Read Komrem ṬONGKATANHEI 11 Bible Online

ṬONGKATANHEI 11 - Komrem bible

ṬONGKATANHEI 11

¹Gilead a Jephtha intipa kha mikahrâng tak remi kae, noti inkhat sapa kae. Apa Gilead khan

²anuhmei leh sapase ralak um anei hei, anhonglen pha Jephtha hi rumhrat tak a inn anmandahlon jo. Anmani’n ahnenga anti, “Nang chu nipa karōi inkhatbek chenthei mak tin; nang chu nuhmei hlop sapa che kae.”

³Asōpui heia inphut Jephtha kha katlâna Top ram a ka-om jo. Khava hmun a mikasehei amantûp heia, kalôn lele heia kae.

⁴Pha bongkhat sōa Ammon he’n Israelhei chunga re anheitlo jo.

⁵Hivahi asōk pha, Gilead hlamkakei he’n Top a inphut Jephtha anjōng bek jo.

⁶Anmani’n anti, “Ammonhei leh re intukpui torna sik a hong inna kanhlam hongkei roh.”

⁷Tâk Jephtha in amasôn hei, “Nangni’n kei nanmater enga rumhrat tak a kapa inn nanta mandahlon eng kae. Nangni nanchâm pha leh heisik a mo tûn kahnenga akahong chei?”

⁸Anmani’n Jephtha hneng anti, “Tûnchu nahnenga akahong ung hi kae, ajârchu nang keini leh a’nṭhōi mea Ammonhei re nitlo sik khana Gilead a mi rakip hlamkakei nachangna sik a kanmadu jo che.”

⁹Jephtha in anhnenga ati, “Kei hi Ammonhei leh re intuk sik a naniṭhōi malea RŌNGPU’n re animantor inchu, nangni hlamkakei akachang sik eng kae.”

¹⁰Anmani’n anmasôn, “RŌNGPU’n nisâkhi kae.”

¹¹Hing’hin Gilead hlamkakeihei leh inṭhōi jo hei, khana mipui he’n anhlam kakei anvaikarôn anmanchang jo. Jephtha’n Mizpah a RŌNGPU ângkunga amadu arangei akhenga ahrisōt jo.

¹²Jephtha’n Ammonhei rengpa hneng mi atir heia amanti hei, “Heisa mo keini na’nnâkpui ung? Heisa mo kanram re natlo?”

¹³Ammonhei rengpa’n tirlehei hneng hing’hin amasôn hei, “Israel he’n Egypt a inphut anheisōk pha Arnon Tuidunga inphut Jabbok Tuidung leh Jordan Tuidung katlung anhlō jo. Tûn kadai hnenga nantapek male sik eng kae.”

¹⁴Jephtha’n Ammon rengpa hneng tirle atir male nôk heia

¹⁵hiva ṭong masônna hi amanhri hei, “Israel he’n Moab ram leh Ammonhei ram anhlō ti kha dikmak.

¹⁶Akasōk kha hinga kae: Israel in Egypt aheidahlon pha Agaba tuikekâk a nêrdiram anpetana Kadesh a ka-om hei.

¹⁷Khava sōa anmani’n Edom rengpa hneng mi antira aram shung anhro theina sik a hnōm pekna anleider. Tâk Edom rengpa khan leihnōm pek mak hei. Anmani’n Moab rengpa hneng ander nôk, tâk ama’num hnōmpek dekmak hei. Khava jâra Israelhei kha Kadesh a ka-om jo hei.

¹⁸Khava sōa anmani nêrdiram kase hei, Arnon Tuidung rekhat a, Moab nisōting anhongtlung mak hma seng, Moab leh Edom ram kha anvea kae. Khana khan rephōr ansyem, tâk Arnon chu rakan mak hei ajârchu khavakha Moab ramri kae.

¹⁹Khava pha Israel he’n Heshbonna Amor rengpa Sihon hneng tirlehei antira anram tlungna sik a ama ram petanna sik hnōm pekna ander.

²⁰Tâk Sihon in Israelhei kha aram leimanpe tan mak jo hei. Aremi rakip aheiṭhōi heia, Jahaz a rephōr ansyema, Israelhei abuhlu jo hei.

²¹Tâk RŌNGPU Israelhei Pathen khan Sihon leh aremihei chunga Israel amantor jo hei. Khava jâra khava ram aka-om Amorhei ramṭhen pumpui Israel he’n karōia anhlō jo.

