Read Komrem ṬONGKATANHEI 9 Bible Online

ṬONGKATANHEI 9 - Komrem bible

ṬONGKATANHEI 9

¹Gideon sapa Abimelech kha anu innkōhei omna Sechem a kasea

²Shechema ka-om hei hneng antader sik a amanthei hei, “Gideon sa 70 he’n nanchunga vai antarôn leh mi inkhat rōk in arôn sik chei kha khomo nanmadu? Abimelech inti hi nangni taksa leh thisen kae ti mahngi mak ruh.”

³Anu sōpuihei khan Shechema ka-om mihei hneng hiva ṭong hi ama kahlânga anhri jo, khana Shechema ka-om mihei khan Abimelech kahnung jui sik a anmandon ajârchu ama hi anmani innshung mi kae.

⁴Anmani’n Intepna Baal bek-inna inphut dangka 70 anpek a; khava sêr vâng khan mikase rup khat anek heia akahnung amanjui jo hei.

⁵Ama’n Ophrah a apa inna kasea, khana khan hlung inkhat rōk chunga Gideon sa, asōpui 70 hei kha ava thatpet jo hei. Tâk Gideon sapa mathlum pen Jotham chu inthupsōt a that mak jo.

⁶Khava pha Shechem leh Bethmillo mi seng intûp heia Shechema sasōkung inthenga kase heia Abimelech kha reng anmanchang jo.

⁷Jotham in ṭong hi athei pha, ama kasesōt a Gerizim Tlâng lera le’ntung khana anhnenga leika-ông, “Kei ṭong rangei ruh, Shechema mihei, Pathen in nangni arangei sik chei!

⁸Pha khat a thingkung he’n anreng kadeina sik a le’ntûp hei. Anmani’n olive thingkung hneng, ‘Kanreng achang pek roh’ anti.

⁹Olive thingkung khan amasôn hei, ‘Nangni chunga vairônna sik a, pathenhei leh mihringhei kajatak a antahmang kathai kasōk hi akahai sik jo eng mo kae.’

¹⁰Thingkunghei khan theipōng kunga anleider, ‘Nang hong ina kanreng achang pek roh.’

¹¹Tâk theipōng kung khan amasôn hei, ‘Nangni vairônna sik a akathlum ka-inra hei hi akahai sik jo eng mo kae.’

¹²Khava jâra thingkunghei khan vomhrui kung hneng andera, ‘Nang hong ina kanreng achang pek roh.’

¹³Tâk-kha vomhrui kung khan amasôn heia, ‘Nangnihei vairônna sik a pathenhei leh mihringhei inpâkna kaju kasōk hi akabâng sik eng mo kae.’

¹⁴Hivasōa thingkung seng in rahlingbuk hnenga anti, ‘Nang hong ina kanreng achang pek roh.’

¹⁵Rahlingbuk khan amasôn hei, ‘Nangni’n malung inthengtak a nanreng sik a nanimadu eng inchu, hong ruh kadai hlima va-om ruh. Kha nantlomak inchu karahling bâk heia inphut hmei hong kasûk sik a kha Lebanona cedar thing hei kakângsō sik hei.’ ”

¹⁶Jotham in ahri manjōm a, “Tûn Abimelech reng nantasyem hi malung inthengtak leh ahlam kasōk nanti mo? Gideon mandonna leh a-innshung chunga kaṭha nanta razen hei mo, aṭōn leitlona jâra rahōi kasōktak a nantlopek hei mo?

¹⁷Kapa’n nangni sik a re aleitlo kha mandon ruh. Ama’n Midianheia inphut nangni huksōtna sik a ahringkhō aphesōt kae.

¹⁸Tûnchu kapa innshung chunga nandōi jo. Asapahei nanthat jo hei, hlung inkhat rōk chunga, asōknu sapa Abimelech kha nan-innshung achang jâr rōk a, Shechema reng nanmanchang jo.

