Read Komrem PETER INHNINA 1 Bible Online

PETER INHNINA 1 - Komrem bible

PETER INHNINA 1

¹Jesu Christa sonle leh sōk inkhat kachang, Simon Peter in — Ni-Pathen leh Huk inhringpa Jesu Christa dikna vâng keini kapōa mankatam taksenna inkhat apek jo hei hneng kaheimazet kae.

²Pathen leh ni-Rōngpu Jesu nanmanhretna inphut a, maritna leh lung mōngna kha pui katluk a nanta chang rasoh.

³Aṭhat leh alûrna kachen sik a anikabekpa nimanhretna khan, kadik a beklang hringkhōa nihringna sik, nirangei rakip kha Pathen ratha hratna khan apek jo me.

⁴Hing’hin aṭong tepna kutchoi kalen leh mankatam kha apek jo me, hiva kutchoi vânga hin raleichunga inhmang theina madu rangeia inphut sōksōt theina sik, rathla omngai kha nanhongchen theina sik a kae.

⁵Hiva sik jâra nantaksenna chunga ṭhatna besana sik tak intlo ruh; khan chu nanṭhatna chunga manhretna besa ruh;

⁶manhretna chunga binga insur tor; binga insur torna chunga dehratna; dehratna chunga bek-ôina;

⁷bek-ôina chunga Christian rangeina; rangeina chunga inlungsetna besa ruh.

⁸Hivahei seng hi nantatlo sik a madu hei kae, nangni’n hivahei hi pui katluk a nannei inchu, ni-Rōngpu Jesu Christa manhretnating ratha hrokna leh tlo manhnakna nantanei sik kae.

⁹Tâk-kha tu achang inum hihei kaneimak mi khachu ahmit kachoa akahla hmutor mak khan chu hmalaia ansetna mantheng jo hei kha amahngia kae.

¹⁰Khava jâra, kasōpuihei, Pathen bekna chei leh akadeina chei kha manhret ṭhak achangna sik tlochet ruh; kha nangni’n nantlo’nchu, nantaksenna kha dahlon hêrmak jo tin chei.

¹¹Khang’khan ni-Rōngpu leh ani kahuk inhring Jesu Christa kumsôt Rengram hlutna sik pui katluktak ratha kha a’npek sik chei kae.

¹²Khava jâra nangni’n nanta manhretsa achang inum, khana nantachen jo akadik a khan kahnettak a nan-om joa achang inum, hihei hi nanmahngi makna sik ahei tik a kahei hri ṭhak sik.

¹³Khava sik jâra kei kahring lai seng hivahi nanmandonsōt ṭhakna sik kaheirakôk ṭhak sik chei rōk hi, kei sik akadik kae tia kamandon.

¹⁴Ni-Rōngpu Jesu Christa’n inchêntak a amanthei jo eng dungjuia, hiva a’nhmang sik kataksa hi kadahlonloi sik jo ti hi kamanhret.

¹⁵Khava jâra kei kathisō kahnunga hiva chungchâng ṭong hi, pha rakip a nanmandonsōt thei ṭhakna sik ahlam kha torchena manhmuna sik chei kaleitlo sik a kae.

¹⁶Ni-Rōngpu Jesu Christa ratha kaneitak a ajōng sik ṭong kanhrina chunga hin syemsōt thuhming chunga keini in-ngai mak ung, kanhmit khet in alenna kha kantahmu kae.

¹⁷Pa Pathen in achunga lûrna leh kajana apek lai, Akalûrpena inphut rasa kajōnga, “Hivahi ka-Sapa marit kae, achunga kamalung katlai!” atilaitak khan keini khava hmun a leika-om unga kae.

¹⁸Keini ama leh tlâng intheng chunga kan-omsap lai, marvâna inphut hiva rasa kajōng hi keini khet in kantheia kae.

¹⁹Khava jâra sânkathemhei ṭong leihri manthangle kha eini sik kakhe chet a taksenna ka-om jo. Nangni hinahin nanmalung hlutna sik kaṭhadet nantatlo sik kae, ajârchu khōvârmak kârseng leh nanmalung shunga jîngkâr vârpa avâr mak kârseng khō inthim hmun a thaihmei tasat manvâr kapō kha hivahi kae.

²⁰Achung chôna hivahi manhret ruh, Ṭong intheng shunga sânsōt ṭong inkhat minu-mipa tûte’n arachama hrimanchên tor mak.

²¹Ajârchu sânsōt sik ṭong kha mihring lungdoa inphut hongsōk phungmak, tâk Rathla Intheng in mihei chunga ṭōn atloa Pathena inphut akajōng ṭong kha antasânsōt kae.