Read Komrem ṬONGKATANHEI 6 Bible Online

ṬONGKATANHEI 6 - Komrem bible

ṬONGKATANHEI 6

¹Ave nôk a Israel he’n RŌNGPU kadōia setna antlo jo, khava jâra ama’n Israel chunga kum 7 Midian vai amanrôn hei.

²Midian he’n Israelhei kanek a ratha annei chet jo, Israel he’n hlungkhurhei leh tlâng heia le’nthup hei.

³Israel he’n hmuchi-bechi anling pha, Midi mi leh Amalek mi khana nêrdiram a phung he’n anchunga re anleitlo ri heia kae.

⁴Anmani hin ram shunga rephōr anmatunga Israelhei hmuchi-bechi hei kha thlang tinga Gaza katlunga amanhmang pek hei. Kemōng, se leh shakōrtung hei anlopek hei, khana Israelhei hringna sik a heite dapek mak hei.

⁵Anmani kha anran leh anpōn innhei leh inthōa kahong sik hei, tei torlo khaikhuhei kapōa. Anmani leh ansharîngsei hei kha teitor emak hei. Anmani kahong heia ram anchōn rachi jo,

⁶khana Israel chu anmani dōina atloje neimak a kae.

⁷Khava sōa Israel he’n Midianhei dōina Pathen inthōpuina sik leika-ông hei,

⁸ama’n Israelhei hneng sânkathem RŌNGPU, Israelhei Pathena inphut hiva ṭongkarôn mi inkhat ahei tir pek hei: “Egypt a sōk nanchangna inphut kaheiṭhōisōt chei.

⁹Egypt hei kut a inphut kahuksōt chei khana hiva ram a nangni ka-ôt hei kadōia ke’n re kaleituk pek chei. Nangni’n hma nanhei nam pha, ke’n anmani kahnong sōt heia anram kha nangni kapek chei.

¹⁰Ke’n nanhnenga kei RŌNGPU nan-Pathen eng kae khana tuna nan-omna ram Amorhei pathen nantakamuk mak sik kae tia kahri pek chei. Tâk-kha nangni’n kaṭong rangei mak chei.”

¹¹Khava sōa RŌNGPU ngeva kha Ophrah khōa kahong khana Abiezer phungṭhena Joas tamankek sasōkung thōia le’n ong. Asapa Gideon in vomhrui epna hmun a, Midi he’n anheihmu makna sik a marûk a gehu avōk a leika-om.

¹²RŌNGPU ngeva kha ama hneng inlâra ahri, “Inngamna kanei leh Ratha kahrat pase, RŌNGPU’n nang a’nṭhōipui che.”

¹³Gideon in ahnenga ati, “Apu, ṭong kader thei sik che mo, RŌNGPU’n a’nṭhōipui ung inchu heisa mo hihei rakip hi kanchunga akasōk? Kanpu sōn he’n anta leihri, RŌNGPU ṭōntlo inlak-hei kha khon mo aka-om jo, heikhonga mo Egypt a inphut aheiṭhōisōt hei? Kachanga tûnchu RŌNGPU’n adahlon jo ung khana Midianhei kut a apek sōt jo ung.”

¹⁴Khava sōa RŌNGPU’n ahnenga ṭong apek a ati, “Naratha neina rakip leh se roh Midianheia inphut Israel vahuk roh. Kei khet in katir che kae.”

¹⁵Gideon in amasôna ati, “Tâk RŌNGPU, heikhonga mo Israel kahuksōt tor sik? Kei phungṭhen chu Manasseh phung kae, kei innshunga akatlasam pen milai inkhat eng kae.”

¹⁶RŌNGPU’n amasôn, “Natlo tor sik ajârchu ke’n ka’nthōpui sik che. Midianhei kha mi inkhat rōk inrepui kapōa nasuk rabun sik kae.”

¹⁷Gideon in amasôn, “Nang in kachunga natlâi inchu, nang RŌNGPU nachangna manchênna ṭhahrep amanhmu roh.

¹⁸Khana nahnenga thlai inthoina kahei choi mak hma seng leise mak roh.” Ama’n ati, “Nang nahe’nle hma seng leika-om sik eng.”

¹⁹Khava jâra Gideon in a-inna kahlut a ke atere inkhat avathat a asōng jo khana che philo jâmdi kilograme 10 a buhlom asyema kae. Hme kha hraithuk inkhat a athōn khana tuibe inkhat vâng antui kha achoia sasōkung thōia RŌNGPU ngeva hnenga apek jo.

²⁰Ngeva khan ṭong apek a ati, “Hiva hlung chunga hme leh buhlom kha da roh, khahei chunga antui kha sun roh.” Gideon in khanga aleitlo jo.

