Read Komrem HEBREWHEI 5 Bible Online

HEBREWHEI 5 - Komrem bible

HEBREWHEI 5

¹Thempu Kalen rakip, mihe’n ankâra inphut ankadei khana ankahlânga Pathen inzen sik anmatung, setna sik a inthoina leh tōksōtna katlo sik a.

²Ama ahlam katamtak a tlâksamna anei jâra heite inhret mak hei tloṭhena kha malung kadaia athōk tor a kae.

³Khana ama’n hlam katamtak a atlâksam jâra, mihei set-inthoina rōk changloa ama bing um a’nthôi nger sik kae.

⁴Thempu Kalen inkhat changa kajana chenna sik tûte abinga a’ndeisōt om mak. Aaron abek kapōa khan, mi inkhat kha Pathen in abek pha rōk leh thempu inkhat akachang ri kae.

⁵Kha leh in-anghrep a, Christa khan, Thempu Kalen inkhat changa kajana kha abinga inlomak. Tâk-kha Pathen in ati nôk, “Nang ka-Sapa che kae; Tuning kei napa kachang jo eng.”

⁶Ama’n hmunhlop inkhat a hing’hin, “Melchizedek thempu hrui dungjuia, nang ahei tik a thempu inkhat akachang sik che kae.”

⁷Ama thina inphut tu’n mo ahuksōt tor sik, tia Pathen hneng Jesu’n raleichunga ahring lai hmit-rathli pum a ka-ônga angêk a kae. Ama insinsak tak a a’npek sōt achang jâra, Pathen in aderna athei pek jo.

⁸Ama Pathen Sapa achang inum, akhōdeng theina vâng ṭongjui kha a’nthemchûk kae.

⁹Ama pui katluk achang sō pha, ama kataksen rakip sik kumleikō hukmanhringna kung kha kachang jo,

¹⁰khana Melchizedek hruia ama Thempu Kalen achangna sik Pathen in amalâr jo.

¹¹Keini’n hiva chungchânga hri sik katamtak kannei, achang ravâng manhret theina kha hinghrep hin nan-in-êng jâra, hrimanchên pek sik chei hi intak.

¹²Nangni oja changtheina sik pha leika-om, tâk tûn katlung Pathen ṭong a’nphutnabi kha mi inkhat tamanthei sik cheia alarangei ṭhak. Bu inhrum sâk kanek a senetui nantala-in sik kasōk

¹³Tu enum senetui laka-in sik mi kha akaṭha leh akase heite ala’nhret mak naipang inkhat alakachang kae.

¹⁴Inkhat ting chu, bu inhrum khachu upahei, akaṭha leh akase inhret hei sik a kae.