Read Komrem HEBREWHEI 3 Bible Online

HEBREWHEI 3 - Komrem bible

HEBREWHEI 3

¹Pathen tabek jo ka-Christian sōpuihei! Eini’n nihrisōt taksenna chunga Thempu Kalen kachang sik a Pathen tajōngtir Jesu kha mandon ruh.

²Ajârchu Pathen innshunga Moses kha taksenthei achang kapōa hiva ṭōn katlo sik a a’ndeisōtpa Pathen hnenga ama’m taksenthei kachang joa kae.

³Inn kalûrtak kasak mi inkhat kha a-inn sak kanek a kalûr jôk, khava kapōa khan Moses kanek a Jesu kha kajana neichet sik a rahōi kasōk.

⁴Inn rakip hi mi inkhat tasak et kae, khana heirakip kasak khachu Pathen inkhat rōk kha kae.

⁵Pathen innshunga Moses kha sōk inkhat a taksenthei leikachang, khana hnunga Pathen tahri sik kha ama’n ahrisōt a kae.

⁶Tâk-kha Christa kha Pathen innshung karôn sik a taksen ka-om tak Sapa inkhat kae. Eini’n niratha hrokna leh ni’nngamna kha atorna katlung nimatu manhnet tlit inchu, eini a-innshung me kha kae.

⁷Ajârchu Rathla Intheng in ahri kapōa: “Nangni’n tuning Pathen rasa nanthei inchu,

⁸Nanpusōn he’n Pathen anleidōilai kapōa nanmalung mansak mak ruh, khava lai nêrdiram thōia anleilônlai anta lei-enmansin kapōa enmansin mak ruh.

⁹Khava hmun a anmani’n kum 40 kaṭōntlo anleihmu ravâng anlei enmansin eng khana kaṭong anleitan, Pathen in ati.

¹⁰Khava jâra sova mihei chunga kahnuknat a kalei ti, ‘Anmani ahei tik a akaja mak hei kaṭong pek juihnōm mak hei.’

¹¹Kei kahnuk kana khana intepna ka-ôrtak a kaleinei: ‘Anmani kapek sik hei châmhngatna ram a khan hlut hêrmak hei ning!’”

¹²Akataksen kasōpuihei, akahring ṭhak Pathena inphut inhesōtna sik khangtuk malung kaṭhamak leh akataksenmak nankâra tûte inkhat a-om makna sik insing thei ruh.

¹³Khava kanek a, nankâra tûte inkhat setna’n ahōn mathlâk makna sik leh amalung asak makna sik, ṭong inthenga “Tuning” inti kha eini chunga manngan achanglai seng nangni khat leh khat ani tina a’nthō nger sik chei kae.

¹⁴Ajârchu a’nphutbia inphut eini inngamna kha nimatutlit inchu, eini nikhenga Christa leh chen kaneisap me kha kae.

¹⁵Ṭong intheng tahri kha hi kae: “Nangni’n tuning Pathen rasa nanthei inchu nanpusōn he’n Pathen anleidōi laia kapōa nanmalung mansak mak ruh.”

¹⁶Pathen rasa katheia akadōi kha tuhei mo? Moses’n Egypt ram a inphut aheiṭhōisōt mi rakip hei kha kae.

¹⁷Kum 40 Pathen in ahnuk aleikana kha tuhei mo? Nêrdiram thōia aleikathi jo hei, setna leikatlo mihei kha kae.

¹⁸Pathen in aṭongtep ka-ôrtak kha atep pha, “Anmani kapek sik hei kalei ti châmhngatna ram a khan hlut hêrmak hei ning,” ati hi tuhei hnenga ati mo? Khava rahe kasehei hnenga kae.

¹⁹Khan chu anmani’n antaksen mak jâra ram kha leihlut tor mak hei ti hi eini’n nihmua kae.