²¹Khava sōa RŌNGPU ngeva khan akut a achoi khōnghre hmora khan hme leh buhlom kha atôn jo. Hlunga inphut hmei hong kasuk a hme leh buhlom kha kakâng invâm jo. Khava sōa ngeva kha inhmu mak jo.

²²Gideon in aleihmu kha RŌNGPU ngeva kae tia ahong manhret jo, ṭitpum a ati, “Chunghnung RŌNGPU! Ke’n nang ngeva kha hmai leh hmai intōa kahmu jo.”

²³Tâk RŌNGPU’n ahnenga ati, “Kamōnga om roh. Ṭitmak roh. Nang thimak tin che.”

²⁴Gideon in khava hmun a khan RŌNGPU sik a maichâm asyema, khavakha, “RŌNGPU chu Mōngna kae,” tia aphō jo. (Abiezer phungṭhen hei ram chen Ophrah a lakangir ṭhak.)

²⁵Khava jân a RŌNGPU’n Gideon hnenga ahri, “Napa sehratche leh alak kum 7 katluk jo, sehratche inkhat heikei hei roh, napa Baal kamukna maichâm kha sukset roh khana Baal hnenga Asherah limsyem kha’m tuktan roh.

²⁶Hiva bung philip chunga hin RŌNGPU na-Pathen sik a maichâm kaṭhatak a syem roh. Khava sōa 2 changna sehratche, inthoina inkhat a apum a ro-inthoina roh, natuktan jo Asherah hme ale’ntârna thingpek kha hmang hei inna.”

²⁷Khava jâra Gideon in asōk pase 10 akadeisōt heia, RŌNGPU’n ahnenga amanthei kapōa avatlo jo. Ama’n innshung mihei leh khōpui mihei aṭit hei jâra sûna tlo loa, jân a anleitlo.

²⁸Khava khōpui mihe’n jîngkâr anhong thōi pha, Baal maichâm Asherah limsyem târ kha ale’ntuktan anhmu jo, khana ale’nsyem maichâm chunga sehratche 2 tlukna ale’ntōk kha anhmu jo.

²⁹Anmani khat leh khat inder heia anti, “Hivahi tu tatlo mo?” Anjongsuia Joas sapa Gideon tatlo kae ti anmanhret jo.

³⁰Khava pha Joas hneng anti, “Nasapa heitirsōt roh, ama that sik kae! Ama’n Baal maichâm leh khava hnenga aka-om Asherah lim târna kha atuk kachamsō jo.”

³¹Joas in ama kadōi rakip hneng ati, “Baal sik a nangni akangir chei mo? Ama nantaksen mo? Ama sik a akangir rakip jîngkâr mak hma that sik hei kae. Baal kha Pathen achang inchu, abinga inhuk rasoh. Suk manset kha ama maichâm kae.”

³²Khana inphut Gideon hi Jerubbaal inti jo, hivahi Joas in, “Baal in abinga inhuk rasoh; a’nsukset jo kha ama maichâm kae,” aleiti jâra kae.

³³Hivasōa Midihei leh Amalek khana nêrdiram a phung rakip intûp heia Jordan tuidung anrakana Jezreel phaichama rekur antuk a kae.

³⁴RŌNGPU rathla’n Gideon kha athlop a ama’n pengkun atum, akahnung kajui sik a Abiezer phungṭhen hei abek hei.

³⁵Manasseh ramṭhen inhnia mihe’n ama anjuina sik, ankabek sik a ram pumpuia tlângva aleitir hei. Khana Asher, Zebulun, leh Naphtali phunghei hneng tlângva aleitir hei, anmani’m ama inthōpui sik a kahong hei.

³⁶Gideon in Pathen hneng ader, “RŌNGPU nang in Israelhei huksōtna sik a kei hi nahmang sik eng naleiti.

³⁷Kaṭha jo, gehu vōkna hmun a ke’n shahme ahlek kada. Jîngkâra khava chunga khan radai tuidi aleioma khana raleia chu a-om mak a achang inchu, kei hi Israelhei huksōtna sik a nahmang sik eng tia kamanhret sik jo.”

³⁸Khava kapōtak a leikasōk jo. Gideon in jîngkâr hmatak kathōia shahme chunga radai leika-om khana radai tuidi katluk a asômsōt a atui kha kōklei khat kasip.

³⁹Gideon in Pathen hneng ati, “Kei chunga nahnuk mannat mak roh; vōi khat nôk ṭonghri rong. Shahme vânga hin enmansinna vōi khat neinôk rong. Tûna hinchu shahme khan chârber sona ralei khan chor rasoh.”

⁴⁰Khava jân a Pathen in khahei seng kha atlo jo. Abân jîngkâra shahme kha kachârbera, ralei kha radai tuidi in aleimanchor jo.