¹⁹Tûnchu nangni’n Gideon leh a-innshung chunga tuninga nantatlo hi malung intheng leh tlohlam kasōk kae nanti’nchu, Abimelech leh inpâkna chen ruh, ama’m nangni leh inpâkna chen rasoh.

²⁰Tâk-kha achangmak inchu, Abimelech a inphut hmei hongsûk sona Shechem leh Bethmillo mihei kânghlon hei rasoh. Khana Shechem leh Bethmillo miheia inphut hmei hongsûk sona Abimelech kha kânghlon rasoh.”

²¹Anaipa Abimelech kha aṭit jâra, Jotham kha katlânsōt a Beera om sik a kase jo.

²²Abimelech in Israel chunga kum 3 vai aleirôn.

²³Pathen in Abimelech leh Shechem mihei kâra khat leh khat inhōtna aman om pek heia, ama chunga inphinna annei jo.

²⁴Abimelech chunga leh ahnenga Gideon sapa 70 thatna sik a Shechem mihe’n mathokna anleipek jâra, anṭhena phuhlōna sik a hiva omchen hi akasōk kae.

²⁵Shechema mihe’n Abimelech kathat sik a tlâng lera mi anmanhlō, khana khava hlam kahro rakip neinâk anchom hei. Khavakha Abimelech anhri pek jo.

²⁶Ebed sapa Gaal khan a-u anaihei leh inṭhōia Sechem a kahong, khana Shechem mihe’n ama chunga taksenna anleinei.

²⁷Anmani vomhrui rahōnna kase heia thei anṭhōt a atui an-ep a revei anleihmang jo. An-pathen bek-inna kase heia ansâk an-ina Abimelech kha anhrimaset jo.

²⁸Gaal in ati, “Shechema ka-om eini hi heikhong mi me mo kae? Heisa mo Abimelech hi nirazen? Ama heimi mo kae? Ama Gideon sapa kae! Zebul in ama hnenga inphut ṭongpek alo, tâk heisa mo eini’n nirazen sik? Nangni sōn Hamor, nanphungṭhen kasyempa ṭong kha juijôk ruh!

²⁹Hiva mihei hlamkakei kachang inchu tia kamandon! Abimelech a inphut inṭhensōt sik eng! Ahnenga hinga kati sik, ‘Naremi syem ina hongsōk roh re intuk rih.’”

³⁰Gaal ṭonghri hi athei pha, khōpui kahngâk Zebul kha ahnuk kana jo.

³¹Khava jâra Aruma a ka-om Abimelech hneng mi atira avamanhri hei, “Ebed sapa Gaal leh asōpuihei Shechema kahong heia khōpuia hin nang manhlut makna sik atlo jo.

³²Tûnchu, nang leh namihei jâna a’nthon cheia hlei laia a’nthup sik chei kae.

³³Jîngkâra kani ahei sōk pha, thōi una khōpui kha sōkphutrōia buhlu hei ruh. Gaal leh ami he’n nang kadōia anhei sōksōt pha natorchena suk manhnak hei roh!”

³⁴Abimelech leh ami rakip jân a kase hei, arup manlia inṭhen heia Shechem vângting inthup a ka-om hei.

³⁵Gaal kha heikasōk a khōpui kot a angir kha Abimelech leh ami he’n anhmu pha an-inthupna inphut heikasōksōt jo hei.

³⁶Gaal in ahmu hei pha Zebul hneng ahri, “Enruh! Tlânga inphut mi jōng kaṭum hei!” Zebul in amasôn, “Sohei so mihring changmak hei, tlâng chunga thingkung rahle hei kae.”

³⁷Gaal in avea ahri nôk, “Tlâng lera mi heikaṭum hei, rup khat in ṭong kasânhei sasōkunga inphut hlamdung anheijui jo!”

