Read Komrem ṬONGKATANHEI 21 Bible Online

ṬONGKATANHEI 21 - Komrem bible

ṬONGKATANHEI 21

¹Israel he’n Mizpah a anle’ntûplai, RŌNGPU hneng intepna anleinei: “Benjamin inkhat in eini jōr a-ompui sik eini’n nihnōm mak sik kae.”

²Israel mipuihei kha Bethel a kahong heia RŌNGPU hma khōhlei katlung leika-om hei: kare inshângtak a malung kana tak a ṭajai ansuia ka-om hei:

³“RŌNGPU Israelhei Pathen, hivahi heijâra mo akasōk? Heijâra mo Israel a inphut Benjamin phung a’nhmang sik jo?” anti.

⁴Ajîng kania jîngkâr hmatak mipui he’n khana khan maichâm inkhat ansyem jo, inlôikhômna leh apum a ro-inthoina ṭhahrep annei jo.

⁵Anmani’n ander, “Mizpah a RŌNGPU ângkunga intûpna akase mak rup aka-om hei mo?” (Mizpah intûpna ahong invei mak rup kha that sik kae tia intepna anleineia kae.)

⁶Israel mihe’n ansōpui Benjamin sik a anmalung kachâma anti, “Tuning Israel in aphung inkhat amanhmang jo.”

⁷Pase alaka-om hei sik a nuhmei pekna sik a heimo nitlo sik? Eini’n nisanuhei anmani nuhmei sik a pek yamak tia RŌNGPU hneng intep et jo me.”

⁸Mizpah a intûpna khan Israel kâra rup ṭhahrep akase mak aka-om hei mo tia an-inder pha, Gilead a Jabesh phunga inkhatbek hongmak hei ti anmanhret jo;

⁹remi inteina Jabesh a inphut inkhatbek in masôn mak hei.

¹⁰Khava jâra a’ntûp seng khan mikahrat rōk 12,000 ṭongpek hi leh antir hei, “Nangni se una Jabesh a aka-om rakip nuhmei naipang ṭhenloa vathat hei ruh.”

¹¹Pase leh nuhmei a’nthengmak hei seng chu thatpet hei ruh.

¹²Jabesh mihei kâra nuhngâk intheng 400 anhmusōt hei, anmani kha Canaan ram a ka-om Shilo rephōra anheiṭhōi hei.

¹³Khava sōa mipui intûp hei khan Rimmon Hlungpuia ka-om Benjamin mihei hneng ṭong anmanrôn heia re tlomakna sik anvati.

¹⁴Benjaminhei kha he’nle jo hei, Israel ralak he’n Jabesh nuhngâk antathat mak hei kha anpek jo hei. Tâk-kha anmani sik a nuhmei kha kakip a lachen mak hei.

¹⁵Mipuihei khan Benjaminhei sik malung natna annei jo ajârchu Israel phunghei pumkhat changna kha RŌNGPU’n avōk khōipek jo heia kae.

¹⁶Khava jâra intûpna hlamkakeihei khan antia, “Benjaminhei sik a nuhmei om mak jo. Pase alaka-om hei sik a nuhmei pekna sik a heimo nitlo sik?

¹⁷Israel phung 12 kâra inkhat inhmang yamak ning. Benjamin hringna sik a ahlam inkhat nijongsōt nger sik kae,

¹⁸tâk nisanuhei chu, annuhmei sik a pek sik hi hnōm mak me, ajârchu eini kâra inkhat in asanu Benjaminhei hneng akapek mi khachu nihâksêr joa kae.

¹⁹Anmani’n anmandona anti, “Shiloa kumtin a RŌNGPU revei tlo sik kha kahnai jo.” (Shilo hi Bethel sak ting, Lebona thlang ting, Bethel leh Shechem kâra hlampui nisōting aka-om kae.)

²⁰Benjaminhei hneng anti, “Nangni vomhrui rahōna inthup ruh

²¹khana khō rangei ruh. Shiloa nuhngâk-hei kha revei shunga akalâm sik a anhong pha, rahōna inphut heisōk ruh. Rumhrattak a nangni inkhat et in nuhmei sur hei una Benjamin ram a inṭhōi hei ruh.

²²Khana anpa leh an-u hei nanhnenga anhonga an-inphin inchu, ‘Lungsettak a keini’n inda jo hei rung, ajârchu anmani hei hi re shunga kannuhmei sik a kantachom chei changmak. Khana keini hnenga nantapek ung um achangmak jâra, nan-intepna kha nanvōk khōi inum heite ṭhemak chei,’ ti hei ruh.”

²³Benjamin he’n hing’hin antlo jo, anmani’n Shiloa akalâma akahong nuhngâk ansur heia anṭhōi jo hei. Anramting inle jo hei, ankhōpui ansyem manther nôk a khana khan ka-om jo hei.

²⁴Khana Israel seng in inle heia, ama ama phung leh innshunga khana ankarōi omna kase jo hei.

²⁵Khava lai Israel he’n reng leinei mak hei. Mi rakip in antamadudu anleitloa kae.