Read Komrem JOHN INHNINA 1 Bible Online

JOHN INHNINA 1 - Komrem bible

JOHN INHNINA 1

¹Upa inkhat a inphut — Ke’n kadiktak a kamarit nuhmei leh asahei hneng, kaheimazet kae. Khana kei kabing rōk changmak eng, tâk akadik inhret rakip khan anlungset che,

²ajârchu akadik kha nishunga ka-om khana ahei tik a a-ompui ṭhak sik me.

³Pa Pathen leh Pa Sapa, Jesu Christa khan maritna, lungsetna leh lung mōngna apek me chang rasoh; khahei kha akadik leh lungset a nita hei chang rasoh.

⁴Pa ṭong pek me kapōa, nasa ṭhahrep hei akadik a an-om ke’n kahmu heia inpâk hrânghra eng.

⁵Khava jâra marit ka-om nuhmei: eini khat leh khat inlungset rih tia kahei ngek che kae. Hivahi ṭongpek therbing kaheimazet che changmak; a’nphutbia inphut eini’n nileineisa ṭongpek kha kae.

⁶Hiva lungset kahei hrinapen hichu Pathen ṭongpek nijuia akahring nger sik me tina kha kae. A’nphutbia nanta leitheisa ṭongpek khachu, nangni nankhenga inlungset a aka-om nger sik chei ti kha kae.

⁷Jesu Christa kha ralei mihring ajōng kachang kha akahnōm mak, mikahōn inthla katamtak vânhnōi raleichunga hong kasōk jo hei. Khava mihei kha Christa kadōi mikahōn inthla hei kha kae.

⁸Khava jâra eini ṭōn tloman kha, pui katluk a nanhmuna sik, nanṭōn tlona chunga insing thei ruh.

⁹Tu achang inum, Christa mantheina khan omloa, akakhe chet a akase mi khan Pathen neimak. Tu achang inum mantheina aka-om mi khan Apa leh Asa an-inhnia anei hei.

¹⁰Khava jâra tu achang inum, hiva mantheina ṭong karônmak mi nanhnenga ahong inchu, amanu amapa kha rahlâng mak ruh khana nan-inna kapha’m manhlut mak ruh; khana ahnenga, “Kamōnga om roh” ti kapha’m timak ruh.

¹¹Ajârchu tu achang inum anmani kamōnga an-om sik indu mi kha anṭhatmak tlona khan chen akaneipui hongkachang heia kae.

¹²Ke’n hripek sik che hingja kanei, kha’num muk leh chepheng vâng heimazet mak jo rong; khava nek a, ni’npâkna pui atlukna sik nanhnenga heiphâk sik chei leh taksakhet a nangni leh inbektō sik kha inhōr eng.

¹³Nasōpui maritnu sahe’n chibei anheipek chei.