Read Komrem ṬONGKATANHEI 1 Bible Online

ṬONGKATANHEI 1 - Komrem bible

ṬONGKATANHEI 1

¹Joshua thisōa Israel he’n RŌNGPU hneng ṭong anleider, “Keini kâra tu rup inmo Canaanhei chunga hmapenna re avakasō sik?”

²RŌNGPU’n amasôna ati, “Judah phung in hmapenna kase sik. Anmani ratha hnōia ram kha kapek jo hei kae.

³Judah mihe’n Simeon mihei hneng anti, “Keini chen ramṭhen a khan vase rih, eini intho me sona Canaanhei re vatuk rih. Khava sōa nangni ramṭhen shunga kase nôk sik me.” Khava jâra Simeon

⁴leh Judah phunghei inthō heia re leikakōn hei. RŌNGPU’n Canaan leh Periz mihei chunga torna apek hei, khana Bezek a mi 10,000 re antor hei.

⁵Khava hmun a khan Adonibezek anhmua achunga re anleitlo.

⁶Ama leikatlânsōt, tâk anhnonga anleisur khana akutpui hei khana akepui hei anlei tanpek.

⁷Adonibezek in ati, “Reng 70 hei ankutpui leh ankepui kaleitan he’n kabusâk bang kadokhâng thōia anleihrut. Anhnenga kataleitlo kha Pathen in kei hneng phu ahlō jo eng kae.” Ama Jerusalema anheiṭhōia khan kathi jo.

⁸Judah he’n Jerusalem chunga re antloa anhlō jo. Ami seng antha hei khana khōpui kha hmei anleiro.

⁹Hivasōa tlângram ka-om, tlângkea, tlâng tinga ram kachâra, Canaanhei chunga re anleitlosa.

¹⁰Kiriath Arba tia’m a’nhret, Hebron khōpuia ka-om Canaanhei chunga re antloa kae. Khava khan Sheshai, Ahiman khana Talmai inti phunghei antor hei.

¹¹Khana inphut Judah he’n Debir khōpui chunga re anvatlo, khava pha Kiriath Sepher tia le’nhret.

¹²Ankâra Caleb intipa khan ati, “Kiriath Sepher kahlōtor mipa hneng kasanu Achsah anuhmei sik kapek sik.”

¹³Caleb naipa Kenaz sapa Othniel in khōpui kha ahlō jo, khava jâra Caleb in asanu Achsah kha lu amanhông jo.

¹⁴Luhông ning Othniel in amanu kha apa hneng ramhâng derna sik amathok. Amanu ashakōrtung chunga inphut heikaṭum, Caleb in ahnenga heimo namadu aleider.

¹⁵Amanu’n amasôn, “Ke’n tuikhur ajing kamadu. Napek eng ram kha ram chârna kae. Khava jâra Caleb in chung leh hnōia tuiripût apeksa hei.

¹⁶Moses terpu sōn leh pârhei, Ken mihei khana Judah mihei leh inṭhōia kahno thing kekna khōpui, Jerichoa inphut Judah ram Arad thlang tinga ramhâng shunga leikase hei. Khana khan Amalek-hei kâra khō ansât a ka-om hei.

¹⁷Judah hei kha Simeon hei leh inchun a kase heia Zephath khōpuia ka-om Canaanhei re anvator hei. Khōpui kha anhâksêra, ansuk manhmang, Hormah tia anphō jo.

¹⁸RŌNGPU’n Judah hei a’nthōpui hei khana tlângram kha anhlō jo. Tâk-kha Gaza, Ashkelon leh Ekron, ankimvea aka-om ramṭhen seng leh leihlō mak hei. Hiva tuipanga ka-om mihe’n thir shakor gâri annei, khava jâra Judah he’n hnongsōt tor mak heia kae.

²⁰Moses’n aleihri dungjuia, Anak phungṭhen 3 khōpuia inphut a akahnong sōt, Caleb hnenga Hebron kha inpek jo.

²¹Benjamin phung mipui he’n Jerusalema aka-om Jebush-hei leihnongsōt mak hei, khana inphut Benjaminhei leh Jebush tuning katlunga Jerusalema laka-om sōm heia kae.

²²Ephraim leh Manasseh phung he’n khava lai Luz anta leiti Bethel khōpuia re anvatlo. RŌNGPU’n a’nthōpui hei. Khōpuia khan mi ka-en inthlip anleitir hei,

²⁴khōpuia inphut pase inkhat ahei kasōk anhmua ander, “Khōpuia hlutna sik hlam namanthei ung roh, suk manrim mak che ni’ung.”

²⁵Khava jâra ama’n amanthei hei, khana Ephraim leh Manasseh he’n khōpuia ka-om mi rakip, hiva hlam intheipa leh a-innshung mi tei loa, anthatpet heia kae.

²⁶Hiva mipa hin hnunga Hit-hei ram a vakasea khōpui inkhat asyem, Luz tia aphō, tuning katlung arahming lakae.

²⁷Manasseh phung he’n Beth Shan, Taanak, Dor, Ibleam, Megiddo khana khava hnenga ka-om khōpui heia mihei kha leihnongsōt mak hei; Canaan mihei kha khana khan ka-om ṭhak hei.

²⁸Israel he’n ratha anhong neichet pha, Canaanhei kha rumhrat a anṭōn anmantlo hei, tâk leihnongsōt dekmak hei.

²⁹Ephraim phung he’n Gezer khōpuia ka-om Canaan mihei leihnongsōt mak hei khava khan anmani leh ka-om sōm hei.

³⁰Zebulun phung he’n Kitron khana Nahalal khōpui kalena ka-om mihei leihnongsōt mak hei, khava jâra Canaan he’n anmani leh ka-om sômhei khana Israel he’n rumhrat a anṭōn anmantlo hei.

³¹Asher phung he’n Acco, Sidon, Ahlab, Achzib, Helba, Aphek, khana Rehob khōpuia mihei leihnongsōt mak hei.

³²Asher he’n Canaanhei kha anhnongsōt mak hei jâra anmani leh ka-om sōm heia kae.

³³Naphtali phung he’n Beth Shemes leh Bethanath khōpuia ka-om hei kha hnongsōt mak hei. Naphtali he’n Canaan ram mihei leh ka-om sōm hei, tâk rumhrat a anṭōn anmantlo hei.

³⁴Amoria he’n Dânhei kha tlângrama anhnongsōt heia phairama heimanṭum mak hei.

³⁵Amor he’n Aijalon, Shaalbim khana Heres Tlânga ka-om ṭhak hei, tâk Ephraim leh Manasseh phung he’n anvai rôna thōia anda hei khana rumhrat a anṭōn anmantlo hei.

³⁶Sela sak tinga, Edomhei ramri kha Akrabbim rakanna kha apetana kae.