Read Komrem ṬONGKATANHEI 19 Bible Online

ṬONGKATANHEI 19 - Komrem bible

ṬONGKATANHEI 19

¹Israel he’n reng annei mak lai pha shunga, Levi mi inkhat Ephraim tlângram abera leika-om. Ama’n Judah ram Bethlehema anuhmei rabo sik a aleilo,

²tâk amanu kha apuise chunga ahnuk leikana, apa inna inlea thla 4 vaka-om.

³Khava sōa mipa khan akahnung ajuia ahnenga ahei inlena sik vajôr sik a aleimandon. Ama’n shakōrtung 2 leh asōkpa aṭhōi heia leikase. Nuhmei khan Levi kha a-inna aṭhōi manhlut, apa khan ahmu pha, kaṭha aleiralam.

⁴Apa khan ama aka-omchot sik a amanthei, khava jâra ni 3 kachōnga ka-om. Sanghram hei kha ansâk an-ina jân a karek jo hei.

⁵Nimanli ninga jîngkâr hmatak kathōi heia akase sik a intluk jo hei. Nuhmei apa khan Levi hnenga ati, “Heimo inkhat hmatak a sâk hi ruh. Nangni sik a kaṭha sik. Hnunga kasethei sik chei.”

⁶Khava jâra mi 2 hei kha in-ong heia ansâk an-insap jo. Khava sōa nuhmei pa khan ahnenga ati, “Tuning jân um hin kahōia om hi ruh.”

⁷Levi kha akase sik a kangirsōt jo, tâk aterpu’n aka-om sik a ahri jâra jân khat kachōng nôk jo.

⁸Ni 5 ninga jîngkâr hmatak akase sik a aphut jo, tâk nuhmei apa khan ati, “Heikhat sâk hi ruh. Kani inhei det hngâk hi ruh.” Khava jâra mi 2 hei kha ansâksap jo.

⁹Levi leh anuhmei rabonu khana ansōkpa akase sik a anphut pha, anpa khan ati, “Enruh, khōhlei heikatluk vet jo; jân hi rek jo ruh. Inranga khō inthim sik jo; hin om-una kahōia pha hmang jo ruh. Ajînga hmatak nanhlam hrona sik a kaṭhōi sik chei, khana nan-inn nanjōn sik.”

¹⁰Tâk-kha ama khan jân rek sik kha madu mak jo, ama leh anuhmei manbonu khan ansōkpa leh shakōrtung 2 anshapher hei anmankop a se anphut jo. Jebush (khavakha, Jerusalem kae) khō hnenga anheitlung pha khōhlei ting leikae jo, ansōkpa khan akapupa hnenga ati, “Heisa mo hinahin a’nhnga mea Jebush-hei khōpuia hin jân akarek mak sik me?”

¹²Tâk akapu khan ati, “Israel aka-emak mihei khōpui kalena eini inhnga mak min. Eini nirakan sik a kha ajing kasedet sik mea kha Gibeah achangmak leh Rama a jân karek sik me.”

¹⁴Khava jâra Jebush anrakana khanga anhlam anleihro. Anmani Benjamin phunghei ram Gibeah anheiphâk jo pha kani katla jo.

¹⁵Anmani hlam hro kha anbânga khana khan châm inhnga jo hei. Anmani khōpui kalen shunga kahlut heia tetlânga inhnga jo hei, tûte inkhat in khava jân kha innshunga ṭhōi manhlut mak hei.

¹⁶Khana khan anleiom lai, mi kater inkhat hleipuk a aṭōn avatlosōa anhnenga kahong. Ama kha a’nphutbia chu Ephraim tlângram mi kae, tûnchu Gibeah khōa abêra aka-om kae. (Benjamin phunga mi ralak khana khan leika-om hei.)

¹⁷Katerpa khan tetlânga khōhmehei kha ahmu hei khana ader hei, “Nangni khona inphut akajōng chei mo? Khon mo akase sik chei?”

¹⁸Levi khan amasôn, “Keini Judah ram Bethlehema vakase ung, tûn keini Ephraim tlângram shunga kan-inn hlam kajōna akase ung kae. Kan-shakōrtung hei tasâk sik sapôt leh thingbō kanei, kansōkpa leh kanuhmei rabonu khana kei tasâk sik buhlom leh ju kannei inum,

¹⁹jân hi tûte’num inna amathlung mak jo ning. Kantarangei rakip chu kannei.”

²⁰Katerpa khan ati, “Kei inna karalam chei. Ke’n ka-ensui sik chei, tetlânga rek mak ruh.”

²¹Ama’n a-inna aṭhōi heia anshakortung hei avei pek hei. Ama khōhme he’n anke ansôp a bu ansâk jo.

²²Anmani kahōia an-omlai, manhret manloa khōpuia inphut jông leh kîk katlo he’n an-inn kha ankimvea innkot anhei raki jo. Anmani’n katerpa hneng anti, “Nang in naheiṭhōi mipa kha heikeisōt roh! Ama kha kanjepui hnōm!”

²³Tâk-kha katerpa kha vâng heikasōk a anhnenga ati, “Kaṭhōnhei, kha changmak! Lungsettak a! Hiva kapō ṭhatmak, jông leh kîk hi tlomak ruh! Hiva mipa hi kei khōhme kae.

²⁴Enruh! Hinahin ama nuhmei manbo leh kei sanu nuhngâk intheng ka-om hei. Tûn kahei thōisōt sik hei, nangni’n nanchen thei sik hei. Nanta madu chen kha tlo jo paruh. Tâk-kha hiva mipa hnenga chu khava mater ka-om omchen kha atlopek mak ruh!”

²⁵Tâk-kha mihei khan aṭong hri kha rangei mak hei. Khava pha Levi khan anuhmei rabonu kha vânga atirsōtpek jo hei. Jân kathang anjepuia, an-indeina a khōvâr mak hma seng leibâng mak hei.

²⁶Khō ahong vârbup a nuhmeinu kha apuise omna katerpa inna kahonga kot kunga kapûr jo. Kani ahei sōk katlunga khana khan ka-om jo.

²⁷Jîngkâra apuise hong kaṭhōia ahlam hrona sik a kot ahei mahlanga, anuhmei rabonu kha inn hma khan akut in kot langa atinga akajea a-om kha ahmu jo.

²⁸Ama’n ati, “Thōi roh. Se jo rih.” Tâk heite masôn mak. Khava pha ama’n akalōng kha shakōrtung chunga abângsōt a an-innting se aphut jo.

²⁹A-inna atlung pha, innshunga kahlut a chemcha alo jo. Anuhmei rabonu kalōng kha atuktana abong 12 asema Israel phung 12 hei hneng inkhat et amanrôn jo hei.

³⁰Hiva akahmu rakip in anti, “Hiva kapō hi lahmu phung hêrmak me! Israel in Egypt anhei dahlona inphut hinghiva kapō hi lasōk hêrmak! Hiva chunga heimo inkhat chu tlo sik kae! Hivahi heikhong pen sik jo mo?”