Read Komrem ṬONGKATANHEI 3 Bible Online

ṬONGKATANHEI 3 - Komrem bible

ṬONGKATANHEI 3

¹Canaan rea akahlutmak Israelhei enmansinna sik a RŌNGPU’n jât ṭhahrep khat ram a khan adahlon hei.

²Ama’n hiva atlo hi Israel khang rakip a, adek a rehmun a ale’nvei phungmak mihei retlo manchuna sik a kae.

³Khava dahlona aka-om hei kha Philistihei khōpui 5, Canaanhei seng, Sidonhei, khana Baal Hermon Tlânga inphut Hamath Rakanna katlunga Lebanon tlânga ka-om Hivhei kae.

⁴Anmani hi Israelhei enmansinna sik, Moses a inphut anpu sōnhei hneng Moses’n ṭong apek hei kha Israel he’n antajui sik leh antajui mak sik manhretna sik a kae.

⁵Khava jâra Israel he’n Canaan, Amor, Periz, Hiv khana Jebush mihei kâra leika-om hei.

⁶Anmani leh jōr inlotō hei khana anmani pathenhei ankamuk pui jo hei.

⁷Israel he’n RŌNGPU an-Pathen kha anmahngi jo; ama dōina ṭōnse antlo khana Baal leh Asherah limhei ankamuk jo.

⁸Khava jâra RŌNGPU kha Israelhei chunga ahnuk kana jo, khana Mesopotamia ram reng Kushan Rishathaim amantor jo hei, ama’n kum 8 vai arôn hei.

⁹Khava sōa Israel he’n RŌNGPU hneng ka-ông hei, anmani insō sik mi inkhat atir pek hei. Ama kha Caleb naipa Kenaz sapa Othniel kae.

¹⁰Ama chunga RŌNGPU rathla heikachōnga Israelhei hlamkakei hong kae. Ama re leikase, RŌNGPU’n Mesopotamia reng kha aleimantor.

¹¹Ram shunga kum 40 kamōnga leika-om hei, khava sōa Othniel kathi jo.

¹²Israel he’n avea RŌNGPU kadōia setna antlo jo. Khava jâra RŌNGPU’n Moab rengpa Eglon kha Israel kanek a ratha amanhrat chet jo.

¹³Eglon in Ammonhei leh Amalek-hei a’nchunpui hei, Israel re antora Jericho, kahno kung khōpui kalen anhlō jo.

¹⁴Israelhei Eglon thōia kum 18 leika-om hei.

¹⁵Khava sōa Israel he’n RŌNGPU hneng an-ôn, anmani insō sik a mi inkhat ahei tir pek hei. Ama kha Benjamin phunga Gera sapa veitalong, Ehud intipa kae. Israel mipui he’n Ehud kha Moab a Reng Eglon hneng kutchoi leh inṭhōia anleitir.

¹⁶Ehud in centimetre 50 akasei alang hnia akangei chemjâm inkhat le’nvon. Achang tinga akhōna pōn thōia amansura kae.

¹⁷Ama’n Eglon, mi katurtak pa hneng kutchoihei kha avathak jo.

¹⁸Ehud in kutchoihei kha apeksō leh akutchoi manrôn mihei kha innlangting ani’nlena sik amanthei hei.

¹⁹Tâk-kha Ehud chu Gilgal a hlung milim omnating inhea, Eglonting inle jo, khana ava ti, “Akalûr Rengpa, nang sik a rirûk ṭong kahei rôn.” Khava jâra rengpa’n asōk-hei hneng, “Sesōt ruh, kanbing rōk a om rung,” ati. Khana anmani ankhenga kasesōt jo hei.

²⁰Khava sōa, rengpa kha Chunga akadai neng den shunga abinga a-omlai, Ehud ahnenga kahlut a ahnenga ahri, “Pathena inphut nang sik a ṭong inkhat kahei rôn.” Rengpa kha kangirsōt.

²¹Ehud in akhōn changtinga chemjâm kha akut veiting aradok a rengpa vona akadôt jo.

²²Chemjâm kha asung leh akhenga avona kahlut leo jo, athai khan amakhu jo. Ehud in rengpa vona chem kha radok mak, akhōn tinga ake 2 kâra kasōk a kae.

²³Hivasōa Ehud vângting kasōk jo, kot-hei akhara akirkhum hei,

²⁴khana adahlon jo. Asōk akahong hei khan kot a’nkirpet kha anhmua rengpa kha ashunga châm a’nhnga kachang sik tia anleimandon.

²⁵Anmani’n pha kasôttak, khanga anhngâk sō leh, kot kha ahei mahlâng hêrmak jo pha, chabi anloa anmahlâng jo. Khana khan ankapupa kha ṭonglaia leikathi jo.

²⁶Anmani’n khanga anhngâklai Ehud chu kasesōt jo. Hlung limsyem omna apetana Seira a leikatlânsōt jo.

²⁷Ama’n Ephraim tlâng atlung pha, pengkun aleituma Israelhei re katlo sik a aleibek hei; khana ama’n aheikei heia tlânga inphut jōng kaṭumsuk hei.

²⁸Ama’n ati, “Kakahnung ajui ruh! Nangni inrepui Moab-hei chunga RŌNGPU’n torna apek jo chei.” Anmani’n Ehud kha anjuia Moab he’n Jordan anrakanna hmun kha anhlō jo; khavakha tûte inkhat tarakan sik a leihnōm pek mak hei.

²⁹Khava ning Moab remi kaṭhapen 10,000 kapō anthat hei; inkhatbek tlânsōt mak hei.

³⁰Khava ning Israel he’n Moab-hei antor hei, khana khan kum 80 kamōnga khō anleihlō.

³¹Abân hlamkakei kha Anath sapa Shamgar kae. Ama’num Israelhei aleihuk hei, sekhemna rahling sung ahmanga Philistihei 600 athat heia kae.