Read Komrem ṬONGKATANHEI 7 Bible Online

ṬONGKATANHEI 7 - Komrem bible

ṬONGKATANHEI 7

¹Ni khat Gideon leh aloihei hmatak katho heia, Harod Tuiri pûtna hnenga rephōr ansyem. Midihei rephōr kha anmani rephōr sak tinga phaichama Moreh Hmebung hnenga ka-om.

²RŌNGPU’n Gideon hneng ati, “Midianhei torna sik a namihei katam rei hei. Anbinga re antator kae anti sik, kei tloman chu hrimak hei ning.

³Mipui hnenga phôngsōt roh, ‘Tu achang inum ṭit kase rakip in a-inna a’nle sik hei kae, khana alakseng in Gilead Tlânga aka-om sik me kae.’” Khava jâra mi 22,000 inna inle jo hei, khana 10,000 he’n khan ka-om jo hei.

⁴Khava sōa RŌNGPU’n Gideon hneng ati, “Tûn katlung nami lakatam hei. Tuidunga ṭhōi hei roh, khana khan anmani kaṭhensōt sik hei. Mi inkhat nang in inṭhōipui roh kati kha kase sik, khana inṭhōipui mak roh kati kha semak ning.”

⁵Gideon in mihei kha tuikhur panga aṭhōi jo hei. RŌNGPU’n ahnenga ati, “Ui in tui a-in kapōa amaleia amalek a tui ka-in seng, markhup kathlep a tui ka-in seng kha ṭhensōt hei roh.

⁶Ankut vânga tui anlōk leh aka-in mi 300 hrep hei kae; Alak chu tui inna sik a anmarkhup anthlep a kae.

⁷RŌNGPU’n Gideon hneng ati, “Tui kalōk a aka-in pase 300 hei vânga nang kahuk sik che khana Midihei chunga torna kapek sik che. Alakseng chu an-inn inlena sik hripek jo hei roh.”

⁸Khava jâra Gideon in Israelhei, pase 300, neinâk leh pengkun kachoihei tei loa, an-inn et a atir male jo hei. Midihei rephōr kha anmani thōitinga phaichama ansyema kae.

⁹Khava jântak a khan RŌNGPU’n Gideon hneng ṭong apek a, “Thōi roh, rephōr kha buhlu jo roh; ke’n retorna kha kapek jo che kae.

¹⁰Buhlu sik a naṭit inchu, rephōra son nasōkpa Pura leh inṭhōia se roh.

¹¹Anmani’n heimo antahri nanthei sik, khava sō leh buhluna sik a inngamna nanei sik.” Khava jâra Gideon leh Pura ankadōihei rephōr ahmora vakase jo hei.

¹²Midihei Amalek-hei, khana nêrdiram phunghei kha khaikhu rup kapōhrep a phaichama injeia ka-om jo hei. Khana tui-ôngpui panga nêrdi kapōa sharîngsei katamtak annei.

¹³Gideon in rephōr atlung pha, mi inkhat in aṭhōnpa hneng arahmang aleihri pek. Ama’n hinga ati, “Karahmanga gehu vânga insyem buhlom inkhat jōng inkhōnna nirephōr a pōn-inn inkhat asuk a raleia inphajen jo.”

¹⁴Aṭhōnpa khan amasôna ati, “Khavakha Israelhei chemjâm, Joas sapa Gideon kha kae, heite ralak changmak! Pathen in Midi leh eini remi pumpui chunga torna kha apek jo kae!”

¹⁵Gideon in hiva mipa rahmang kha heitina mo ti kha amanhret pha amarkhup athlep a RŌNGPU akamuk jo. Khava sō leh Israel rephōr ting ho’nle nôk a, mipuihei hneng ati, “Ṭhōi ruh! RŌNGPU’n Midi remihei chunga torna apek jo chei!”

¹⁶Ama’n ami 300 kha rup inthuma aṭhen a, mi inkha-khat kha ankut a pengkun inkha-khat leh, bephu inkha-khat khava shunga hmeiser inkhat et indet kha apek jo hei.

¹⁷Ama’n amanthei hei, “Rephōr hmor nantlung pha, ahei-en ruh, kei tatlo tlo kha nangni’m tlo ruh.

¹⁸Kei rup seng leh kei in pengkun kanheitum pha nangni’num rephōr kimvea tum et una ông ruh, ‘RŌNGPU leh Gideon sik a’ ti ruh!”

¹⁹Gideon leh ami 100 khan jân ṭhangṭim kahnung bongkhat sōa, repa kahngâk-hei inthlengsōtak a rephōr hneng kahong jo hei. Khana anpengkun et antum jo, ankut a antachoi bephu anvōkkhōi jo hei,

²⁰alak rup 2 hei kha’m khang’khan antlo jo. Anmani ankhenga ankut veiting hmeiser anchoia, anchang ting pengkun anlamatu, khana ka-ông jo hei. “RŌNGPU leh Gideon sik a chemjâm!” anti.

²¹Mi rakip rephōr kimvea anhmun et a kangir hei, ankadōi remi ankhenga ka-ông heia katlânsōt jo hei.

²²Gideon mihe’n anpengkun anheitum pha, RŌNGPU’n ankadōi rup-hei kha anmani leh anmani chemjâm vâng amantuk jo hei. Anmani Zarethan ting katlân hei, Beth Shitta katlunga, Tabbath hnenga Abel Mehola khōpui katlung.

²³Naphtali, Asher, khana Manasseh ṭhen hnia mihei anbeksōt heia Midihei kha anhnong jo hei.

²⁴Gideon in Ephraim tlângrama ka-om rakip hneng tlângva atira hinga amanti hei, “Hongṭum ina Midihei re vatuk ruh. Jordan Tuidung khana Bethbara katlunga kava dunghei matu ruh, Midi he’n tuidung antarakan sik kha tingna sik tlo ruh.” Ephraim mihei kha inbeksōt heia Jordan tuidung Bethbara katlunga kava dunghei anmatu jo hei.

²⁵Anmani’n Midi upahei, Oreb leh Zeeb rehringa ansur hei; khana Oreb kha Oreb Hlungpui inti chunga anthat jo, Zeeb kha Zeeb thei-epna hmun a anthat jo. Midihei kha anhnong manjôn heia, Oreb leh Zeeb hei lu kha Jordan nisōa aka-om Gideon hneng anheichoi pek.