Read Komrem HEBREWHEI 2 Bible Online

HEBREWHEI 2 - Komrem bible

HEBREWHEI 2

¹Khava jâra eini aniṭhōisōt makna sik me, nileithei jo akadik kha inhnakchet a nimatutlit sik kae.

²Marvân ngevahei ṭong nipusōnhei anta leipek hei kha hui katlung jo, khana khava ṭong kajuimak hei leh akajui rakip anrahōi kasōk karâkna et kha anleichen jo.

³Khan chu, khangtuk hrep akalen hukmanhringna inkhat kha eini’n heitea nisakmak inchu, heikhong mo a’nhuk inhringtor sik me? Rōngpu khet khan ahma inkeia hukmanhringna hi aleiphông, khana aṭong hri katheihei kha’n kanhnenga hivahi kadik tia anhri manchên pek ung.

⁴Kha leh inṭhōia Pathen in alungdo dungjuia Rathla Intheng kutchoi kha asempek heia ṭōn-inlak katamtak leh det-hlana hei aleitloa anmani tatlo chunga asâkhi kha aleibesa pek hei.

⁵Eini’n nihri jo raleichung, akahong sik raleichung ther a vai karôn sik a Pathen in ngevahei kha asyem hei changmak.

⁶Khava kanek a, ṭong intheng hmun ṭhahrep a a’nhri kapōa: “Eh Pathen, nang in khôksak a namandon sik mihring hi tuhei mo kae; nahrung sik mihring hrep hei hi tuhei mo kae?

⁷Pha bongkhat ngevahei kanek a thōi katla det a nasyem hei; nang in kajana leh lûrna lukhu namankhu hei,

⁸khana anmani heirakip chunga vaikarôn naman chang hei.” Hivahin ati khachu Pathen in anmani “neinâk rakip chunga vai karôna” asyem jo hei; hinahin heirakip inveisō jo. Achang ravâng mihring in tûnhin heirakip chunga vai arônkhet khachu hmumak me.

⁹Tâk-kha Pathen maritna jâra mi rakip sik a athi theina sik a pha bongkhat ngevahei kanek a thōi katla det a aleisyem Jesu khachu nihmu. Ama’n khava thina intak kha aleide jâra kajana leh lûrna khana lenlukhu a’nkhu kha eini’n tûnchu nihmu joa kae.

¹⁰Hivahi akadik kae khachu sa katamtak he’n alûrna kha anchen theina sik heirakip kasyem Pathen khan Jesu kha inrengna dena vânga pui katluk inkhat a asyem sik kha kae.

¹¹Ama’n mihei kha ansetna inphut amantheng hei, khana ama leh amantheng senghei kha’n Pa inkhat rōk anneisap jo. Khava jâra Jesu’n anmani kha ama sōpuihei ati sik kha inzakna neimak.

¹²Ama’n Pathen hneng ahri: “Heimo natlo kha kamihei hneng kahri nger sik! An-intûpna shunga kachoi ka-ân nger sik che.”

¹³Ama’n hi ahri nôk, “Ke’n Pathen kataksen sik,” ati. Khan nôk chu ama’n hinga ahri, “Pathen tapek eng naipanghei leh hin kei ka-om eng.”

¹⁴Ama’n naipanghei ati kha, taksa leh thisen mihei anchang jâra, Jesu amatak kha’m anmani kapō inkhat hong kachanga, anmihring ngai ahongchenpui hei. Khana ama thi jâra Diabol, thina chunga ṭong kaneipa, kha asuk manhmang theina sik ama’n hivahi aleitlo jo,

¹⁵khana thina kaṭit a anhringkhōa sōk kachang hei kha ning leh hnōma amasō jo hei.

¹⁶Ajârchu ama’n marvân ngeva a’nthōpui hei changmak ti hi inchên. Khava kanek a, Abraham sōn leh pârhei kha a’nthōpui hei kae.

¹⁷Hiva tina chu mihei setna kha rangei mandamna sik, apathen ṭōn tlona chunga khan anmani sik taksenthei leh maritna kasip Thempu Kalen achang theina sik, ahlam rakip a asōpuihei kapōa ama’m akachang sik leikasōk jo.

¹⁸Khana ama khet um mathlemna aratōa khōdengthei aleide jo jâra, tûnchu mathlemna aka-om hei kha a’nthōpui tor jo heia kae.