Read Komrem ṬONGKATANHEI 16 Bible Online

ṬONGKATANHEI 16 - Komrem bible

ṬONGKATANHEI 16

¹Ni khat Samson in Philisti khōpui Gaza a vakase, khana khan notinu inkhat a’ntōpuia rakhum a’nchunpui jo.

²Gaza mihei khan Samson kha khana khan ka-om ti anmanhret a khava hmun kha ankakebit jo. Khana khōpui kalen kot khan jân kathang anleihngâk jo. Anmani kangamtak a ka-om hei, anbinga anmandon, “Khō ahong vâr katlunga nihngâk sik, khana ama nithat sik.”

³Tâk Samson chu rakhum shunga jânṭim katlung rōk leika-oma kae. Ama kathōisōt a khōpui kalen sōngkot a, kot chopuihei, akirna hei leh akhengpet a akapotsōt a kae. Khahei kha adâra arôn heia Hebron khōpui hnenga hmebung bilik katlunga arôn mankepek jo hei.

⁴Hivasōa, Samson in Sorek Phaichama mi Delilah inti nuhmei inkhat, amalungset jo.

⁵Philisti reng he’n nuhmei hnenga kase heia anti, “Heisa mo Samson in ratha aneihêr, heikhonga mo nisura, nikhit a ratha nimannei mak sik, hōnmathlâk inna manhrisōt roh. Keini inkhat et in dangka 1,100 kanpek sik che.”

⁶Khava jâra Delilah in Samson hneng ati, “Hei-inmo hingtuk a ratha amannei che amanthei roh. Mihe’n ankhit hnōm chea ratha neiloa andahnōm che’nchu, heikhonga mo antatlo sik?”

⁷Samson in amasôn, “Saihrui 7, alakachâr mak vâng anikhit inchu, mihring inkhat kapōa katlasam sik jo eng.”

⁸Philisti reng he’n Delilah hneng saihrui alakachâr mak 7 anhongchoi, Delilah’n khan vâng khan Samson akhit jo.

⁹Mi ṭhahrep innshung den inkhat a amanthup hei, khana amanu ka-ônga, “Samson! Philistihei kahong jo hei!” ati. Tâk saihrui hei kha, hmei in pat-hrui akângtan kapōa, intan jo hei. Khang’khan ama ratha hratna in-ip kha manhret sōt mak jo hei.

¹⁰Delilah’n Samson hneng ati, “Enroh, kahnenga akadik nahri mak jâra, mi invet nasyem jo eng. Mihe’n heikhonga mo antakhit tor sik che, lungsettak a amanthei roh.”

¹¹Ama’n amasôn, “Hrui katherpet mi’n antalahmang hêrmak vâng annikhit inchu milak kapōa katlasam sik eng.”

¹²Khava jâra Delilah’n hrui katherpet vâng Samson akhit nôk jo. Khava sōa amanu ka-ônga, “Samson! Philistihei kahong jo hei!” ati. Mihe’n innden ahlop a anleihngâk a ka-om hei. Tâk abâna ankhitna hrui kha pat rajang kapōa akeitan jo.

¹³Delilah’n Samson hneng ati, “Tûn katlung akadik nahri mak jâra, invet a nasyem jo eng. Mihe’n nang heikhong mo antakhit tor sik che amanthei roh.” Ama’n amasôn, “Kasam hi pher saria pher ina chopui inkhat a khit roh. Milak kapōa katlasam sik jo eng.”

¹⁴Delilah’n ama kha a jena sik a a-ôia, asam kha hlom saria aphera kae. Amanu’n chopuia akhit manchet a ka-ônga, “Samson! Philistihei kahong jo hei!” ati. Tâk ama kathōia asam inkhit kha aphoisōt jo.

¹⁵Khava jâra amanu’n ati, “Heikhonga mo nang in kei kalungset che nati, natinatak inhret loa? Vōithumtak invet nasyem jo eng, tûn katlung hei-inmo amanhrat hêr che ahri pek mak che.”

