Read Komrem HEBREWHEI 10 Bible Online

HEBREWHEI 10 - Komrem bible

HEBREWHEI 10

¹Jehudihei Dân kha pui katluk leh taksenthei akadiktak lim kha changmak; hivahi hnunga akaṭha neinâk akajōng sik rahle kha kae. Inthoina mama kha akum kataia ahei tik a ka-om ṭhak. Khan chu, heikhong mo Pathen hneng akahong mihei kha hiva inthoina tōk jâra Dân khan pui amathluktor sik hei?

²Khanga tloa Pathen inmuk hei kha ansetnahei a’nthengkhet jo anchang inchu, anmani’n setna inrimna malung kha antanei nôk mak sik jo kae, khana inthoina rakip aleikabâng sik jo kae.

³Achang inum, mihei setnahei kha anmandonsōtna sik akumtina inthoina hi ale’ntlo kae.

⁴Ajârchu sehratche leh kehei thisen khan setna kha ahei tik a sik losōt tor mak.

⁵Khava jâra Christa khan raleichunga ajōng sik ting, ama’n Pathen hneng ati, “Nang in ran vânga inthoi leh tōkna madu mak che, tâk nang in kei sik taksa inkhat namantluk pek eng.

⁶Nang maichâm chunga ran apum a inthoina leh set inthengna inthoina khan tlaimak che.

⁷Khana ke’n kahri, ‘Dânrabu a kei chungchânga a’nzet kapōa, nalungdo katlo sik a kei hin ka-om eng, Eh Pathen.’”

⁸Ama’n hma inkeia ahri: “Nang in inthoi leh tōksōt a-emak leh maichâma inthoina leh setna inthengna sik inthoinahei kha madu mak che khana tlaipui mak che.” Dân dungjuia tōkna rakip antlojen ravâng ama’n hinga aleihria kae.

⁹Khava sōa ama’n ahri, “Nalungdo katlo sik a kei hin ka-om eng, Eh Pathen.” Khava jâra Pathen in inthoina marō hei seng amanhmanga khava kathlenga Christa kha ada joa kae.

¹⁰Ajârchu Jesu Christa’n ataksakhet vōi khat rōk a ahei tik sik a inpek sōt a Pathen tamadu kha atlo jo jâra, eini nikhenga setna inphut amantheng jo me kae.

¹¹Jehudi thempu rakip in ani tina razenna antloṭhak khana inthoina angaia ave-avea antōk a kae; tâk hiva inthoinahei hin setnahei kha hlonsōt tor mak.

¹²Tâk-kha Christa khan ahei tik a sik a, vōi khat rōk setna inthoina kachanga inpek sōt a, Pathen changting in-ong jo.

¹³Khana khan akadōihei kha Pathen in ake thōia chōnpha a adapek mak kârseng ahngâk a ka-om jo.

¹⁴Khang’khan, vōi khat inthoina vâng ansetna manthengpek hei kha ahei tik a pui katluk a asyem jo hei.

¹⁵Khana Rathla Intheng kha’num sâkhi apek me. Hma inkeia ahri:

¹⁶“Akahong sik pha heia khan, anmani leh kan-intepna sik kha hi kae, Rōngpu’n ati, ke’n anmalung shunga kadânhei kadapek sik hei. Khana anlungria kamazet pek sik hei.”

¹⁷Khava sōa ama’n, “Ansetnahei leh anṭōnse tlohei ke’n mandon nôk mak jo ning,” ati.

¹⁸Khava jâra setnahei hi arangei mandamsō jo pha, set inthengna sik inthoina avea rangei nôk mak jo.

¹⁹Khava jâra, kasōpuihei, Jesu thi jâra Hmun Inthengpen hmun kajōn sik pui katluk a ning leh hnōm kha nichen jo kae.

²⁰Ama’n pinden kha akhōiṭhena, hlamther, hringna hlam inkhat, ama khet taksa inphut eini sik amahlâng pek jo me.

²¹Eini’n Pathen innshung karôn Thempu Kalen kha ninei.

²²Khava jâra mandon ṭhentheinahei themmô rôn kha, sôp mantheng seng jo malung leh, tui intheng vâng rasi mantheng seng taksahei leh, malung inthengtak leh, taksenna inchêntak a Pathen hneng hong rih.

²³Eini’n nihrisōt inhōrna kha kahnet a matu rih, ajârchu Pathen kha aṭong tepna katlosōt sik a nitaksentor a kae.

²⁴Eini khat leh khat inbôm tōna, inlungsetna leh akaṭha tlona sik lum inlo rih.

²⁵Intûpna mi ṭhahrep chu invei mak hei, eini chu angaia ni’ntûp ṭhak hi bângmak rih. Khava kanek a, Rōngpu Kani kha ahong hnaichet jo nanhmu jâra, kakhe chet a khat leh khat malung inthok tō rih.

²⁶Ajârchu eini’n akadik kha nimanhretsō jo kahnunga, setmông rong tia niset injôn inchu, set inthengna sik abân inthoina om mak jo.

²⁷Khava kanek a, alaka-om khachu Pathen kadōihei inhmangna sik a akajōng ṭong tanna leh ṭit ka-om tak hmei kha ṭitpum a hngâk sik kha kae.

²⁸Tu achang inum Moses Dân kajuimak mi kha aṭong antan pha, mi 2 3 sâkhia inphut aṭhe jo’nchu, lungsetna kasejena anthat a kae.

²⁹Kha achang inchu, Pathen Sapa kahnōise hei sik hei mo kachang sik? Khava anset manthengna kapek Pathen intepna thisen kha mankabeitek a akalo hei sik? maritna Rathla manzakna kapek hei sik? Khahei kha heituk-hrep akakhe karâkna mo anrahōi akachang sik mandon ruh!

³⁰Ajârchu hinga akahri kha nimanhret, “Ke’n phu kahlō sik, ke’n kamale sik”; khana hinga akahri nôk kha, “Rōngpu’n amihei ṭong atan sik.”

³¹Akahring ṭhak Pathen kut chunga nitlâk sik hi ṭit ka-om tak inkhat kae!

³²Hmalai khan nanchunga heimo aleikasōk mandon ruh. Khava lai Pathen vâr khan ajōngsat chei kahnunga inrimna nanleithōk hêr, kha’num nanthōkna khan nangni leitor mak chei.

³³Khava lai khan mipui kâra êngset a leh manuisōna anleipek chei, khana pha khat nôk a khanga antanōise hei kha nangni’n nanlei thōkpui hnōm hei.

³⁴Kurkhum a ka-om hei kha chen nanneipui hei, nannei rakip ankasut jo chei pha inpâk a nandetor, ajârchu ahei tik a aka-omsôt sik akaṭhachet heikhat nantalanei kha nan-inhret a kae.

³⁵Achang jâra nanmalung mathlâk mak ruh, ajârchu khava khan tloman katamtak ajōng rôn sik kae.

³⁶Pathen ṭongtep chenna sik leh alungdo tlona sik a nantadehrat sik arangei.

³⁷Ajârchu ṭong intheng in hinga ahri: “Apha ajing alaka-omdet shunga, akajōng sik ama kha kajōng sik; ama hong insum mak ning.

³⁸Achang ravâng kami kadik-hei kha’n, antaksen sik, khana kahring sik hei; tâk ankâra kahnungting a’nle a-om inchu, kei achunga kamalung tlaimak ning.”

³⁹Eini chu hnung inlea a’nhmanghei kha changmak me. Khava kanek a taksenna nineia huksōt jo me kha kae.