Read Komrem ṬONGKATANHEI 10 Bible Online

ṬONGKATANHEI 10 - Komrem bible

ṬONGKATANHEI 10

¹Abimelech athisōa, Dodo tupa, Pua sapa, Tola intipa kha Israelhei masōsōtna sik a kahong. Issachar phung shunga inte, Ephraim tlângram Shamir a leika-om.

²Ama’n kum 23 Israelhei hlamkakei le’nṭang. Ama kathia Shamir a anhre jo.

³Tola athisōa Gilead a inphut Jair kahong. Kum 22 Israelhei hlam aleikei hei.

⁴Ama’n sapase 30 anei hei, shakōrtung 30 anchōng. Gilead ram khōpui 30 annei, tuning katlung Jair khō tia inhret hei.

⁵Jair kathia Kamon a anhre jo.

⁶Israel he’n RŌNGPU kadōia setna antlo nôk jo. Baal leh Astarte, khana Syria, Sidon, Moab, Ammon khana Philistihei pathen limhei ankamuk joa kae.

⁷Khava jâra Israel chunga RŌNGPU ahnuk kana jo, Philisti leh Ammonhei amanhlō hei.

⁸Kum 18 shunga Ammon leh Philisti he’n Gilead a Jordan Tuidung nisōtinga Amorhei ram a aka-om Israelhei kha khōdeng anmanthei hei, ansuk manrim hei.

⁹Ammon he’n Judah, Benjamin khana Ephraimhei re tukna sik a Jordan kapha anhei rakanna kae. Israel kha inrengna aleithōk hêr.

¹⁰Khava sōa Israel he’n RŌNGPU hneng ka-ông heia anti, “Keini’n nang kadōia kaset jo ung, kan-Pathen nang kandahlon chea Baal kanlei kamuk jo.”

¹¹RŌNGPU’n hiva masônna hi apek hei: “Egypt, Amor, Ammon khana Philisti

¹²Sidon, Amalek, khana Maon he’n hmalai nangni khōdeng anleimanthei chei, nangni’n kei hneng ka-ông chei. Anmania inphut hukmak chei eng mo?

¹³Tâk-kha tûn katlunga nandahlon enga, Pathen ralak nankamuk hei, khava jâra avea hukmak jo chei ning.

¹⁴Nangni’n nanta madu pathenhei hneng se una vader ruh. Nangni’n khōdeng nanthei pha anmani’n huk chei rasoh.”

¹⁵Tâk-kha Israel he’n RŌNGPU hneng anti, “Keini’n setna kantlo jo. Namadu chenna tlo roh, tâk lungsettak a, tuning ahuk roh.”

¹⁶Israel he’n ram hlop pathenhei kha andahlona RŌNGPU kha ankamuk jo; khana Israelhei inrengna chunga ama kachâm joa kae.

¹⁷Khava sōa Ammon remihei kha re sik a intluk hei khana Gilead a rephōr ansyem jo. Israel mipui he’n hong intûp heia Gilead a Mizpah khan rephōr anmatung jo.

¹⁸Khana khan mipui leh Israel hlamkakeihei kha inbek heia, “Ammonhei leh re intukna hin tu’n mo hlam akei sik? Tu achang inum hlamkakei kha Gilead a mi rakip hlamkakei akae sik kae,” anti.