³⁸Khava sōa Zebul in ahnenga ati, “Nang in ṭong er nahri kha khon mo ka-om jo. Hiva mipa Abimelech hi eini’n heisik a mo nirazen sik kati kha nang che kae. Nang in hnōisetak a narazen hei kha hihei hi kae. Tûnchu nang vâng sōk ina re intlopui jo hei roh.”

³⁹Gaal in Shechem mihei aṭhōisōt heia Abimelech re atlopui jo.

⁴⁰Gaal kaphu jo, Abimelech in ahnong jo. Khōpui kot a kapha, mi katamtak intôn jo hei.

⁴¹Abimelech Aruma a ka-om jo, Zebul in Gaal leh asōpuihei khana khan an-om thangmakna sik Shechema inphut ahnong sōt jo hei.

⁴²Ajînga kania Shechema mihei kha hleia akase sik a a’ntluk hei kha Abimelech in ahmu hei,

⁴³Ama’n amihei rup thuma asem heia, hlei laia ankahngâk sik a inthup hei. Khōpuia inphut mi ahei kasōk hei kha ahmu hei pha ankathat sik a a-inthupna inphut heikasōksōt a kae.

⁴⁴Abimelech leh asap he’n khōpui sōngkot kahrung sik a inranga antlânlai, rup 2 hei khan hleia ka-om mihei kha anbuhlu heia ankhenga anthat jo hei.

⁴⁵Re intuk kha ni khat katluk set a intlo hei. Abimelech in khōpui kha ahlō jo, khōpuia mihei kha athat hei, asukset jo, khana ralei kha chi akathek khuma kae.

⁴⁶Shechem hlamkakei kalen rakip in hiva ṭong hi anthei pha, kaṭi heia Intepna Baal bek-inna, ratha neinapen kur shunga inhukna anjonga ka-om jo hei.

⁴⁷Khana khan anmani ka-om hei ti kha Abimelech anleimanthei jo,

⁴⁸khava jâra Abimelech leh asap-hei Zalmon tlânga kake jo hei. Ama’n hreicha inkhat achoia, thing bâk atuktana adâr chunga akadom. Amihei khan ama tatlo kapō-pōa inranga antlo etna sik amanthei hei.

⁴⁹Mi rakip in thing bâk inkhat ṭim antuktan; khana Abimelech kahnung anjuia thing kha Shechem ratha neina rekur hnenga anbuk jo. Thing bâk-hei kha hmei anro mankhut a kur shunga ka-om mi rakip kathisō jo hei, nuhmei leh pase 1,000 kapō hei kae.

⁵⁰Hivasōa Abimelech in Tebez a kasea, khōpui kha akekhum jo, khana ahlō jo.

⁵¹Hivahin chung inn kahnettak inkhat ka-om, khōpuia nuhmei-pase, hlamkakeihei inveina ankhenga katlân inhlut hei. Anbinga kot inkam khum heia innphu chunga kaketou jo hei.

⁵²Abimelech in chung inn kha buhlu sik a ahong pha, chung inn kha hmei rona sik innkot hnenga heikava.

⁵³Tâk nuhmei inkhat in satakna chakri hlung ajōng mathlâk a Abimelech luchunga jōngkatla a alu kakōi jo.

⁵⁴Ama’n inrangtak a ama hmangchâk kachoi retherpa abek a ṭong apek, “Nachemjâm radok ina aheithat jo roh. Nuhmei inkhat in athat eng antati sik kha kei madu mak eng.” Khava jâra retherpa khan akadôt a ama kathi jo.

⁵⁵Israel mipui he’n Abimelech athi kha anhmu pha an-inn et a inle jo hei.

⁵⁶Hing’hin Pathen in Abimelech in asōpui 70 athat a apa dōina aleitlo kha phu ahlō jo.

⁵⁷Pathen in Shechema ka-om mihei kha’m anmalung ṭhatmakna jâra inrengna amanchen hei, anchunga Gideon sapa Jotham in ahâksêr hei pha, khanga kachang sik hei aleiti kapōa kachang jo hei.