Read Komrem TITUS 2 Bible Online

TITUS 2 - Komrem bible

TITUS 2

¹Tâk-kha nang in chônna kadik tahnōm kha namanthei nger sik hei kae.

²Upa katerhei kha, malung singna, manhret theina, binga insur tor anchangna sik khan chu taksenna, lungsetna khana dehratna pui katluk anchangna sik manthei hei roh.

³Kha leh in-anghrep a nupui katerhei kha hringkhō inthenga akahring nuhmei anchangna sik manse hei roh. Khan chu mi kahri inset leh ju sōk akachangmak sik hei kae. Anmani’n akaṭha kha mi antamanthei sik hei kae,

⁴nupui ther hei khan anpuisehei leh ansahei anlungsetna sik,

⁵anbinga insur torna, inthenga omna, anpuise ṭong juina, inn kahlō kaṭha anchangna sik, Pathena inphut ṭong inhri kha tûte’n anhrimanset makna sik, antamanthei sik hei kae.

⁶Kha leh in-anghrep a retherhei kha anbinga an-insur torna sik mathok hei roh.

⁷Heirakip a omchen kaṭha tekhing inkhat a om roh. Mi mantheina malung intheng leh malung kahlut chang roh.

⁸Na’ndōipui hei khan nachunga ṭhatmak hri sik manhret loa inzak anchenna sik tûte tahrimaset tor mak sik ṭonghei kha hmang roh.

⁹Sōk-hei khan anrōngpuhei ṭong jui hei sona heirakip a mantlai hei rasoh. Anmani’n makhe mak hei rasoh

¹⁰khana annei kha marûk mak hei rasoh. Khava kanek a, antlona rakip chunga ani kahuk inhring Pathen mantheina kha anneina sik ahei tik a anṭhatna leh taksenthei anchangna kha antamalâr sik kae.

¹¹Ajârchu mi rakip hukmanhring anchangna sik Pathen in amaritna kha amalâr joa kae.

¹²Hiva maritna hin bekṭong kaneimak hringkhō leh vânhnōi maduna hei masōna sik khana binga insur torna, kadik a omna leh, bekṭong kaneia hringna sik amanse me,

¹³khanga nikahuk inhringpa Jesu Christa leh akalen Pathen lûrna kha ajō’nlârna pha, vângṭhatna kania ni’nhōrna kha nihngâk a nileiom shung seng sik amanse me kae.

¹⁴Eini ṭhatmakna rakip a inphut ani kahuksōt sik a leh mi intheng ama ta rōk akachang sik mea khana akaṭha katlo hnōm nichangna sik a, ama’n abinga eini sik a inpek sōt joa kae.

¹⁵Hihei hi manthei hei roh khana naṭong inngei hei kha namathokna hei leh naraseina heia khan pui katluk naratha neina kha hmang roh. Nang tûte’n hmumasi mak che rasoh.