Read Komrem JAMES 2 Bible Online

JAMES 2 - Komrem bible

JAMES 2

¹Kasōpuihei, akalûr Rōngpu, ni-Rōngpu Jesu Christa akataksen kachang chei in mihei kha anvâng phông hmaisō kajana in-anglo hêra razen mak hei ruh.

²Tekâk inkhat a nan-intûpna mikanei sana kutkhi leh pōnsi derkei innetak a a’nvon inkhat leh sara pōn leh der kaṭetsâp a’nvon inkhat kahong heia kae.

³Nangni’n ret kaṭhapa khachu nankaja a ahnenga, “Nang hiva hmun kahōipena in-ong roh,” nantia, khana Sarapa hneng khan, “Nang chu khang’khan ngir roh, a-emak leh kakekunga raleia in-ong roh,” nantia achang inchu,

⁴nanmalung kadikmak khan, nankâra khōiṭhenna nansyem jâra nangni nanṭhe joa kae.

⁵Kasōpui marit hei, rangei ruh! Hiva raleichunga sarahei kha taksenna langa akahao sik a, khana ama inlungset hei sik a, aṭongteppek Rengram kha akachen sik a, Pathen in akadei hei kae.

⁶Tâk-kha sarahei kha kajamak hei chei! Tuhei mo nangni kasuk inrim leh ṭong tanna nankakeihei kha? Mikaneihei hi kae!

⁷Nanhnenga a’npek rahming kaṭha akahri inset hei kha anmani hei hi kae.

⁸Ṭong Inthenga a’nhmu, “Nang nabinga na’nlungset kapōa, nakhō naven lungset roh,” inti Rengram dân hi nangni’n nanjui inchu, akadik kha nantlo sik.

⁹Tâk-kha nangni’n mi hmai nan-ena mi nanrazen inchu, setna ṭhena kha nantlo jo khana dân kasuk khōi inkhat a Dân khan amaset jo chei.

¹⁰Ajârchu tu achang inum ṭongpek inkhat kasuk khōi khan akhenga asuk khōia aṭhe jo kae.

¹¹Ajârchu, “Jông mak ruh,” kati inkhat khan, “Mi that mak ruh,” hi’m atisa kae. Nanjông mak inum mi nanthat inchu, dân kasuk khōi jo chei kae.

¹²Eini ning leh hnōma ani’nsō dân khan anchunga ṭong alatan sik mihei kapōa nanbinga inlo una ṭonghri ruh khana ṭōntlo ruh.

¹³Ajârchu maritna kaneimak mi kha Pathen in aṭong atan pha marit a tlomak ning; tâk maritna khan ṭong tanna kha ator.

¹⁴Kasōpuihei! Mihe’n taksenna kannei ti hei sona anṭōnchu anmalâr tor mak inchu heiṭhatna mo aka-om? Khava taksenna khan ahuk tor sik hei mo?

¹⁵Tekâk inkhat a sōpui pōn leh der khana sâk leh in kaneimak ka-om hei.

¹⁶Nangni’n anhnenga, “Pathen in mahâmṭhat pek chei rasoh! Kaluma om-una, kakhop a sâk ruh,” tihei una, ahringkhō khôkna khachu nanpek mak hei ine heimo aṭhatna aka-om?

¹⁷Khava jâra taksen kha’m khanga kati: abing rōk a ṭōn kasea chu, taksen hi akathi kae.

¹⁸Tâk-kha mi inkhat in ahri sik, “Mi inkhat in taksenna anei khana inkhat in ṭōn tlona anei.” Kei masônna khachu hi kae, “Ṭōntlo kasea heikhong mo mi inkhat in taksen kha anei tor amanhmu roh. Ṭōntlo vânga kei taksenna chu kamanhmu sik che.”

¹⁹Pathen inkhat rōk ka-om ti nang in nataksen mo? Kaṭha! ṭai he’num antaksen, khana anṭit a anratha innok.

²⁰Eh mikamo! Ṭōn kase taksen khachu ahnemna om mak ti malârpek sik che namadu mo?

²¹Nipu Abraham kha heikhong mo Pathen leh kadiksap a aleika-om? Ama’n asapa Isaac kha maichâm chunga atōksōt pha, aṭōn tlona vânga kae.

²²Namanhret tor mo? Ataksenna leh aṭōntlo kha a’nṭhōi hei kae; ataksenna kha aṭōn tlona vânga pui amathluk kae?

²³Khana hinga akahri ṭong intheng kha hui hong katlung jo, “Abraham in Pathen ataksen, khana ama’n ataksen jâra Pathen in mikadik inkhat a alo.” Khava jâra Abraham kha Pathen ṭhōnpa inti.

²⁴Khan chu, mihei ṭōntlo vâng khan Pathen leh mandiksap hei kae, antaksenna rōk jâra changmak ti hi nanhmu jo.

²⁵Rahab notinu kha’m kha leh a’n-anghrep kae. Ama’n Jehudi rirûk a ramkathlir hei kha aleiralam heia hlam hlopting antlânsōtna sik ale’nthōpui hei, khava aṭōn jâra khan amanu kha Pathen leh mandik sapna achen kae.

²⁶Khava jâra, rathla kase taksa kha akathisa a-e kapōa, ṭōn kase taksen kha’m akathi kae.