Read Komrem ṬONGKATANHEI 18 Bible Online

ṬONGKATANHEI 18 - Komrem bible

ṬONGKATANHEI 18

¹Khava lai khan Israel a reng leiom mak hei. Khava laitak khan Dan he’n ram hlō sik a anjōnga kae, ajârchu anmani hi Israel phunghei kâra ram leichenmak heia kae.

²Khava jâra Dan he’n anphunga innshung rakip a inphut rahōi kasōk pase 5 ankadei hei, khana Zorah leh Eshtaol khōpui heia inphut ram ka-en inthlip sik a antirsōt hei. Anmani Ephraim tlângram anheitlung pha, Micah inna leikatlung hei.

³Khana khan an-omlai, Levi retherpa karesō kha anmanhret jo, khava jâra ama hneng kase heia ander, “Hin nang heimo natlo? Tu’n mo hin aheiṭhōi che?”

⁴Ama’n amasôn heia, “Kei Micah leh ṭōn mantlukna kanei, ama thempu changa ṭōn katlona sik a hlō apek eng kae.”

⁵Anmani’n ahnenga anti, “Keini kanhlam hrona hme kantasō sik mo Pathen hneng aderpek roh.”

⁶Thempu khan amasôn hei, “Nanmalung dongna sik heite om mak. RŌNGPU’n nankhōhme sena hin athlop chei.”

⁷Khava jâra mi 5 he’n ama andahlona Laish khōpuia kase jo hei. Khava hmun a mihei kha Sidonhei kapōa kahōia anka-om kha anvahmu hei. Kamōnga, kadaia aka-om mihei kae, tûte inkhat leh innâk-insena neimak hei; antarangei rakip anneia kae. Sidon heia inphut kahlatak a aka-om hei, jât-hlop tûte inkhat leh inmat mak hei.

⁸Palai 5 he’n Zorah leh Eshtaol a anhei inle pha, heimo anta heihmusōt kha anram mihe’n anleider hei.

⁹Anmani’n anmasôn hei, “Hong ruh, Laish hi buhlu jo rih. Keini’n ram kha kanhmu jo, kaṭha hêr. Hinahin heite tlo loa om mak jo ruh; inrang ruh! Vase me son vahlō jo rih!

¹⁰Nangni sona son nantlung pha, sova mihei son neinâk heikhat chunga inhlamrin makna heite neimak hei ti hi nanhmusōt sik. Sova so ram kalentak kae; mihring inkhat tamadu rakip ka-om, Pathen in nanhnenga apek jo chei kae.”

¹¹Dan phung mi 600 re sik a a’ntluk hei khan Zorah leh Eshtaol andahlon jo.

¹²Anmani kakōn heia Judah ram Kiriath Jearima tlaitlâk a rephōr ansyem jo. Khava jâra ahmun kha tuning katlung Dan hei Rephōr anti.

¹³Khava hmun a inphut kase heia Ephraim tlângram Micah inna katlung jo hei.

¹⁴Khava sōa Laish kimvea ram ka-en inthlip aleikase 5 hei khan anloihei hneng anti, “Hinahin innshung inkhat a thing vânga antasyem lim, dangka vânga a’ntōm, inkhat aka-om so nanmanhret mo? Khana khan limsyem ṭhahrep leh zakkō kabong um ka-omsa hei. Heikhonga mo tlo sik a nantamandon?”

¹⁵Khava jâra Levi rether omna Micah inna kase hei, thempu hneng khan kajōng jo hei. Anmani’n Levi hnenga heikhonga mo alaka-om tia anleider.

¹⁶Khava pha Dan remi, re tlo sik a a’ntluk hei kha, kekot a leikahngir hei.

¹⁷thempu khan re hmangchâk invon mi 600 leh kekot a an-omlai, Ram ka-en inthlip 5 he’n innshunga kahlut hrek heia dangka vânga antakatōm thinga a’nsyem lim leh alak limhei, khana zakkō kabong kha anlosōt jo hei.

¹⁸Mihei khan Micah innshunga neinâk intheng hei anlosōt lai thempu khan ader hei, “Heimo nantatlo jo.”

¹⁹Anmani’n anti, “Sip ti roh. Ṭong inkhatbek hrimak roh. Keini ahei jui roh, kanthempu leh kan-inse vachang roh. Pase inkhat rōk innshunga thempu chang kanek a, Israel mipuihei thempu changhnōm mak che mo?”

²⁰Anṭong hri khan thempu kha inpâk jo, khava jâra neinâk intheng hei kha aloa anmani leh inṭhōia kase jo.

²¹Anmani ankimvea khō anthlira sōk anphut jo, ansahei, anranhei, ankarōihei seng hma anmankei hei.

²²Anmani’n khana inphut hmun kahlajap antlung jo pha, Micah’n insak inthlang hei kha re kakōn sik a aleibek hei. Dan mihei kha anvaphâk jo hei

²³khana an-ôngsan hei. Dan mihei khan hong inhe heia Micah hneng ander, “Heimo kae? Mipuihei hi heisik a mo?”

²⁴Micah’n amasôn hei, “‘Heimo kae’ nantati chu heitina mo?” Nangni’n kathempu leh ka-pathen limhei nan-inloa kase jo chei! Heimo kei sik a nantadahlon aka-om?”

²⁵Dan he’n anti, “Hiva mihei hi anhnuk ahong kana a nang antabuhlu sik che kha namadu mak inchu heite nahri mak sik kha kaṭha jôk. Achangmak inchu nang leh na-innshung mi rakip kathi sik chei.”

²⁶Hivasōa anmani khanga kase jo hei. Micah’n anmani kha ama inrepui sik a kahrat det hei ti ahmua inhea a-innting inle jo.

²⁷Micah ta’nsyem neinâkhei leh thempu kha an-inṭhōi sōa, anmani kase heia mōngna khōpui, mipui daina, Bethrehob phaichama aka-om Laish kha anvabuhlu jo. Khana ka-om hei kha anthat heia, khōpui kha anro jo. Anmani tûte’num hukmak hei, ajârchu Sidon le’m inhlajap hei, mihlop tu inkhat leh inthlop mak hei. Dan he’n khōpui kha athera ansak a anhlō jo.

²⁹Khōpui kha anpusōn Jacob sapa Dan rahming anloa Laish a inphut Dan tia anthleng jo.

³⁰Dan mihe’n limhei kha kamuk sik a anmatung jo hei, khana Moses tupa, Gershom sapa, Jonathan in Dan phung sik a thempua inṭang jo, khana mipuihei kha miram surmi anchang mak hma seng ama sōn he’n anmani thempu le’nṭang heia kae.

³¹Micah limhei kha khava hmun a pha rakip a ka-om ṭhak hei khana Shiloa a Pathen kamukna Pōn-inn kha ka-om ṭhak.