Read Komrem PHILEMON 1 Bible Online

PHILEMON 1 - Komrem bible

PHILEMON 1

¹Jesu Christa jâra kurkhum a ka-om, Paul leh nisōpui Timothya inphut, Kanṭhōnpa leh kanṭōn tlopui Philemon hnenga,

²khana na-inna a’ntûp bekrup mihei leh, nisōpuinu Apphia leh nisepei changpui, Archippus hneng kantahei mazet kae:

³Nipa Pathen leh ni-Rōngpu Jesu Christa khan lungset maritna leh mōngna pek chei rasoh.

⁴Sōpui Philemon, kaderna rakip a nang kakopsa ṭhak che khana ka-Pathen kamanpâk ṭhak.

⁵Ajârchu Rōngpu Jesu Christa nataksenna leh Pathen mihei seng nalungsetna ṭong kha katheia kae.

⁶Keini akataksenhei inthlop puina che hin Christa leh inchunna shunga nihringkhōa mahâmṭhat chenna rakip kha inrichet a manhretna ninei sik hi kei derna kae.

⁷Sōpui marit, nang lungsetna khan, mathokna katamtak leh inpâkna kalentak amannei eng! Nang in Pathen mi rakip hei malung namanhōi pek heia kae.

⁸Hiva jâra hin heimo tlo sik kasōk kha natlona sik a ṭong pek sik che hi, Christa a nasōpui inkhat a, inngamna kanei tor.

⁹Tâk-kha ke’n kalungset che jâra, ngekna jôk kahong nei jo che kae. Hivahi Paul kei, Jesu Christa Ṭongkarôn inkhat kachang inum, khana tûnhin Christa sik jâra kurkhum a a’nkhum kachang inum kahei ngek che kae.

¹⁰Achang jâra Christa a kei khet sapa, Onesimus kahlang kathlenga ngekna inkhat hi kahong nei che; ajârchu kurkhum a ka-om shunga hin kei hi rathla langa ama pa akachang jo eng kae.

¹¹Pha khat a nang sik a ama hi hmangna kase leikachang, tâk tûnchu ama hi nang sik leh kei sik a hmangtheitak kachang jo.

¹²Tûn ama hi nahnenga kahei tir male kae, khana achunga kamalungset hêra kae.

¹³Ṭong kaṭha sik jâra kurkhum a ka-om shunga hin, nang kahlanga ama’n abôm theina sik eng, kahnenga hin kaman om hnōm.

¹⁴Achang inum rumhrat a abôm roh tihnōm mak eng; namadu hrep a natlo sik a kamadu. Khava jâra nang in nahnōm mak inchu kei heite timak ning.

¹⁵Pha rakip a ama hi nachen male thang theina sik a, pha bongkhat Onesimus hi nanga inphut aleikasesōt jo um kachang thei.

¹⁶Khana tûnchu ama hi sōk inkhat hnâm changmak jo, sōk kakhea Christa a sōpui marit inkhat jo kae. Heituk-hrep kei hnenga akahnem jo mo! Khana Rōngpua sōk leh sōpui inkhat changa, heituk-hrep nang hnenga akahnemdet sik mo!

¹⁷Achang jâra, naṭōntlopui inkhat a nalotor enga achang inchu, kei narahlâng eng kapōa ama hi leirahlâng roh.

¹⁸Nahnenga heikhat ṭhena a-emak leh bat aleinei jo tâk inum, kei tabat kae tia amandon pek roh.

¹⁹Hiva sik a hin, ke’n kakutkhet a hivahi kamazet sik: Paul, ke’n kapek male sik che. (Amirōkchu, nang in nataksa khet kha kei hneng nabat eng kae ti hi chu, mandonsōtna mannei mak che rong.)

²⁰Achang jâra, kasōpui, Rōngpu jâra hiva lum lona ṭōn hi lungsettak a atlopek roh; Christa a sōpui inkhat changna, kamalung amanhōi pek roh!

²¹Ke’n kader che hi, nang in natlosōt sik tia ke’n hivahi kamazet lai hin hlamrinna kanei, kadiktak a hiva kakhe chet a nang in natlo sik tia inhōr eng.

²²Hi leh inṭhōia innden inkhat amantluk pek roh, ajârchu nangni rakip hei derpekna eng kha Pathen in amasôn sik, khana nanhnenga ahongtir male sik eng tia inhōr eng.

²³Christa sik a kei leh kurkhum a aka-omsap Epaphras in, chibei ahei pek chei,

²⁴khana kaṭōn tlopui Mark, Aristarchus, Demas leh Luke he’num anheipek chei.

²⁵Rōngpu Jesu Christa maritna khan nankhenga chunga ompui chei rasoh.