Read Komrem JOHN INKHATNA 2 Bible Online

JOHN INKHATNA 2 - Komrem bible

JOHN INKHATNA 2

¹Kasahei, nanset makna sik a kaheimazet chei kae; tâk tu mo inkhat in setna atlo’nchu Pa hneng ani kahri pek sik Jesu Christa akadik inkhat kha ninei.

²Khana niset inthengna kha Christa ama khet kha kachang jo, einihei setna rōk changmak, tâk mi rakip setna kha’m kae.

³Pathen ṭongpek kha nijui inchu, ama nimanhret jo ti hi inchên.

⁴Ama kamanhret jo kati hei, tâk aṭongpek chu juilo hei kha malei kaseihei kae khana anhnenga akadik kha om mak.

⁵Aṭong kajui rakip khachu Pathen anlungsetna kha kadiktak a pui antamathluk jo kae. Hing’hin eini Pathen leh inlôikhôm me ti hi inchên tor:

⁶khachu, Pathena ka-om ṭhak eng kati hei kha’n, Jesu Christa taleitlo kapōtak a akahring sik hei kae.

⁷Kaṭhōn marit hei, hiva ṭongpek kaheimazet chei hi ather changmak; a’nphutbia nantaneisa ṭongpek marō kha kae. Ṭongpek marō khachu nanta leitheisa jo kha kae.

⁸Achang ravâng, tuna kaheimazet chei ṭongpek hichu ather kae, ajârchu hiva dikna hi Christa leh nangni shunga inhmua kae. Ajârchu khō inthim kha kathlengsō jo, vâr kadik kha hong kavâr joa kae.

⁹Vâra ka-om ung kati hei, tâk ansōpuihei chu aka-en kadahei kha, tûn katlunga hin khō inthim shunga alaka-om hei kae.

¹⁰Ansōpui inlungset hei kha vâra aka-om hei kae, khana anmani’n tûte inkhat setna antlâkna sik ṭōn tlomak hei.

¹¹Tâk-kha asōpui ka-en kada mi khachu, inthim shunga aka-om kae; inthim thōia kalôn hei khana khon mo akase hei manhret mak hei; ajârchu khō inthim in anhmit amanjîng pek heia kae.

¹²Kasahei, nanhnenga kaheimazet kae, ajârchu Christa jâra nansetnahei rangei mandam jo chei kae.

¹³Pahei, nanhnenga kaheimazet kae ajârchu a’nphutbia aleika-om ama kha nangni’n nanmanhret joa kae. Khangdônghei, nanhnenga kaheimazet kae ajârchu nangni’n Akaṭhamak Inkhat kha nantor joa kae.

¹⁴Kasahei, nanhnenga kaheimazet kae, ajârchu nangni’n Pa kha nanmanhret a kae. Pahei nanhnenga kaheimazet kae, ajârchu a’nphutbia aleika-omsa ama kha nanmanhret a kae. Khangdônghei, nanhnenga kaheimazet kae, ajârchu nangni nanratha kangar; Pathen ṭong kha nanshunga ka-om, khana Akaṭhamak Inkhat kha nangni’n nantor jo.

¹⁵Raleichung leh raleichung ta kachang neinâk rakip madu mak ruh. Nangni’n raleichung hi nanmadu’nchu, Pa kha lungset mak chei.

¹⁶Ralei ta kachang seng, taksa tarangei, mihei tahmu leh tamadu, khana raleichunga mihring inlensakna neinâk rakip, hihei seng hi Pa inphut akajōng changmak hei, raleichunga inphut ajōng kakōn hei kae.

¹⁷Raleichung leh ashunga ka-om mihring tamadu seng hi ala’nhmang sik hei kae, tâk Pathen lungdo katlo mi kha ahei tik a akahring ṭhak sik kae.

¹⁸Kasahei, a’nchaina sik kahnai jo! Christa kadōipa ajōng sik ṭong nangni anleimanthei jo chei; tûn Christa kadōi katamtak ho’nlâr jo hei, khava jâra a’nchaina sik pha kahnai jo ti hi nimanhret.

¹⁹Hiva mihei hi eini inloikhômna mi changmak hei, khava jâra andahlon jo me; eini rup-mi anleichang inchu nihnenga aleika-om sik hei kae. Tâk-kha anmani inkhatbek eini rup-mi changmak hei ti hi a’nchên theina sik a anmani kasesōt jo hei.

²⁰Tâk-kha nangni’n Christa tajōng bun mathlâk Rathla Intheng kha nantaleichen jo achang jâra, akadik kha nankhenga nanmanhret a kae.

²¹Khana nanhnenga kaheimazet hichu akadik kha nanmanhret mak jâra changmak; nanmanhret jâra leh akadik a inphut maleisei heitikchena sōk phungmak ti nanmanhret dek jo jâra kae.

²²Khan chu malei kasei kha tu jo mo? Khachu Jesu kha Messiah changmak kati kha kae. Khava mihei kha Christa kadōihei kae, anmani’n Pa leh Sapa kha hnōm mak hei.

²³Ajârchu Sapa kahnōm mak mi khan Pa kha’m ahnōm mak kae, Sapa inhlâng mi khan Pa kha’m arahlâng kae.

²⁴Khava jâra a’nphutbia nantaleithei ṭong kha nanmalunga da ngerna sik tlo ruh. Khava ṭong kha nan-indaṭhak inchu Sapa leh Pa inchunna shunga akahring ṭhak sik chei kae.

²⁵Khana hiva kumsôt hringna hi Christa khan eini pek sik a ṭong aleitep jo kae.

²⁶Nangni hōnmathlâk sik anikarei hei chunga hivahi ke’n kaheimazet kae.

²⁷Tâk-kha nangni sik a chu Christa’n arathla Intheng kha nanchunga ajōng bun mathlâk jo. Arathla khan nanmalunga a-omlai seng, nan-inthei sik tûte rangei mak. Ajârchu arathla khan heirakip amanthei sik jo chei, khana ama tamanthei chei kha akadik kae, akadik mak changmak. Rathla mantheina chei kha jui una Christa leh inchun a omṭhak ruh.

²⁸Kadik, kasahei, ama leh inchun a omṭhak ruh, kha achang inchu, ama ahon’lâr ajōng ning Kani khan pui katluk inngamna kha ninei sik khana ahmai kunga inphut inzak a inthup sik kha rangei mak ning.

²⁹Christa kha akadik kae ti nanmanhret; kha achang inchu akadik katlo rakip kha Pathen sahei kae ti hi nantamanhret sik kae.