Read Komrem HEBREWHEI 13 Bible Online

HEBREWHEI 13 - Komrem bible

HEBREWHEI 13

¹Christa a sōpui kapōtak a khat leh khat inlungset ṭhak ruh.

²Nan-inna khōhme ralam theina sik mandon ruh. Khanga antloa mi ṭhahrep in manhret phâkloa marvân tirlehei an-ina antamathlung heia antaralam leika-om hei.

³Kurkhum a a’nkhum hei kha, nangni’m anmani leh a’nkhumsa ung kae tia mandon ruh. Khōdeng katheihei kha, anmani kapōa nangni’m khōdeng nantathei kae tia mandon ruh.

⁴Luhông hi mi rakip in kaja hei rasoh, khana apuise leh anuhmei kha khat leh khat taksenthei chang hei rasoh. Mikajông leh omchen kadikmak khachu Pathen in anṭong atan sik kae.

⁵Sêr madu hringkhō kha masō ruh, nannei khakham kha tlaipui ruh. Ajârchu Pathen in ati jo, “Ke’n nangni dahlon mak chei ning, masō’m masō mak chei ning.”

⁶Kangamtak a om rih khana hinga ti rih: “Rōngpu hi kei inthōpui kae, kei ṭimak ning! Mihe’n kachunga heimo antatlo tor sik eng?”

⁷Pathen ṭong nanhnenga nankahri pek, hlamkakei marō hei kha mandonsōt hei ruh. Anmani heikhonga aleikahring heia aleikathi hei mo ti kha mandonsōt hei una, anmani taksenna kha inchu ruh.

⁸Jesu Christa khachu jâning, tuning, khana ahei tik a angangai kae.

⁹Akadik hlam a inphut ahlopdet mantheina akadik mak khan ṭhōi mak chei rasoh. Thlaisâk chunga dân jui kha changloa, Pathen maritna shunga ratha a ngarna chen sik kha kaṭha jôk; khana dân kajuihei kha’n inthōpuina heite chendek mak heia kae.

¹⁰Jehudihei bek-rabuk shunga ṭōn inzen thempuhei kha’n eini maichâm chunga inthoina hi sâkna sik ratha neimak hei.

¹¹Jehudihei Thempu Kalen khan ran thisen kha Hmun Inthengpena khan set-inthoina avatōk a kae; tâk ran taksapum khachu kurvâng langting anro heia kae.

¹²Khava jâra Jesu’n athisen vâng mihei setna manthengna sik, khōpui sōngkot vângting akathi kae.

¹³Khava jâra ama inzakna kachenpui sik a ahnenga kurvâng langting vase rih.

¹⁴Ajârchu eini hiva raleichunga hin inthlengtik kaneimak khōpui neimak me; khava jâra eini’n akajōng sik khōpui kha ni-enṭhak kae.

¹⁵Khava jâra eini’n Jesua ni’nthoina kapōa, nibei vânga ama hi Rōngpu kae tia phôngsōtna, achoi ka-ânna kha Pathen hneng tōkthak rih.

¹⁶Khat leh khat inbômtōa ṭōn kaṭha tlo sik mahngi mak ruh; ajârchu Pathen malung tlaina sik inthoina kha hi kae.

¹⁷Nanhlam kakeihei ṭong rangei ruh khana jui hei ruh. Anṭōntlo tintana kha Pathen hneng antalapek nger sik achang jâra, inhngaloa nanrathla kha anta-en ṭhak kae. Anṭong nanjui inchu, anṭōn kha inpâktak a antlo sik. Khava loa malung inrim pum a ṭōn antlo sik inchu nangni sik a hnemmak ning.

¹⁸Keini sik aderpek ṭhak ruh. Keini’n a’nthengseng mandon ṭhen theina kha kannei ti kanmanhret, ajârchu pha rakip a keini’n ṭōn kadik kantlohnōm ṭhak a kae.

¹⁹Khana kei Pathen in nanhnenga inranga ahei tirna sik eng, akakhe chet a kei sik aderpek ruh tia kakhôktak a kahei ngek chei kae.

²⁰Athisen vâng kumsôt intepna chunga mêrchîkna intatkhum Kemōng Kakhem Kalen, ni-Rōngpu Jesu kha thia inphut Pathen in akei mathōi jo. Mōngna Pathen lungdo kha nantlona sik, ama’n akaṭha nanta rangei rakip pek chei rasoh, khana Jesu Christa jâra keini chunga ama tlaina kha intlo rasoh. Khana Christa kha are-rea lûrṭhak rasoh! Amen.

²²Kasōpuihei, hinna mathokna ṭong hi dehrattak a nanta rangei sik a kangek chei; ajârchu hiva chithi kaheimazet chei hi akaseitak changmak.

²³Nisōpui Timothy kurkhum a inphut masō achang jo hi nantamanhret sik kamadu. Ama inrangtak a ahong tlung bei inchu, nangni leh inhmuna sik a kahong pha, amale he’nṭhōi sik ung.

²⁴Pathen mihei leh nanhlam kakeihei seng hnenga kanchibei leipek hei ruh. Italy a ka-om nuhmei-pase sōpui he’n chibei anheitlo chei.

²⁵Pathen maritna khan nankhenga ompui chei rasoh.