Read Komrem ṬONGKATANHEI 8 Bible Online

ṬONGKATANHEI 8 - Komrem bible

ṬONGKATANHEI 8

¹Khava sōa Ephraim he’n Gideon hneng anti, “Nangni’n Midihei re nantlo hei pha keini heisa mo nantabek mak ung? Heisa mo hinga natatlo ung?” Anmani’n malung kana tak a ngorna anvanei.

²Tâk ama’n ati, “Kei tatlo tor hei hichu, nangnihei tatlosōt hei kha leh tepui thei changmak. Ephraim nangni’n ajingte nanta leitlo kha kei phungṭhen rakip in antatlo kanek a kaṭhachet.

³Hei-achanga, Pathen ratha jâra nangni’n Midihei upa Oreb leh Zeeb nanthat jo hei. Khavakha leh a’n-ang ke’n heimo katlo jo?” Ama’n hi ahri pha anmani anhnuk kana kha kadam jo.

⁴Hiva pha hin Gideon leh ami 300 hei kha Jordan Tuidunga heikatlung heia anrakan jo. Kachâm hêr jo hei tâk ankadōihei kha anlahnong ṭhak hei.

⁵Sukkoth anheitlung pha, khōpui mihei hneng ati, “Lungsettak a kamihei hi buhlom ajing pek hei ruh. Anmani kachâm hêr jo hei; Ke’n Midihei reng Zeba leh Zalmunna kalahnong hei kae.”

⁶Sukkoth hlamkakei he’n ahnenga anti, “Heisik a mo naremihei sâk kantapek sik hei? Zeba leh Zalmunna kha tûn kapha lasurtor mak hei chea,” anti.

⁷Khava jâra Gideon in ati, “Kaṭha jo! RŌNGPU’n Zeba leh Zalmunna hi kakut chunga apek ning eng khan chu nangni nêrdiram a rahling kanei sung vâng kajem sik chei kae!”

⁸Gideon kha Penuel khō ting kase nôk a khang tlit a khan ader nôk hei, khana Penuel he’num Sukkoth hei tamasôn kapō-pōa anmasôn nôk.

⁹Ama’n anhnenga ati, “Kei kahring leh kadam a hong inle sik eng, kahong inle pha, nan-inn inshâng hei hi kakei manphûr sik hei kae!”

¹⁰Khava pha khan Zeba leh Zalmunna kha Karkora anremihei leh leika-om hei. Nêrdiram a phunghei remi ankhenga 15,000 rōk leika-om jo hei; 120,000 remihei chu anleithatsō jo hei.

¹¹Gideon in nêrdiram ahmor dunga hlam ajuia, Noba leh Jogbela nisōa kasea manhret manloa avasō jo hei.

¹²Midi reng 2 hei, Zeba leh Zalmunna katlân jo hei, tâk ahnong heia rehringa asur jo hei, anremi rakip ṭit leh inpirna annei jo.

¹³Gideon kha rehmun a inphut Heres rakanna hlam ahei juia ahong inle pha,

¹⁴Sukkoth a rether naipang inkhat asura ṭong ader. Naipangpa khan khō karônhei rahming 77 amazet pek.

¹⁵Khan chu Gideon in Sukkoth mihei hneng kasea ati, “Kei inthōpui sik a aleikada chei kha nanmandonsōt mo? Nangni’n karemi akachâm hêr jo hei hneng sâk sik, in sik pek mak ning ajârchu Zeba leh Zalmunna lasurtor mak hei che nanleiti eng. Kaṭha jo, anmani hin ka-om jo hei!”

¹⁶Khava sōa ama’n nêrdiram a akakek rahling sung achoia Sukkoth khō upahei kha akarâkna jo hei.

¹⁷Khana ama’n Penuel inn inshâng kha’m asuk mathlûk a khōpui kalena mihei kha’m athat hei.

¹⁸Khava sōa Gideon in Zeba leh Zalmunna hneng ader hei, “Tabor a nanmithat hei chungchânga hri ruh?” Anmani’n anmasôn, “Anmani kha nangni leh inpō chei, inkhat et kha rengsa anpō.”

¹⁹Gideon in ahri, “Anmani kha kasōpuihei kae, kanu khet sahei kae. Kei kangamtak a inhâksêr eng khachu anmani nanleithat mak he’nchu ke’n nangni that mak chei ning.”

²⁰Khana asapa upapen Jether hneng ati, “Hma kei inna that hei roh!” Tâk naipang khan achemjâm radok mak jo. Ama inkei-chioa ka-om jo ajârchu ama naipang lakae a kae.

²¹Khava sōa Zeba leh Zalmunna’n anhria, “Hong roh, nangtak in athat ung roh. Pase inkhat ṭōn kha pase inkhat arangei kae.” Khang’khan Gideon in athat jo hei khana ansharîngsei hei rîng heia ret hei kha asōt a alo jo.

²²Khava sōa Israel he’n Gideon hneng anti, “Nang leh nasōnhei khang katlunga kanvai karôn achang pek roh, ajârchu nang in Midihei kut a inphut nahuksōt unga kae.”

²³Gideon in amasôn, “Kei nangni vaikarôn changmak ning, kasa he’m changmak hei ning. RŌNGPU kha nanvai karôn kachang sik.”

²⁴Ahri manjōma, “Ke’n nanhnenga ṭong inkhat der chei rong. Nangni inkhat et in nantachomsōt sana kōrton seng kha ahei pek ruh.” (Midihei kha, alak nêrdiram mihei kapōa sana kōrton antona kae.)

²⁵Mipui in anmasôn, “Nahnenga pek sik inpâk ung.” Pōn anpha a, anta leichom kōrton sanahei seng kha khava chunga anda jo hei.

²⁶Gideon in sana kōrton arahlâng kha kilograme 20 kahrik a kae, hivahin Midi renghei inretna neinâk, rînga maṭhi, khemachi pōnhei inteisa mak a kae khana ansharîngsei hei rînga retjem hei invei mak a kae.

²⁷Khava sanahei vâng khan Gideon in lim inkhat asyema akhōpui Ophrah intia anda jo. Israel mi rakip in Pathen andahlona khava hmun a kase heia limsyem kha anvakamuk jo. Khavakha Gideon leh a-innshung sik a chu chângkam inkhat jo kae.

²⁸Khava jâra Midihei kha Israel he’n antor heia avea ṭit sik leiom mak jo. Ram shunga kum 40, Gideon athimak hma seng kamōnga khō anleihlō.

²⁹Gideon a-innting inlea khan vaka-om.

³⁰Sapa 70 anei, ajârchu nuhmei katamtak amanboa kae.

³¹Sechem a anuhmei manbo ka-om; sapa inkhat amatet pek, arahming Abimelech aphō.

³²Joas sapa Gideon kater hêra kathi jo khana Abiezer phungṭhen hei khōpui Ophrah a, apa Joas thlânna anhre jo.

³³Gideon athisōa Israelhei, Pathen juiloa Baal ankamuk jo. Intepna Baal kha an-pathen anmanchang jo,

³⁴ankimvea an-inrepuihei senga inphut ankahuksōt RŌNGPU an-Pathen kha razen mak jo hei.

³⁵Israelhei sik a khangtuk hrep ṭōn kaṭha aleitlo jâra kha’num Gideon innshung chunga inpâkna leinei mak hei.