Read Komrem HEBREWHEI 11 Bible Online

HEBREWHEI 11 - Komrem bible

HEBREWHEI 11

¹Taksenna nei ti hi inhōrna neinâk kha aka-omkhet a nimandon, hmit a hmutorlo neinâk kha a’nchênkhet a nilo kha kae.

²Hmalaia mihe’n Pathen hnōm pekna anta leichen kha antaksen jâra kae.

³Hmit a hmuthei hi hmuthei loa inphut ansyem achangna sik, vânhnōi hi Pathen ṭong vâng ale’nsyem kae tia nimanhret hi taksen jâra kae.

⁴Taksen jâra Abel in Cain kanek a akaṭhachet inthoina Pathen hneng atōk a kae. Mikadik a inteina sik Pathen manṭhatna achen kha ataksen jâra kae, ajârchu Pathen khet in akutchoi kha ahnōm pek a kae. Abel athi jo’num, tûn katlung ṭong alahri hi ataksenna vânga kae.

⁵Taksen jâra Enoch kha thina inphut aṭhensōt kae. Thi kanek a, Pathen hneng ṭhōitoua ka-om, tûte’n leihmu mak hei, ajârchu Pathen in aṭhōitoua kae. Ṭong intheng in ahri khachu Enoch ṭhōitoua a-om mak hma Pathen malung aleimantlai.

⁶Taksen kasea tûte’n Pathen mantlai tor mak, ajârchu tu enum Pathen hneng akahong khan Pathen hi kahring ṭhak, ama kajong hei kha tloman apek sik hei, ti hi antataksen nger sik kae.

⁷Taksen jâra Noah’n aleihmu phâkmak hnunga omchen sik a Pathen gîkna aleitheia kae. Khana ama’n aṭong ajuia rakōng inkhat asuia khava shunga ama leh a-innshung le’nhuk hei. Khava jâra, vânhnōi hi themmô manchen jo kae, khana taksen jâra mandikna kha Pathena inphut Noah’n aleichen jo.

⁸Taksen jâra Pathen in pek sik a ale’ntep ram kajōna sena sik Abraham kha abek pha aṭong aleijuia kae. Khonting mo ajōn sik manhret lo jen a aram kha aleidahlon.

⁹Taksen jâra Pathen tateppek ram a khan khōhme kapōa vaka-om. Pathen intepna thakhat a aleikachen Isaac leh Jacob hei kapōa ama kha pōn rabuk-inna leika-om.

¹⁰Ajârchu Abraham in khōpui innhmun kahnettak Pathen tamantluk leh tasâk sik kha aleihngâk ṭhak a kae.

¹¹Taksen jâra Abraham ater hêr joa achang inum khana Sarah kha sanei pha a’nkhe jo tâk inum, pa inkhat lahong kachang nôk a kae. Ama’n Pathen intepna kha atlosōt nger sik tia taksenna anei.

¹²Ama kadiktak a athi jo achang inum, ama inkhat rōk a inphut atu asahei kha marvân ârsi ja leh tui-ôngpui panga tei torlo nêrdi ja hongkachang jo hei.

¹³Hiva mihei seng hi taksenna shunga leikathi jo hei. Pathen ṭongtep pek neinâk kha leichanmak hei, kha’num kahlajap a inphut anhmuphâk hei, anleirahlâng hei, khana raleia khōhme leh rekatlân anchang kha inchêntak a leikahnōm hei.

¹⁴Khang khava kahri hei kha’n, anmani’n anbingta sik a ram inkhat anta’njong kae ti kha anmanchên.

¹⁵Anmani’n anta heidahlon ram kha leimandon ṭhak mak jo hei; an-inlehnōm inchu ale’nlethei hei kae.

¹⁶Khava kanek a akaṭhachet ram, marvântinga ram kha antarangei jôk kae. Khava jâra Pathen in anmani Pathen a’nti sik kha inzak mak, ajârchu ama’n khōpui inkhat anmani sik amantluk pek jo hei.

¹⁷Taksen jâra Pathen in Abraham a-enmansin pha, Abraham in asapa Isaac inthoina sik atōksōt a kae. Pathen ṭong inteppui kha Abraham kae; achang ravâng sapa inkhat rōk anei kha inthoina inkhat a tōksōt sik a le’ntluk a kae.

¹⁸Pathen in ahnenga, “Isaac a inphut nang in sōn leh pâr nanei sik,” aleitipek.

