Read Komrem ṬONGKATANHEI 5 Bible Online

ṬONGKATANHEI 5 - Komrem bible

ṬONGKATANHEI 5

¹Khava ning Deborah leh Abinoam sapa Barak in hiva hla hi anleisak:

²RŌNGPU kha choi ka-ân ruh! Israel he’n re tlona sik a intluk jo hei; mipuihei inpâktak a inpek sōt hei.

³Renghei rangei ruh! Vaikarônhei rangei ruh! Hla kasak sik, mahring kanei kamanhring sik RŌNGPU Israelhei Pathen ângshunga.

⁴Eh RŌNGPU Seir tlânga naheidahlon pha, Edom ramkeia inphut niheisōk pha, Simlei innok, bōirōk a inphut khō jōng kasûr. Kadik, sumtuk a inphut khōtui ajōng bun.

⁵Sinaia RŌNGPU ângkunga RŌNGPU, Israel Pathen ângkunga.

⁶Anath sapa Shamgar pha shunga, Jael pha shunga, Sharîngsei rup leh khōhme kase inlâr tor mak. Sharîngseia invei katlo he’m ram shung petan mak jo hei, khōhme kalônle he’m asir tinga hlam anjui jo.

⁷Israel khōpuihei dahlona ka-om jo hei, Eh Deborah; nang nahong mak hma seng Israel sik a nu inkhat kapōa.

⁸Israel he’n pathen ather ankadei pha, ram shunga re leikasōk, Israel mi 40,000 hei mi inkhatbek in pho leh kasei anta leichoi mo?

⁹Kamalung hi Israel rehlam kakeihei chunga leh mipui sik a inpâktak a a’npek sōt mihei chunga ka-om. RŌNGPU kha manpâk ruh!

¹⁰Shakōrtung kabang shapher chunga kachōnghei, khana hlam kahro sik nangni nansena hmuntina, hiva ṭong hi hripek hei ruh

¹¹Rangei ruh! Tuikhur hnenga mipui rasa katamtak kachōr he’n RŌNGPU torna kha anhri, Israel mipuihei torna kha! Khava sōa RŌNGPU mipui he’n ankhōpui heia inphut jōng kaṭumsuk heia hong injôk hei.

¹²Hlam kei roh, Deborah, hlam kei roh! Hlam kei roh! Hla sak roh! Hlam kei roh! Hmating nam roh, Abinoam sapa Barak, Natasur hei kha ṭhōisōt hei roh!

¹³Khan chu taksen ka-om hei kha anhlam kakeihei hnenga kahong hei; RŌNGPU mihei kha re katuk sik intluktak a, ahnenga kahong hei

¹⁴Ephraim a inphut phaichama kahong hei. Ephraim a inphut phaichama, Benjamin leh amihei kahnunga. Rehlam kakeihei kha Machira inphut jōng kaṭum hei ṭōnpui karônhei khan Zebuluna inphut jōng kaṭum hei.

¹⁵Issachar a hlamkakei he’n Deborah leh inṭhōia kahong hei; kadik, Issachar leh Barak um kahong hei, anmani’n phaicham katlung anleijui. Tâk Reuben phung chu inṭhensōt hei; anmani hong sik a mandon tor mak hei.

¹⁶Heisa mo anmani kemōng rup-hei kâra aka-om hei? Kemōng kakhemhei kemōng bek rasa inngei sik a mo? Kadik, Reuben phung inṭhensōt hei; anmani hong sik a mandon tor mak hei.

¹⁷Jordan nisōting Gad phung ka-om hei, khana Dân phung, rakōng hnenga ka-om hei. Asher phung tui-ôngpui panga ka-om hei, anmani tui-ôngpui pang dunga ka-om hei.

¹⁸Tâk-kha Zebulun leh Naphtali mihei, rehmun a thi leh nat anthōk a ka-om hei.

¹⁹Taanach a Megiddo tuikōk hnenga, reng kahong heia re antuk; Canaan reng he’n re antuk, tâk dangkahei chu leichom mak hei.

²⁰Ârsi he’n thangvâna inphut re antuk; thangvân kha anpe tanlai, Sisera dōina re antuk.

²¹Kishon tuidung kalen in atlen jo hei, tuitlân inhnak Kishon tuidunga khan. Ke’n rahnaktak a hmating kanama kanamsôn sik!

²²Khava sōa shakor hong inchôm hei, anke pha khan raleia ankatat a.

²³RŌNGPU ngeva khan ati, “Meroz chunga hâksêr roh, khana aka-om hei kha hâksêr hei roh, hâksêr hei roh. RŌNGPU inthōpuia anmani hongmak hei, remi rahōia ama sik re katuk hongmak hei.”

²⁴Revân kaṭhapen nuhmei kha Jael kae, Ken phunga Heber lômnu, pōn-inn shunga aka-om nuhmeihei kâra revân kaṭhapennu kae.

²⁵Sisera khan tui ader, tâk amanu’n sene apek; Kōklei kaṭhatak vânga kavur hlom ahei choi pek.

²⁶Akut inkhat a Pōn-inn uchup inkhat aloa, akut inkhat ting ṭōn katlohei hembung achoia, amanu’n Sisera kha alu ahem khōipek jo; amanu’n ama lu ahemtan jo.

²⁷Ama kha amarkhup a katlu jo; Amanu ke kunga ama kha amarkhup a inkuna kapûr jo, ralei ṭōnglaia katlua, kathi jo.

²⁸Sisera anu’n thlikot a’nphut alei enṭhak; Inn thlikot a inphut amanu’n khō aheithlir “Heisa mo ama shakor gâri kha ahei kasôt? Heisa mo ama shakor anhong inle kasôt hei?” tia ader hei.

²⁹Amanu nuhmei kasingpen aloi he’n anmasôn, amanu kha’n abibinga ave-avea inbek,

³⁰“Anmani’n neinâk chom sik leh insem sik rōk a anjong, remi inkhat in nuhmei inkhat a-emak leh 2 chenna sik, Sisera sik a pōn leh der katamtak, rengnu rînga jemna sik a ret kabek pōnpek atete hei.”

³¹Eh RŌNGPU, nang kadōi rakip kha khang’khan thi hei rasoh. tâk naṭhōn rakip hei khachu kani ahong kasōk kapōa heivâr hei rasoh! Khana khan kum 40 mōngna leikalenga kae.