Read Komrem JAMES 5 Bible Online

JAMES 5 - Komrem bible

JAMES 5

¹Khana tûn, mikaneihei, rangei ruh! Nanchunga inrimna ajōng katlung sik jâra khan ṭap una ṭajai sui ruh!

²Nanneihei kaṭopsō jo, nanpōn nanderhei ra-nge in asâksō jo.

³Nansana dangkahei kha thir-ek in akatōm sō jo, khana hiva thir-ek hin nanchunga sâkhi kae khana hmei kapōa aro mathlum sik chei. Hiva kani hnung intongting hin karōi hingja nanmanbuk joa kae.

⁴Nanhleia ratha nantamanrōi hei khachu aman pek mak chei. Anrasa nei kha rangei pek hei ruh. Nansâng kakhôm hei malung hōimak a an-ông rasa khan akahratpen Rōngpu, Pathen omna langa hong katlung jo.

⁵Hiva raleichunga hurna leh êmna pui katluk a nanhringkhō nanhmang joa kae. Mi thatna kani ninga sik nanbinga invei inthai jo chei.

⁶Nangni’n ṭhenakase hei maset nanpek heia nanthat hei khana anmani’n heite ating tor mak hei.

⁷Khava jâra kasōpuihei, Rōngpu ajōngmak kârseng dehrat ruh. Hlei kathlō mipa’n ahleia mankatam sâng akasōk sik kha dehrattak a ahngâk kha enruh. Ama’n ṭhekhō leh zerkhō inchoi sik kha dehrattak a ahngâk a kae.

⁸Nangni’num khang’khan de akahrat sik chei kae. Nan-inhōrna kha inshângtak a da ruh, ajârchu Rōngpu jōngna sik kani kha kahnai jo.

⁹Sōpuihei, Pathen in nanṭong atanmakna sik, inkhat leh inkhat ṭong inneimak ruh! Ṭong katanpa kha hong kahnai jo, ahong inlâr sik a intluk jo.

¹⁰Sōpuihei, Rōngpu rahminga ṭongkahri sânkathemhei kha mandon hei ruh. Anmani kha dehrat leh thōk-hratna tekâk a lo hei ruh.

¹¹Anmani’n andehrat jâra mikahōi niti hei. Job dehratna kha nangni’n nanthei jo, khana achaina Job sik heimo Rōngpu’n apek kha’m nanmanhret. Ajârchu Rōngpu kha maritna leh lum lona akasip kae.

¹²Kasōpuihei, heirakip chunga, nangni ṭong nan-intep pha inhâksêr mak ruh; marvân kapan a, ralei kapan a, heikhat kapan a inhâksêr mak ruh. Nanhnōmna kha “Ôk”, nandana kha “Dâng”, ti hnâm ruh, kha achang inchu nangni Pathen ṭong tanna thōia om mak tin chei.

¹³Nankâra malung inrim aka-om mo? Nantader sik kae. Nankâra a’npâk aka-om mo? Choi ka-ânna hla nantasak sik kae.

¹⁴Nankâra akana aka-om mo? Rōngpu rahminga olive thai inno sik leh akaderpek sik bekrup upahei nantabek sik hei kae.

¹⁵Hiva taksentak a derna hin mikana kha amandam sik, Rōngpu khan antaksa amandam male nôk sik hei, khana aset tlona arangei mandam pek sik hei.

¹⁶Khava jâra nangni inkhat leh inkhat nansetnahei inhri sōttō una, nandam theina sik inderpek ruh. Mikadik derna khan ratha kaneitak a ṭōn atlo.

¹⁷Elijah kha eini leh a’n-anghrep mihring inkhat kae. Ama’n malung kahluttak a khōsûr makna sik ader pha, kum 3 leh thla 6 khava ram a khō leisûr mak.

¹⁸Ama’n khōsûrna sik ader nôk pha marvâna inphut khō jōng kasûra, raleichung in kara amajōr nôk a kae.

¹⁹Kasōpuihei, nankâra mi inkhat akadik a inphut hlam a’nvai jo kha, mihlop inkhat in aheiṭhōi male nôk inchu,

²⁰hivahi mandon ruh: ama’n hlamlea kase mi inkhat aheiṭhōi malea achang inchu khava set katlopa rathla kha thina inphut ahuk sik kae, khana setna katamtak rangei mandamna ajōng rôn sik kae.