Read Komrem PETER INHNINA 3 Bible Online

PETER INHNINA 3 - Komrem bible

PETER INHNINA 3

¹Kaṭhōn marit hei, hivahi vōi 2 tlukna kaheimazet chei kae. Chithi 2 hei shunga hihei hripekna chei vâng hin malung inthengtak kha nanneitheina sik mathokna kaheinei chei kae.

²Hmalaia sânkathem intheng hei ṭonghri kha leh, huk inhringpa Rōngpua inphut ṭongpek nansonlehei tapek chei kha nantamandonsōt sik ke’n kamadu.

³Ahma inkeipena, kani hnung intongting mi ṭhahrep, anbing tamadu leh tarangei in athlim hei ho’nlâr sik hi nantamanhret sik kae. Anmani’n sem antlo sik chei

⁴khana ander sik chei, “Ama ahe’nle nôk sik a, ṭong aleitep changmak mo? Khō jo hmen? Nipa-nipuhei leikathi jo hei, tâk heirakip ralei insyembia inphut tûn katlung angangaia ka-om ṭhak!” anti sik.

⁵Hmalai Pathen ṭongpek a marvân leh ralei insyem hi anmani’n antadon mak mông kae. Ralei hi tuia inphut tui in aleisyem

⁶khana tui in, tuishâng kalen khan ralei marō kha aleisuk manhmang.

⁷Khana tuna ka-om marvân leh ralei hichu hmei vâng suk manhmang theina sik, Pathen ṭong mama khan aṭhen a ada kae. Anmani kha bekṭong kaneimak hei ṭong tanna sik kani ning suk manhmang sik a ada a aṭhen jo hei kae.

⁸Tâk-kha kaṭhōn marit hei, hiva inkhat hi mahngi mak ruh! Rōngpu hmit-hmua chu ni khat rōk leh kum lishing khat a’n-ang makna heite om mak; ama hneng chu khava 2 kha a’n-angtling kae.

⁹Rōngpu kha aṭong tepsa chunga insum tia, mi ṭhahrep in antamandon kapōa inranga tlosōt mak, khava kanek a ama’n amadosōt pek chei kae, ajârchu tu inkhat inhmang sik madu mak, tâk mi rakip in ansetna inphut anhei inhe theina sik amadu kae.

¹⁰Tâk-kha Rōngpu Kani khachu inru kapōa kajōng sik. Khava kani ning khan chu marvânhei hi rasa inhring nguingui pum a inhmang sik hei, marvâna kutsyem kakâng sik heia kha inhmangpet sik jo hei.

¹¹Hing’hin neinâk seng hi a’nhmangsō sik jo jâra, heikhong khova mi mo aleikachang sik jo chei? Nanhringkhō nanta mantheng sik khana Pathen hneng nantapek sōt sik kae,

¹²Pathen Kani nangni’n nanhngâk lai khana inranga ajōngna sik nantlo theina chen nantlona shunga, khava Kani ning khan marvânhei kakângpet sik khana inhmangsō sik, khana marvâna kutsyem hei seng akalum in amanjorpet sik hei,

¹³Pathen intepna kha eini’n nihngâk: Akadik pui tlukna hmun, marvân ther leh ralei ther kha.

¹⁴Khava jâra kaṭhōnhei, khava Kani nanhngâk lai, Pathen hmit-hmua ṭhenakase a’nthengseng changna sik, khana ama leh kamōnga omtheina sik nantorchena tak intlo ruh.

¹⁵Nisōpui marit Paul in Pathen tapek singna kha ahmanga aheimazet chei kapōa khan, hukmanhring nanchen theina sik apek chei pha kaṭha shunga ni-Rōngpu thōk-hratna chei kha enruh.

¹⁶Ama’n achithi mazetna rakip hiva ajâr hi ahri kae. Achithi mazetna shunga khan a’nhret mak hei leh malung kahnetmak he’n Ṭong intheng teihmun ṭhahrep heia antatlo kapōa, dik loa hri manchênna antanei ṭong intak ka-om hei. Khava jâra anbinga insuk inhmangna anheirônsōt a kae.

¹⁷Tâk-kha kaṭhōnhei, nangni chu, hi manhretdek ruh. Dân kaneimak mi kaṭhōi inhmak he’n hlam kaletting anṭhōi makna sik chei, khan chu, nanngirhmun kahnet a inphut nantlûk makna sik inhrung thei ruh.

¹⁸Tâk-kha ni-Rōngpu leh ani kahuk inhringpa Jesu Christa manhretna leh maritnating khang ṭhak ruh. Tûnum ahei tik a’m ama lûrna changṭhak rasoh! Amen.