik,

¹⁷Pathen inzenhei kha themna langa pui antluk a akaṭha ṭōn antlona sik a, hmangchâk rakip an-invon torna sik a kae.