Read Komrem TITUS 1 Bible Online

TITUS 1 - Komrem bible

TITUS 1

¹Pathen sōk kachang, Jesu Christa sonle Paul a inphut. Pathen takadei mihei taksenna chunga inthōpuina sik, khana nibekṭong mantheina akadik a khan anhlam kakei sik a kei akadei enga atir eng,

²khavakha kumleikōa hringna sik a inhōrna chunga khan akangir kae. Hiva hringna ṭong hi, malei kaseimak Pathen in pha ale’nphut mak hma, aleitep peksa me kae,

³khavakha ama’n aphahrep a aṭongsema khan aphôngsōt jo. Khavakha kei angansê eng, khana ani kahuk inhring Pathen ṭongpek dungjuia kahri manthanga kae.

⁴Taksenna chen kaneipui kasapa kadiktak, Titus hneng kaheimazet kae. Pa Pathen leh ani kahuk inhring Christa khan malung mōngna leh maritna pek che rasoh.

⁵Tûn katlung tlo sik a alaka-om bân kaneia natlona sik leh khōpui rakip a bekrup upa nakadei torna sik a Cretea kadahlon che kae. Kamansena che kha mandonsōt roh:

⁶upa inkhat kha a-omchen masetna kase nuhmei inkhat rōk kanei; khana asahei kha akataksen akachang sik, khana a’nvetsak a rahmingset kaneimak akachang sik hei kae.

⁷Ajârchu bekrup hlamkakei inkhat kha Pathen innshung ṭōnkarôn achang jâra, a-omchen nōrna kase akachang sik kae. Ama racham kase, hnuk kanabei, ju inrui, chokchi katlo, sêr leh sum phâmrai kase akachangmak sik kae.

⁸Ama akaṭha indu, khōhme ralam kathem akae nger sik kae. Abinga a’nsurtor, kadik a, inthenga, khana dân thōia aka-om akachang nger sik kae.

⁹Chônna leh intōk a taksenthei kachang ṭong inhri kha kahnet a amatu nger sik kae. Hing’hin ama’n akadik mantheina vâng khan milak-hei amathok thei sik hei khana khava kadōihei ṭhena kha amalârtor sik jo.

¹⁰Ajârchu adek a Jehudi bekṭonga inphut ahong inlet hei, mi kadōi leh mikahōn inthla, hinahin katamtak ka-om heia kae.

¹¹Anmani ṭonghri kha manbâng sik hei kae, ajârchu anmani’n antahri mak sik ṭong anhria innshung rakip anmanchok jo, khana inzakpui ka-om tak a sêr jongna sik anmantluk jo.

¹²Anmani sânkathem, Crete mikhet in akadik ahria hinga ati, “Crete mihei ahei tik a anmalei kasei, anmani akaṭhamak ramsha, mi kalôp ratha kase hei kae,” ati. Khava jâra taksenna kaṭha kha anneina sik, anmani inhnaktak a rasei hei roh,

¹⁴ṭongdik kahōt Jehudihei thuhming leh mihring ṭongpek-hei kha matuṭhak makna sik manse hei roh.

¹⁵Mi intheng hei sik a heirakip intheng; tâk a’nthengmak hei sik a leh akataksenmak hei sik a chu a’ntheng inkhatbek om mak, ajârchu anmanhretna leh anmandon ṭhen theina kha intheng mak a kae.

¹⁶Anmani’n Pathen kanmanhret anti, tâk anṭōn tlo’nchu hnōm mak. Anmani mater ka-om hei khana ṭongpek juimak hei, heikhat ṭōn kaṭha katlo sik a rahōi changmak hei.