Read Komrem JOHN INKHATNA 5 Bible Online

JOHN INKHATNA 5 - Komrem bible

JOHN INKHATNA 5

¹Tu achang inum Jesu hi Messiah kae tia akataksen kha Pathen sa kae; khana pa inkhat inlungset mi khan asa kha’m alungset a kae.

²Hina inphut Pathen sa nilungset hei ti hi nimanhret: khachu Pathen nilungsetna leh aṭongpek nijuina vânga kae.

³Ajârchu Pathen ṭongpek nijui hi Pathen nilungsetna kha kae. Khana aṭongpek-hei kha eini sik a a’ntakrei changmak,

⁴ajârchu Pathen sa rakip in vânhnōi hi antatorthei jo kae. Khana eini’n taksen vâng vânhnōi hi nitor jo kae.

⁵Vânhnōi ralei hi tu’n mo ator sik? Jesu kha Pathen Sapa kae tia akataksen mi rōk khan ator sik kae.

⁶Jesu Christa kha atui hlutna tui leh athina thisen leh inṭhōia akajōngpa kha kae. Ama tui leh rōk akajōng changmak, tâk tui leh thisen akoptōa akajōng kae.

⁷Hinahin sâkhi 3 ka-om hei:

⁸Rathla, tui, khana thisen hei hi kae; khana an-inthuma a’n-anghrep sâkhi kha anpek.

⁹Eini’n mihring sâkhi pek nitaksen; tâk Pathen sâkhi pek kha akangarchet kae; hiva sâkhi hi Pathen in Sapa chunga apek kae.

¹⁰Khava jâra Pathen Sapa kataksen rakip in anmalunga hiva sâkhi hi annei; tâk Pathen kataksen mak hei kha’n ama kha malei kasei amanchang; ajârchu Pathen in Sapa chungchânga ahrina kha taksen mak heia kae.

¹¹Khava sâkhi kha hi kae: Pathen in kumsôt hringna apek jo me, hiva hringna hi asapa a inphut ahong kasōk kae.

¹²Tu achang inum Sapa kanei rakip in hiva hringna hi anei jo; tu achang inum Sapa kaneimak mi khan hringna kha neimak.

¹³Pathen Sapa akataksen nangni’n kumsôt hringna nannei jo ti nanmanhret theina sik hivahi kaheimazet kae.

¹⁴Eini’n Pathen hmaikunga inngamna ninei, ajârchu Pathen lungdo dungjuia heirakip eini’n nider inchu ama’n athei pek sik me ti nimanhret manchênna kae.

¹⁵Eini’n nider akaia ama’n athei pek me; hivahi kadik ti nimanhret jâra eini’n nider rakip kha apek me ti hi’m nimanhret a kae.

¹⁶Nang in nasōpui inkhat set-tlo nahmua, aset tlo kha thinathei katluk achangmak inchu, hringna kapek sik Pathen hneng naderpek sik kae. Hivahi thina setna akatlomak hei sik a kae. Tâk-kha thina katluk setna ka-om, khava sik a derpek ruh kati chei changmak.

¹⁷Akadik mak ṭōntlo rakip setna kae, tâk thina katluk a akaṭhōi mak setna ka-om.

¹⁸Pathen sa inkhatbek in setna tlomanjôn mak jo ti eini’n nimanhret, ajârchu Pathen Sapa khan akahuk hei khana akaṭhamak inkhat khan suk manset tor mak hei.

¹⁹Akaṭhamak Inkhatpa vairônna thōia vânhnōi ralei pumpui hi a-om inum eini chu Pathen ta me kae ti hi eini’n nimanhret.

²⁰Eini’n akadik Pathen kha nimanhretna sik, Pathen Sapa kha kajōnga manhret theina apek jo me ti hi eini’n nimanhret. Asapa Jesu Christa leh inchunna shunga, Pathen kadik leh inchun a eini akahring me kae. Hivahi Pathen kadik kha kae, khana kumsôt hringna kha kae.

²¹Kasahei, akadik mak Pathena inphut nanbinga inhrung thei ruh!