Read Komrem ṬONGKATANHEI 4 Bible Online

ṬONGKATANHEI 4 - Komrem bible

ṬONGKATANHEI 4

¹Ehud athisōa Israel he’n RŌNGPU kadōia setna anleitlo nôk jo.

²Khava jâra RŌNGPU’n Israelhei kha Canaan rengpa Jabin, Hazor khōpui vaikarônpa amantor jo hei. Ama remi hlamkakeipa kha Sisera kae, ama hi Jât-hlop hei Harosheth inti khōa aka-om kae.

³Jabin in thir shakor gâri 900 anei khana Israelhei chunga êngset leh suk manrim tak a kum 20 vai aleirôn hei. Khava sōa Israel mipui he’n RŌNGPU hnenga inthōpui sik a leikaṭap hei.

⁴Tûn Lappidoth nuhmei Deborah kha sânkathem kae, khava lai Israelhei chunga ṭongkatan inkhat a ṭōn aleitlo.

⁵Amanu hi Ephraim tlânga Bethel leh Rama kâra kahno kung thōia in-ongri, khava hmun a Israelhei kha aṭong mathlâkna inngei sik a kase ri hei.

⁶Ni khat Naphtali ram Kedesh khōpuia Abinoam sapa Barak kabek sik a mi atir hei khana hinga ati, “RŌNGPU Israelhei Pathen in hiva ṭongpek hi apek che: Zebulun leh Naphtali remi 10,000 Tobor tlâng ting ṭhōi hei roh.

⁷Ke’n Jabin remi hlamkakeipa, Sisera kha nang leh re intuk sik a Kishon tuidung panga kaheiṭhōisōt sik. Ama shakor gârihei leh remi katamtak anei hei, tâk achunga torna kapek sik che.’”

⁸Barak in amasôn, “Nang in na’nṭhōipui sik eng inchu kei kakōn sik eng, nang in na’nṭhōi puimak sik eng inchu kei kōntor mak ning.”

⁹Amanu’n amasôn, “Kaṭha jo, kasepui sik che, tâk khava torna rahming ṭhatna kha nang in lothei mak tin, ajârchu RŌNGPU’n Sisera kha nuhmei inkhat hneng apek sōt sik kae.” Khava jâra Deborah kha Kedesh langting Barak leh inṭhōi jo hei.

¹⁰Barak in Naphtali leh Zebulun phunghei Kedesh a abek heia mi 10,000 in ama kahnung anleijui. Deborah ama leh inṭhōi hei.

¹¹Khava pha Kenit mi Heber in Zanannim a sasōkung hnenga Kedesh inhnaitak a apōn-inn aleimatung. Ama hi Moses terpute, Hobab sōn leh pâr, Ken jât ahlop inkhat a inphut akasōksōt jo mi kae.

¹²Barak kha Tabor tlâng heikatlung jo ti ṭong hi Sisera’n athei pha,

¹³ama’n thir shakor gâri 900 leh ami rakip abek heia, Jât-hlop hei Harosheth a inphut Kishon tuidunga atir jo hei.

¹⁴Khava sōa Deborah’n Barak hneng ati, “Se roh, RŌNGPU’n hlam akei che! Tuning Sisera chunga torna apek jo che.” Khana Barak in Tabor Tlânga inphut ami 10,000 hei leh kasesuk jo.

¹⁵Barak in abuhlu pha RŌNGPU’n Sisera kha ashakor gâri leh ami senghei inhmakna apek jo hei. Sisera kha ashakor gâria inphut he’nchoma akea katlân jo.

¹⁶Barak in shakor gârihei leh remihei kha Jât-hlop hei Harosheth inti katlung ahnong hei, Sisera remi rakip athatsō hei. Mi inkhatbek kahringa damak.

¹⁷Sisera kha Ke’n mi Heber nuhmei Jael pōn-inna katlân inhlut jo, ajârchu Hazora Reng Jabin leh Heber innshung kâra inchamna leika-oma kae.

¹⁸Jael intinu kha Sisera inhmupui sik heikasōk. Khana ahnenga, “Heihlut roh, apu; kapōn-innshunga heihlut roh; ṭitmak roh,” ati. Ama pōn-inn shunga kahlut jo, khana amanu’n pōnzâr thōia athup jo.

¹⁹Ama’n amanu hneng, “Katui kahre, lungsettak a tui apek roh,” ati. Amanu’n shavun penga inda sene amahlânga aman ina athup nôk jo.

²⁰Amanu kha amanthei, “Pōn-inn kot a ngir roh, tu mo inkhat ahonga hin mi aka-om mo tia aderche’nchu, om mak ti roh.”

²¹Sisera kha kachâm reia kaje hnger jo. Jael in hembung leh uchup aloa, marûk a ahnenga kasea, uchup kha angambea ralei leh ahem manhlut pek a athat jo.

²²Barak in Sisera ahei jōng pha, Jael in Barak intō sik a heikasōk a ahnenga ati, “Hin hong roh! Nami jongpa kha kamanhmu sik che.” Ama khan amanu ajuia, khana khan Sisera kha ralei ṭōnglaia amachea uchup inlinga kathia leika-om jo.

²³Khava ning Pathen in Canaan reng, Jabin chunga torna kha Israel apek jo hei.

²⁴Anmani’n ama kha anthatmak kârseng atak chunga annam manhnak det-det a kae.