Read Komrem ṬONGKATANHEI 15 Bible Online

ṬONGKATANHEI 15 - Komrem bible

ṬONGKATANHEI 15

¹Pha bongkhat sōa gehu ât laitak Samson kha anuhmei kaphâk a leikase khana kete inkhat aleikei. Aterpu hneng ati, “Kanuhmei innden a kahlut hnōm eng.” Tâk-kha aterpu’n leimanhlut mak.

²Ama’n Samson hneng ati, “Ke’nchu nanuhmei kha namater khet jo kae katia, naṭhōnpa hneng kaleipek jo. Tâk, heirakip a, anainu hi ahme akaṭhadet kae. Ama hi nachen thei sik.”

³Samson in ati, “Tûnlaia Philistihei chunga ṭōnse katlona hi ke’n themmô chenmak ning!”

⁴Khava jâra ama ram thōia kasea ram-ui 300 avasur hei. Inhni ṭima anrahmei akhit manmat, akhit manmatna et a khan hmeiser hlom inkhat et amakheia kae.

⁵Hmeiser hloma hmei amansûk a ram-uihei kha Philistihei sâng hlei laia amasō hei. Khang’khan ansâng ât hei rōk changloa la-ât lo hei leh olive rahōn he’m kakang jo hei.

⁶Philisti he’n hivahi tu tatlo mo tia anjong pha, Timnah khōa ka-om aterpu’n Samson nuhmei kha aṭhōnpa hneng apek sōt jâra, Samson in atlo kae ti anmanhret jo. Khava jâra Philisti he’n anuhmei leh apa inn hmei vâng anro manvâm jo.

⁷Samson in amanthei hei, “Nangni tatlo kha hinga kae jo! Nanchunga hiva phu kahlō mak kârseng bângmak ning, kei intep eng!”

⁸Ama hnuk kana tak a ahlō heia mi katamtak athat jo hei. Khava sōa ama kasea Etama karekōk inkhat a inthup a ka-om jo.

⁹Philisti he’n kahong heia Judah ram a rephōr ansyema, Lehi khōpui chunga anbuhlu jo.

¹⁰Judah he’n ander hei, “Heisa mo kanchunga re nanta hongtlo?” Anmani’n anmasôn hei, “Samson kasura, ama’n atlona ung kapōhrep a tlona sik a, akahong ung kae.”

¹¹Khava jâra Judah mi 3,000 Etama ka-om tlâng karea kase heia Samson hneng anvahri, “Philistihei hi eini chunga vaikarônhei kae ti hi manhret mak che mo? Eini sik a heipen mo natlo jo?” Ama’n amasôn heia, “Anmani tatlona eng dungjuia ke’num katlo hei kae.”

¹²Anmani’n anti, “Anmani kut chunga pekna sik a, nang kakhit sik a akahong ung kae.” Samson in ati, “Nangni khet in that mak che ning tia inhâksêr ruh.”

¹³Anmani’n anti, “Kaṭha jo, keini’n nang kankhit hnâm sik che, khana anmani hneng kanpek sōt sik che. Keini’n that mak che ni’ung.” Khava jâra anmani’n hrui therpet 2 vâng ankhit a tlâng karea inphut anhei ṭhōisōt jo.

¹⁴Lehi anheitlung pha Philistihei ahneng langting ka-ông heia, heikatlân inhlut hei. Manhret manloa RŌNGPU ratha’n hratna apek a, abân leh akut a a’nkhit hrui hei kha hmei vâng a’nrotanpet kapōa akeitan jo.

¹⁵Khava pha ama’n shakōrtung alakathibi makharu inkhat ahrut a khan vâng khan mi 1,000 avōkthat jo hei.

¹⁶Khava jâra Samson in hranhla asak, “Shakōrtung inkhat makharu vâng mi 1,000 kathat hei; Shakōrtung inkhat makharu vâng mi athō-athōa kamanbuk hei.”

¹⁷Khava sōa, makharu kha ahlon jo. Khava omchen sōkna hmun kha Ramath Lehi tia anphō.

¹⁸Hivasōa, Samson atui kahre hêr jo, ama’n RŌNGPU hneng ader, “Nang in hiva torna kalentak hi napek enga, tûn tuihre dang kachâra akathi sik jo eng mo, bekna kaneimak Philisti he’n antasur sik jo eng mo?”

¹⁹Pathen in Lehia khan ralei khur kōk inkhat amavea tuisam amanpût pek jo. Samson in khava tui a-ina kahlimdet a athei jo. Khava jâra tuiripût kha Hakkore anti, tuning katlung Lehia laka-om.

²⁰Philisti he’n ram kha vai anleirônlai Samson in Israelhei chunga kum 20 aleiching hei.