Read Komrem ṬONGKATANHEI 13 Bible Online

ṬONGKATANHEI 13 - Komrem bible

ṬONGKATANHEI 13

¹Israel he’n RŌNGPU dōina ṭōnse antlo nôk jo, ama’n kum 40 Philistihei anchunga vai amanrôn hei.

²Khava lai khan Zorah khōpuia inphut Manoa inti mi inkhat leika-om. Ama Dan phunga mi kae. Anuhmei kha sa neiloa akaching kae.

³Amanu hneng RŌNGPU ngeva inkhat jo’nlâra ahri, “Nang sa nei hêrmak jo che, tâk-kha inranga nai navon sik a kha sapa inkhat nanei sik kae.

⁴Ju a-emak leh juthlum a-emak leh akabōk neinâk sâk makna sik intluk roh;

⁵khana sapa namatetsō leh asam navo mak sik kae, ajârchu ama a’ntetbia inphut Pathen hnenga nazir sik a tōksōt sik kae. Ama’n Israelhei kha Philistihei, kut a inphut huksōtna aphut sik kae.”

⁶Nuhmeinu kha kasea apuise hneng avahri, “Pathen mipa inkhat kahnenga kajōng, ahme kha Pathen ngeva apō, ni-ena ṭit ka-om, khona inphut akajōng mo dermak eng, arahming um ahri pek mak.

⁷Tâk ama’n kahnenga nai kavon sik khana sapa inkhat kanei sik tia amanthei eng. Ama’n ju a-emak leh akabōk heite samakna sik amanthei eng, ajârchu pasenai kha ahring lai seng Pathen hnenga nazir inkhat a tōk sik kae ati.”

⁸Khava sōa Manoa khan RŌNGPU hneng ader, “Lungsettak a, RŌNGPU, nang in najōngtir Pathen mipa kha kanhnenga hong inle nôk rasoh, pasenai a’ntet pha heikhonga sik mo amanthei rasoh.”

⁹Manoa derna kapōa Pathen in atlopek jo, nuhmeinu kha hleia ale’ntunglai ama ngeva kha ahnenga hong inle jo. Apuise Manoa chu amanu hnenga leiom mak,

¹⁰khava jâra amanu inrangtak a apuise hneng katlâna, “Enroh! Ni khat kahnenga akajōng mipa kha kahnenga jo’nlâr nôk jo,” ati.

¹¹Manoa kathōia anuhmei kahnung ajui. Mipa hneng kasea ader, “Kanuhmei hnenga ṭongkahri kha nang che mo?” “Ôk,” tia amasôn.

¹²Khava sōa Manoa’n ader, “Nahri hei hi ahongdik pha, pasenai hin heimo atlo sik? Heikhong hringkhō mo ahmang sik?”

¹³RŌNGPU ngeva khan amasôn, “Ke’n nanuhmei hnenga kamanthei seng kha ajui nger sik kae.

¹⁴Amanu’n vomhrui rahōna a’nvei heite asâk mak sik kae; ju leh akabōk heite asâk mak sik kae. Kamanthei rakip atlo nger sik kae.”

¹⁵Manoa’n RŌNGPU ngeva kae tia leimanhret mak khava jâra ahnenga ati, “Lungsettak a semak hi roh. Nang sik a keini’n kemōngte inkhat heisōng hi rung.” Tâk ngeva khan ati, “Ka-om inum nathlai chu sâk mak ning. Namantluk hnōm inchu RŌNGPU hnenga inthoina inkhat a tōk roh.”

¹⁷Manoa in amasôn, “Naṭong hei hi ahongdik pha leh keini’n kajana kanpekna sik che, narahming amanthei roh.”

¹⁸Ngeva khan ader, “Hei sik a mo karahming namanhret hnōm? Hivahi rahming inlak kae.”

¹⁹Khava jâra Manoa in kemōngte leh hmuchi ṭhahrep aloa, ṭōn-inlak katlosōt RŌNGPU hnenga hlung chunga maichâma atōk jo hei.

²⁰Maichâma inphut hmeikhu chungting ake pha, RŌNGPU ngeva kha marvânting hmeimale kâra akake kha Manoa leh anuhmei in anleihmu. Khantō khan Manoa’n RŌNGPU ngeva kae tia amanhret jo, khana ama leh anuhmei in anhmai thōiting raleia an-ena inbok jo hei. Anmani’n ngeva kha avea hmu nôk mak jo hei.

²²Manoa’n anuhmei hneng ati, “Eini akathi nger sik me kae, ajârchu eini’n Pathen nihmu jo!”

²³Tâk-kha anuhmei in amasôn, “RŌNGPU’n aleithat hnōm me achang inchu, eini inthoina kha rahlâng mak ning; hihei rakip hi amanhmu mak ning khana tuna ṭonghei kha amanthei mak ning.”

²⁴Nuhmei khan sapa inkhat aneia arahming Samson tia aphō jo. Naite kha hong kakhanga RŌNGPU’n vângṭhat abepek jo.

²⁵Khana Zorah leh Eshtaol kâra Dan hei rephōra a-omlai RŌNGPU rathla khan rathahrat ahei pek manphut jo.