Read Komrem HEBREWHEI 6 Bible Online

HEBREWHEI 6 - Komrem bible

HEBREWHEI 6

¹Khan chu, Christian ṭong a’nphutna bia mantheina hei kha ni kahnungting dahlon jo me sona pui katluk mantheina langa hmating nam me sona se rih. Eini ṭōn kahnemmak ting avea inhena sik leh Pathen taksen makna sik hlam kha syem nôk mak jo rih;

²khana tui hlutna leh kut bukna hei chungchânga mantheina hei; akathi thōisōtna leh kumleikōa ṭong tannahei taksen makna sik tlomak jo rih.

³Hmating nam me sona se rih! Pathen in amanṭhat inchu hivahi eini tatlo mông sik kha kae.

⁴Ajârchu taksenna kadahlon jo mihei kha heikhong mo anmalung thlengna sik ahe’nṭhōi inletor nôk sik hei? Anmani vōi khat Pathen vâra leika-om jo hei; anmani’n marvân kutchoi pek Rathla Intheng kha anleichena anta leimantem jo kae.

⁵Anmani’n Pathen ṭong kha kaṭha tia’m anleimanhret jo, khana akahong sik khang heia ratha hratna hei kha’m antaksa’n anleimanhret jo.

⁶Khava sōa antaksenna kha andahlon jo! Anmalung thlengna sik heiṭhōi male nôk thei changmak jo hei, ajârchu Pathen Sapa kha mipui hmaikunga manzakna sik avea anmakhei hlona kae.

⁷Pathen in ralei hi vâng apek a achunga khō ave-avea amansûra athōia amajôp manhlut a anse-hleina amankek a hlei kathlōhei hnemna kachang.

⁸Tâk-kha rahling leh kahar akek jo’nchu, ahnemna om mak jo; Pathen hâksêra inrimna kachenhrep leh hmei vâng romanhmang sik kha kachang jo.

⁹Tâk-kha, ṭhōn marit hei, keini’n hinga kanhri’num, nangni chu inngamna kannei chei. Ti chu akaṭhachet mahâmṭhatna, hukmanhringna kha nannei ti kanmanhret.

¹⁰Pathen kha akadik katlomak changmak. Ama’n nanṭontlo leh nan-Christian changpui hei tûn katlunga nanpek heia, nanbôm heia, ama sik a lungsetna nantamalâr hei kha mahngi mak ning.

¹¹Nangni inhōrna kha hui atlungna sik, atorna katlunga nanratha nantamanhrok et sik hi kantamadu hêr kha kae.

¹²Keini’n nanratha akase sik madu mak ung, tâk akataksen leh akadehrat hei, Pathen ṭongtepna kachen hei kha aka-ang sik chei kanmadu.

¹³Pathen in Abraham hneng ṭong a’ntepna khan, aṭong intep kha atlosōt sik a ṭong intepna inkhat anei. A’ntep pha khan, ama kanek a akalen a-om mak jâra abibinga arahming apan a kae.

¹⁴Ama’n, “Ke’n nahnenga a’ntep eng kae, ti chu vâng kapek sik che khana sōn katamtak kapek sik che,” ati.

¹⁵Abraham in aleihngâk hrat, khava jâra Pathen ṭongtep kha aleichen.

¹⁶Mi inkhat in intepna anei inchu, ama kanek a akalen inkhat rahming apan a intep ri, khana intepna khan inkhe beitam rakip amandai.

¹⁷Pathen in amantluk jo kha ahei tik a thlengphung mak, ti hi aṭong tepna kachen sik hei hneng inlârtak a amanthei hnōm hei; khava jâra aṭong tepna shunga ṭongbi pinna kha abesa a kae.

¹⁸Hiva thlengthei kaemak 2 hi ka-om hei, khahei chunga Pathen amalei seitor mak. Khava jâra ama leh inhukna kachen jo me eini hmaikunga inhōrna adapek me kha kahnet a nimatu tlitna sik inhnaktak a amathok me kae.

¹⁹Eini’n hiva inhōrna hi nihringkhō thirchek-ai kapōa ninei. Hivahi inchêntak a inhukna kae marvân bek-inn pinden asuntana hmun intheng kha kahlut a kae.

²⁰Jesu kha eini kahlâng kathlenga khava hmun intheng katlunga leikahlut jo, ama Melchizedek thempu hruia Thempu Kalen inkhat ahei tik a sik kachang jo.