Read Komrem HEBREWHEI 12 Bible Online

HEBREWHEI 12 - Komrem bible

HEBREWHEI 12

¹Eini sik a nikimvea sâkhi mi katamtak ninei hei. Achang jâra nihlam hrona heirakip a leh set tamatu tlitna sik mea inphut inhesōt rih, nihma ka-om nibitin hmun kajōna tlân rih.

²A’nphutbia inphut a’nchaina katlung nitaksen inhngatna Jesu kha enṭhak rih. Ama’n thingrake jâra khan aṭōntlo kha leihai mak. Akahai kanek a inpâk na’n ahngâk ṭhak kha amandona thingrake chunga hme kasetak a athi sik kha heite khôk leisak mak, khana tûnhin Pathen len in-ongna changting in-onga kae.

³Aleithōk hei seng kha mandon ruh; mikasehei khangtuk hrep hōtna aleide kha! Khava jâra nangni nanbinga haina sik nanratha manset mak ruh.

⁴Ajârchu nangni’n set kadōia re nan-intukpuina shunga hin thina katlunga la’ndōipui mak hi chei.

⁵Nanmalung ngamna sik Pathen in asa kapōa amathokna chei ṭong kha nantamahngi jo mo? “Kasa, Rōngpu’n amanse che pha, kaṭha rangei roh, khana arasei che pha, namalung mathla mak roh.

⁶Ajârchu Rōngpu’n amalungset rakip hei kha amanse hei, khana ama’n asa manchang sik a arahlâng rakip hei kha akarâk heia kae.”

⁷Pa mansena chei inkhat a inlo una nan-inrimna hei kha dehrat ruh; ajârchu nan-inrimna khan Pathen in asa kapōa amandon chei ti hi amalâr. Apa’n amanse mak sa aka-om phung mo?

⁸Asa rakip hei kapōa karâkna aneimak chei inchu, nangni asatak changmak chei, sajai sa chei kha kae.

⁹Eini mihring pa kachang he’nchu, eini ankarâk me khana eini’n nikaja heia kae. Kha achang inchu, rathla Pa hnenga khan chu heituk akakhe chet a a’npek inhlut sik me leh akahring sik me mo!

¹⁰Taksa mihring pa he’n pha bongkhat rōk anmani’n kadik antina hlam a khan antamanse me kae. Tâk-kha Pathen inchu eini ṭhatna sik, ama inthengna kha nichenpui theina sik atloa kae.

¹¹Eini karâkna apek me pha, eini sik inpâkna changloa inrengna sik leika-ang, inpâk mak me. Achang ravâng khang khava karâk a mandikna hei kha hnunga chu malung mōngna sik hringkhō kadik kara an-inlōk a kae.

¹²Nankut kazeng hei kha kalâng ruh, khana nanmarkhup innok kha manngar ruh!

¹³Khana nanke kangōi kha azeng makna sik leh adamna sik hlam intluna khan seṭhak ruh.

¹⁴Mi rakip leh intōk inchamna sik leh hringkhō inthenga omna sik tak intlo ruh, ajârchu khava loa chu tûte’n Rōngpu kha hmutor mak ning.

¹⁵Pathen maritna inphut hnung inle makna sik insing thei ruh. Tûte inkhat kahar kakha kapōa ahong kakeksōt a atûr khan bōina katamtak insō kha changmak rasoh.

¹⁶Esau in sa upa achangna rathachen kha thlai sâk khat rōk vâng a’njōrsōt kapōa omchen kaṭhamak leh rathla katlâksam tûte hongchang mak hei rasoh.

¹⁷Hnunga ama’n apa vângpek sik kha amadua hmit-rathli pum a ajōng ravâng, aleitlosa jo kha thleng nôkna sik ahlam ahmutor mak jo jâra le’npek mak jo ti nangni’n nanmanhret.

¹⁸Nangni tamanhret thei sik a, Sinai Tlânga hmei male, khō kajing leh lungdong pum a, thlipui thlihrem leh inṭhōia Israel mipuihei hong kapōa khan nangni chu lahong mak chei,

¹⁹Nangni pengkun mahring leh kahre rasa inhnaktak leh hongmak chei. Anmani chu rasa hei kha anthei pha, ṭonghlop rasa anthei nôk makna sik anleingek,

²⁰ajârchu hiva ṭongpek hi detor mak hei, khachu, “Ranhring inkhat in hmebung kha avatôn inchu, khava ranhring kha hlung vâng denghlon sik kae,”

²¹Khava antahmu kha khangtuk hrep a ṭit ka-om, ajârchu Moses’n, “Kei kaṭihêr eng khana innok eng,” ati.

²²Khava kanek a nangni chu, akahring ṭhak Pathen omna khōpui Zion Tlâng, marvân Jerusalem, ngeva lishing raja omna khan akahong jo chei kae.

²³Marvâna rahming inzet inhlut hei, Pathen sa-upahei inpâk a intûpna khan nangni kahong jo chei; khana mi rakip ṭongkatan Pathen hneng leh pui katluk a asyem mikadik-hei rathlahei hneng kahong jo chei.

²⁴Intepna ther kasyem Jesu hneng leh Abel thisen kanek a akaṭhachet intepna athisen inthek khumna khan kahong jo chei.

²⁵Khava jâra ṭong kahripa ṭong kha nanthei kada makna sik insing thei ruh. Raleichunga rathla ṭong kapekpa inngeimak kha leitlânsōt tor mak. Kha achang inchu marvâna inphut ṭong jōng kahripa ṭong kha nirangei mak inchu heituk kakhe chet a tlânsōt a’ntak sik mo!

²⁶Khava lai khan ama rasa khan ralei akatlir mannok a kae, tâk tûnchu ama’n ṭong atep a, “Ke’n vōi khat nôk ralei rōk changloa marvân um kakatlir mannok sik a kae,” ati.

²⁷“Vōi khat nôk,” inti hin kutsyem rakip akanok nôk sik, alosōt sik tina leh akatlir mannok mak neinâk-hei rōk aka-om sik jo hei kha amalâr.

²⁸Khava jâra eini’n a’nhling tor mak rengram kha nichen jo jâra inpâk rih. Pathen kha eini’n ṭittak leh kajatak a amalung nimantlaina sik kamuk me sona manpâk rih;

²⁹ajârchu ni-Pathen kha roman hmangna hmei malekhet kha kae.