²²Israel he’n Amorhei ram pumpui thlanga Arnon a inphut sak a Jabbok katlung khana nisōa nêrdiram inphut tlaitlâk a Jordan katlung anhlōsō jo.

²³Khava jâra ami Israelhei sik a Amorhei kahnong sōt kha RŌNGPU, Israel Pathen kha kae.

²⁴Khavakha lo male nôk sik a a’ntluk che mo? Na-pathen Chemosh tapek che rakip kha nadathei sik. Tâk keini chu RŌNGPU, kan-Pathen tapek ung rakip kha kantada sik kae.

²⁵Nang hi Moab rengpa Zippor sapa Balak kanek a akaṭhachet a indon che mo? Ama’n Israelhei leidōilo hêra, aleitlo nâk mo? Keini chunga re aleitlo mo?

²⁶Israel he’n Heshbon leh Aroer, khana akimvea khōpui khana Arnon tuipanga khōpuihei seng kum 300 katlunga anleihlō joa kae. Khahei seng shunga heisa mo naleilo male mak?

²⁷Changmak, nahnenga heite akadik mak tlomak eng. Nang in kachunga re natlo hi dikmak. RŌNGPU kha ṭongkatan kae. Tuning Amorhei leh Israelhei kâra ama’n ṭong mathlâkna anei sik.”

²⁸Tâk Ammonhei rengpa’n Jephtha ṭong manrôn kha heite leisak mak a kae.

²⁹Khava sōa Jephtha chunga RŌNGPU rathla jōng kachua kae. Ama Gilead leh Manasseh ahroa Gilead ram Mizpah a hong inle khana Ammon a kase jo.

³⁰Jephtha in RŌNGPU hneng intepna inkhat aleinei, “Nang in Ammonhei namantor eng inchu,

³¹ke’n retorna inphut kahong inle pha, kei inhmupui sik a ka-innshunga inphut ahei kasōk masa pen kha ro-inthoina katōksōt sik,” ati.

³²Hing’hin Ammonhei leh re intuk sik a Jephtha tuihre kake jo, khana RŌNGPU’n re amantor jo.

³³Ama’n anmani kha Aroer a inphut Minnith kimve katlunga akhenga khōpui 20, khana Abel Karamim katlunga athat jo hei. Mi katamtak thatna leika-om jo, Ammonhei kha Israel he’n anleitor jo hei.

³⁴Jephtha Mizpah a ahe’nle pha, ama inhmupui sik a asanu kha kalâma khōngte asuk manhring pum a heikasōk. Amanu rōk kha asanei kae.

³⁵Ama’n asanu ahmu pha inrengtak a apōnsi akei hlera ati, “O-ah, kasanu! Kamalung namakhōi jo. Heisa mo kamalung kōina hi nangkhet akachang sik jo che? Ke’n RŌNGPU hneng intepna kanei jo, ke’n keimale tor mak jo eng!” ati jo!”

³⁶Asanu khan ahnenga ati, “RŌNGPU hnenga na’ntep jo achang inchu, RŌNGPU’n na’nrepuihei Ammonhei chunga phuhlōna amannei jo che jâra khan, kei chunga namantluk kha tlo jo roh.”

³⁷Tâk amanu’n apa hneng ader, “Kei sik a inkhat rōk hichu atlopek roh. Kaṭim kare hei leh tlâng chunga kanse leh kei hi nuhngâk intheng inkhat a kathi sik chunga inrimna pha kahmang sik a, thla 2 chu apek roh.”

³⁸Ama’n sena sik a ṭong apek a thla 2 sik a atirsōt jo. Amanu leh aloihei inṭhōi heia tlâng chung heia kaketou hei khana ṭajai suina anneia kae, ajârchu ama chu luhôngloa sa neiloa akathi sik jo kae.

³⁹Thla 2 atluksōa apa hneng hong inle jo. Ama’n RŌNGPU hneng ale’ntepna kha atlosōt jo, khana asanu kha nuhngâk intheng changpuma kathi jo. Hivahi Israelhei omchen inphutna kae,

⁴⁰akum katai Israel nuhngâk he’n Gilead a Jephtha sanu mandonsōtna ṭajai suina sik ni 4 vânga kasōk sik heia kae.