Read Komrem ṬONGKATANHEI 14 Bible Online

ṬONGKATANHEI 14 - Komrem bible

ṬONGKATANHEI 14

¹Ni khat Samson hi Timnah khōa kasea, khana khan Philisti nuhmei inkhat aleihmu.

²Inna hong inlea anu leh apa hneng ati, “Ke’n Timnah khōa Philisti nuhmei inkhat kahmu, amanu so kamadua kae. Kei sik a avader pek ruh; ama ka-ompui hnōm,” ati.

³Tâk anu leh apa’n ahnenga ander, “Heisa mo sova pathen ka-oimak Philistihei hnenga nuhmei kader sik a akase sik che? Niphungṭhen kâra, nimi rakip kâra, nuhngâk hmutor mak jo che mo?” Tâk Samson in apa hneng ati, “Kei sik a amanu so kamander hnōm che. Amanu kamadua kae.”

⁴RŌNGPU’n hivahi Samson amantlo kae tia anu leh apa’n manhret mak hei, ajârchu RŌNGPU’n Philistihei chunga re tukna sik a ahlam ajong kae. Khava lai khan Israelhei chunga Philisti he’n vai anleirôna kae.

⁵Khava jâra Samson kha anu-apa leh inṭhōia Timnah ting kase hei. Ama’n Timnah hei vomhrui hlei laia anselai shabakkai atele inkhat a’nhrung rasa athei.

⁶Khava laitak khan Samson kha RŌNGPU’n ratha hratna amannei jo, shabakkai kha kete inkhat athat kapōa akut vâng rōk akei rachen jo. Tâk ama tatlo hi anu leh apahei hneng chu manthei mak.

⁷Khava sōa ama kasea nuhngâk hnenga ṭong avahri, khana amanu kha amadua kae.

⁸Pha bongkhat sōa Samson in amanu luhôngpui sik a kase nôk. Ahlam sena inphut shabakkai athatsa kalōng kha ava-en, khana akathisa shabakkai taksa shunga khōi aleikakaia anhning ajing um aleika-om kha avahmua inlak asak jo.

⁹Khōihning kha aloa akut a achoia asepuma aleisâk jo. Khana anu leh apa hneng kasea ajijing apek hei. Anmani’n anleisâk, tâk-kha Samson in khōihning kha shabakkai akathisa shunga a’nlosōt kae ti khachu leiman theimak hei.

¹⁰Samson apa kha nuhngâknu inna kase, khana Samson in sâktlâng atlopui hei. Hivahi khangdônghei chônngai inkhat kae.

¹¹Philisti he’n Samson anhmu pha, ama ka-ompui sik rether 30 anheitir hei.

¹²Samson in anmani hneng ati, “Ke’n ṭongsai insikna der chei rong. Hiva ṭongsai insikna hi luhông revei bângna sik ni 7 mak hma nanhri tor mak inchu nangni inkhat et in rōipōn innem leh pōn kaṭha inkhat et nantapek sik eng kae.” “Naṭongsai chu hri jo roh. Rangei jo rih,” anti.

¹⁴Ama’n ati, “Mihring kasethatpa a inphut sâk thei kasōk; “Akahratpa a inphut akathlum kasōk, heimo?” Ni 3 shunga ṭongsai kha masôn tor mak jo hei.

¹⁵Nimanli ning Samson nuhmei hneng ander, “Napuise ṭongsai hi naman theina sik unga nang in hōn inna der roh. Kha achangmak inchu napa inn leh nang um hmei vâng kanro manhmang sik che. Nangni 2-in karōi kasutna sik hrep a revei nantabek ung kae, changmak a?”

¹⁶Khava jâra Samson nuhmei in ahnenga hmit-rathli pum a ahri, “Nang in kei alungset mak che! Nahōt eng! Kaloihei hneng ṭongsai nahri kha kei chu heitina mo amanthei mak che!” Ama’n ati, “Enroh, hiva ṭongsai hi kanu leh kapa hneng um kahri mak kae. Heisik a mo nahnenga kahrisōt sik?”

¹⁷Amanu’n rehōi ni 7 shunga kaṭap a ka-om jo. Ni 7 tluk ning chu amanu hneng amanthei jo, ajârchu rahnaktak ader joa kae. Khava sōa Philistihei hneng amanthei jo hei.

¹⁸Khava jâra ni 7 tluk ning, Samson in a jena den a ahlutmak hma khōpuia mihe’n ahnenga anti, “Khōihning kanek a akathlum heimo kae sik? “Shabakkai kanek a akahrat heimo kachang sik?” Samson in amasôn heia, “Kasehrat rala vâng hlei nankhōi mak inchu, Tûn katlunga’m amasônna nantamanhret mak sik kae.”

¹⁹Khavatak a khan RŌNGPU rathla’n amanhrat a, ama Ashkelona vakase, khana khan mi 30 athat heia anpōnsi kaṭhahei kha achom heia aṭongsai insôn tor hei kha apek heia kae. Khava sōa, a-innting inle jo, omchen kasōk jâra ahnuk kana hêr jo,

²⁰khana anuhmei kha’m aluhông ninga ama ṭhōn inṭangpa hneng anleipek joa kae.