¹⁶amanu’n ahnenga ani katai aderṭhak jo. Khava chungchânga amanu’n ahnenga adei kathok jâra ama kha malung inhângna anei jo,

¹⁷achaina chu ama’n akadik kha ahrisōt jo. “Kasam hi eptet mak eng,” ati. Ka-intetbia inphut nazi inkhat a Pathen hnenga anleitōksōt jo eng. Kasam hi ni-ep inchu kahratna inhmang sik khana milak-hei kapōa katlasam sik jo eng.”

¹⁸Delilah in akadik amanthei jo eng tia a’nhret jo pha, Philisti renghei hneng ṭong atira ahri, “Vōi khatbek chu hong inle hi ruh, ama’n akadik amanthei jo eng.” Khava pha sêr anheichoia kava jo hei.

¹⁹Delilah in Samson kha arakō chunga a-ôi manjea, pase inkhat abek a Samson sam ahlom saria a’npher kha a-eptan jo. Khava sōa chu amanu’n ama hneng asuk karâk jo, ajârchu aratha nei kha katlasuk jo.

²⁰Khan chu amanu ka-ông jo, “Samson! Philisti kahong jo hei!” Ama heikathōia amandon, “Ahei tik a kapōa, kei insangsōt sik eng khana kasesōt sik eng,” ati. Pathen in adahlon jo khachu leimanhret mak a kae.

²¹Philisti he’n ansura ahmit ankhersōtpek jo hei. Gaza ting ankeia, sum-êng hrui vâng ankhit a kurkhum a hlung chakria ṭōn anmantlo jo.

²²Tâk asam kha avea hong kakhang nôk jo.

²³Philisti renghei kha inhmutō heia an-pathen Dagon kamukna rōi nitna leh inthoina kalentak tōkna anleineia kae. Anmani’n hla ansak a, “Nipathen in nikadōi Samson chunga retorna apek jo me!” anti.

²⁴Anmani kahōi inpâk jo heia anti, “Samson kha heibek ruh, ama’n rehōi atlopek rasoh!” Kurkhum a inphut Samson kha anheikeisōt pha, anmani sik a rehōi anleimantlo khana kacho 2 kâra anlei man ngira kae. Mipui he’n ama anhmu pha an-pathen choi ka-ânna hla anleisak, “Kankadōipa, kanram kasuksetpa, khana keini mi katamtak anikathatpa kha kan-pathen in amantor jo ung!”

²⁶Akut amatua akakei naipangpa hneng Samson in ati, “Innpui karôn kachohei matu hei rong, inngaina kanei hnōm hei.”

²⁷Innpui kha nuhmei-pase kasip a leika-om hei. Philisti reng 5 ankhenga khana khan ka-om hei, nuhmei-pase 3,000 kapō innphu chunga Samson in rehōi atlopek hei kha aka-enna ka-om hei.

²⁸Khava pha Samson in vōi khat lim chu ader a ati, “Akahrat chunghnung RŌNGPU, lungsettak a ahei mandonsōt roh; kahmit 2 ankhersōt jâra, Philistihei hi hiva vōi khat kanokna hin kasuk manram torna sik a, Eh Pathen, lungset a vōi khatbek chu kahratna kha ahei pek roh.”

²⁹Khava jâra Samson khan innpui karôn alaia chopui 2 kha akut a amantu jo hei. Kacho inkhat et a akut inkha-khat ada heia, anam jo hei.

³⁰khana ka-ônga, “Philistihei leh kei thisap jo rung,” ati! Aratha nei rakip vânga anam mathlûk joa reng 5 hei leh aka-om rakip hei, chunga innpui kha hong kachimkhōi jo. Samson in ahring laia mi athat kanek a athi ninga athat katam jôk a kae.

³¹Ama naipa hei leh a-innshung seng in akalōng kaloa kahong hei. Anmani’n anchoi malea Zorah leh Eshtaol kâra apa Manoa thlânna anhre jo. Samson in kum 20 Israelhei aleiching hei.