¹⁹Pathen in Isaac kha thina inphut amanhring tor nôk ti hi Abraham in amandonsōt, khana a’nhri kapōa khan, Abraham in Isaac kha thina inphut aleichen male nôk a kae.

²⁰Taksen jâra Isaac in Jacob leh Esau hei hnunga vângṭhat antachen sik chunga intepna aleineia kae.

²¹Taksen jâra Jacob in athimak hma Joseph sahei mahâmṭhat apek et heia kae. Akhōnghrea in-ngaia Pathen aleikamuk.

²²Taksen jâra Joseph in athi sik ting, Israel sahe’n Egypt ram antadahlon sik ṭong ahria, ataksa kha heikhonga tlopek sik mo tia aleimanthei heia kae.

²³Taksen jâra Moses a’ntetsōa anu leh apa’n thla 3 anleithup a kae. Anmani’n naite hmeṭhat kha anhmua rengpa ṭongpek sukkhōi sik kha leiṭit mak hei.

²⁴Taksen jâra Moses alen pha, Pharaoh sanu tamanhring sapa a’nti sik leihnōm mak a kae.

²⁵Pha bongkhat setna kha hōipui sik kanek a Pathen mihei leh khōdeng theisap sik kha amadu jôk a kae.

²⁶Egypt karōi rakip nei sik kanek a Messiah sik jâra sungde sik khan man anei jôk ti hi ahong mandonsōt, ajârchu ahmit khan hnunga tloman achen sik kha a-en ṭhak a kae.

²⁷Taksen jâra Moses’n rengpa hnuknat sik kha ṭit loa Egypt adahlona kae. Hmit a hmulo Pathen kha ahmu jo kapōa, hnung inle sik kha leihnōm mak.

²⁸Taksen jâra Ama’n Rakan Kût asyema, Thina ngeva khan Israel sa upapen hei kha athat makna sik, kot khâr chunga thisen kathing thlōnna sik ṭong apek a kae.

²⁹Taksen jâra Israel sahe’n Tuipui Kasen kha ralei kachâr kapōa anta leirakansōt kae; Egypt mihe’n rakan sik anrei pha, tuipui khan amadesō heia kae.

³⁰Taksen jâra Jericho khōpui akimvea Israel sahe’n ni 7 anvesō pha, kurpui bang kachima kae.

³¹Taksen jâra Rahab notinu khan ram kathlirle hei kha a-inna ṭhōn leh re kapōa amathlung hei jâra, Pathen ṭong kajuimak hei leh thatsōm sik heia inphut hukmanhringna achen a kae.

³²Kalahri sik mo? Gideon, Barak, Samson, Jephtha, David, Samuel, khana sânkathemhei ṭong hrina sik pha om mak joa kae.

³³Taksenna inphut anmani’n ram pumpui re antuk a antorsō. Anmani’n akadik kha anleitlo khana Pathen ṭongtep pekna hei kha anleichen. Anmani’n shabakkaihei bei anleihip,

³⁴hmei thlupui male anleimandai, chemjâma thina sik a inphut leikasōk hei. Anmani leikatlâksam hei, tâk akahrat hongkachang hei; anmani rehmun a re kahrattak hongkachang heia ram hlop remihei kha antor heia kae.

³⁵Taksenna inphut nupui he’n akathi an-innshung mihei akahring male hei kha anhmu nôk hei. Alak-hei kha’n taksenna masō sik anhnōm mak jâra, hringkhō kaṭhachet a anhring theina sik, suk manrimna andea kathi jo hei.

³⁶Ṭhahrep anmanuisō heia anvōk hei, khana alak-hei kha ankhit heia kurkhum a ankhum heia kae.

³⁷Anmani hlung vâng andenghlon hei, thing-âtna vâng bong hni anmasōk hei, khana chemjâm vâng antuk hlon heia kae. Anmani kemōng vun a-emak leh ke vun an-insia kalônle hei, sara changna, suk manrimna khana ênga tlona hei anleide.

³⁸Anmani sik a raleichung hi akaṭha leichang mak jo. Anmani rekatlân kapōa, nêrdiram thōia, tlânga, dâma, kōk a, khura kalôn-invai heia kae.

³⁹Taksen jâra anmani’n heituk kaṭha thuhming kha antachen jo mo! Kha’num Pathen ṭongtep pek hei khachu leihmu mak hei,

⁴⁰ajârchu Pathen in eini sik a akaṭhachet mantlukna alaneipek mea kae. Eini leh ni’nthlop leh rōk anmani pui tlukna akae sik kha ama ṭōn mantlukna kha kae.