Read Komrem ṬONGKATANHEI 12 Bible Online

ṬONGKATANHEI 12 - Komrem bible

ṬONGKATANHEI 12

¹Ephraim he’n re katlo sik a intluk hei; anmani’n Jordan tuidung anrakana Zaphon ting kase hei, khana Jephtha hneng anhri, “Heisa mo Ammonhei re tlona sik a keini leh inṭhōina sik manthei loa ramri narakan? Khava jâra na-inn hi naluchunga hmei kanro khum sik che!” anti.

²Tâk Jephtha’n anmani hneng ahri, “Kei leh kami he’n Ammonhei leh inrena inhnaktak kanleinei. Kabek chei, tâk anmania inphut ahuksōt mak chei.

³Nangni nanse mak kha kahmu pha ke’n kahringkhō kaphesōt a, ramri kha karakan, khana RŌNGPU’n anchunga torna apek eng. Heisa mo tûn kei leh inre sik a ahong kakōn chei?”

⁴Khana Jephtha’n Gilead mi rakip aheiṭhōi heia, Ephraimhei kha a’ntukpui jo hei, khana ator jo hei. (Ephraim he’n anti, “Nangni Gilead mihei, Ephraim leh Manasseh ram a inphut akatlânsōt chei kae!”)

⁵Ephraimhei tlânsōt kha tingna sik a, Jordan rakanna hmun rakip kha Gilead he’n anhlōpet jo. Ephraim mi inkhat in tlânsōt sik a rakan theina ader hei pha, Gilead mihe’n ander sik, “Nang Ephraim mi che mo?” Ama’n, “Changmak eng,” ati’nchu,

⁶anmani’n mipa hneng “Shibboleth” tia aṭongsōtna sik anmanthei sik. Tâk-kha ama’n “Sibboleth” aheiti sik, ajârchu hivahi inchênna hrisōt tor mak a kae. Khan chu, ama kha ansur sik jo khana Jordan rakanna hmun inkhat a ama kha anthat sik jo. Khava pha, Ephraim mi 42,000 anthat heia kae.

⁷Jephtha’n kum 6 Israelhei aleiching hei. Khava sōa ama kathia akhōpui Gilead a anleihre.

⁸Jephtha athisōa Bethlehema Ibzan in Israel aleirôn hei.

⁹Ama’n sapa 30 khana sanu 30 anei hei. Ama’n asanuhei kha phunglak-hei hneng inn amannei hei khana asapahei nuhmei sik a phunglak jōr 30 alopek hei. Ibzan in kum 7 Israelhei chunga vai aleirôn.

¹⁰Khava sōa ama kathia Bethlehema anhre.

¹¹Ibzan sōa Zebulun phunga Elon in Israelhei kum 10 aleiching hei.

¹²Khava sōa kathia Zebulun ramṭhen a Aijalona anleihre.

¹³Elon sōa Pirathona Hillel sapa Abdon in Israelhei aleiching hei.

¹⁴Ama’n sapa 40, tupa 30, shakōrtung 70 kachōng anei hei. Abdon in Israelhei kum 8 aching hei,

¹⁵khava sōa kathia Amalek-hei tlângram Ephraimhei ramṭhen a Pirathona khan anhre jo.