Read Komrem ṬONGPHÔNG 11 Bible Online

ṬONGPHÔNG 11 - Komrem bible

ṬONGPHÔNG 11

¹Khava sōa ramtena khōnghre inkhat sungtlōn kapō kei anipek a, “Se ina Pathen Bek-inn leh maichâm kha vate roh, khan chu bek-inna kamukna kanei mihei kha tei hei roh.

²Tâk-kha bek-inn sumpuk vâng intong khachu dahlon roh, ajârchu khavahei kha Jât-hlop hei a’npek sōt jo kae, anmani’n khōpui intheng kha thla 42 antachōnpha sik kae.

³Khana khava kani 1,260 shunga Pathen ṭong thangkōi kahri inthangle sik, bora pōnse kasi sâkhi 2 ke’n kahei tir sik hei.”

⁴Khava sâkhi 2 hei khachu raleichunga Rōngpu hmaikunga akangir thaihmei kung 2 leh olive thingkung 2 hei kha kae.

⁵Tu achang inum mi inkhat in khahei kha sukset sik a arei he’nchu, anbeia inphut hmei heikasōk sik a kha ankadōi remihei kha ansuk manhmang sik hei; khang’khan, tu achang inum khava sukset sik a a’nrei mihei kha khanga anthat sik hei.

⁶Pathen ṭong kha anmani’n anhrilelai seng khō sûrmakna sik marvân kot khârtorna ratha anneia kae. Khan chu anmani’n tuihnâr kapût hei kha’m, thisen manchang torna ratha annei; khan chu anmani’n anmadu chen a natse vâng raleichung jât rakip mansetna sik ratha annei.

⁷Khana anmani’n anṭongsem kha anhrilesō pha, adongna kase dôpkhura inphut ahei kasōk ranhring kha leh re intuk sik jo hei. Ranhring khan anmani ator sik heia kha athat sik hei,

⁸khana anrōngpu anleimakhei hlonna khōpui kalen hlampuia khan, antaksa kalōng kha anmanje sik hei. Khava khōpui tekhingna rahming kha Sodom, a-emak leh Egypt kae.

⁹Khana anmani kalōng kha hre sik hnōmpek mak hei ning, khana ni 3 leh aher ankalōng kha jât rakip, phung rakip, ṭong rakip in anta-en sik kae.

¹⁰Hiva mi 2 hei thi jâra hin raleichung mi rakip inpâk sik hei. Inpâkna kutchoi khat leh khat inpektō sik hei, ajârchu khava sânkathem 2 hei khan raleichunga khōdeng theina katamtak anleimasōa kae.

¹¹Ni 3 leh aher sōa anshunga Pathena inphut hringna kaphuk jōng kahlut a, anmani 2 kangirsōt jo hei; khana ankahmu rakip kaṭihêr jo heia kae.

¹²Khava sōa anmani 2 he’n, “Hin hong ruh!” ti rasa marvâna inphut anthei, khang’khan ankadōi he’n an-enlai hei, sumtuk inkhat shunga marvânting kaketou jo hei.

¹³Khava laitak khan lingnu inhnaktak innok jo; khōpui kha sôma inkhat asuk manhmang jo, khana mihring 7,000 kathiheia kae. Alak mihei seng kha kaṭihêr jo hei khana marvân Pathen lenna kha anmanpâk joa kae.

¹⁴Inrengna 2 tlukna kha kathleng jo, tâk inrengna 3 tlukna kha inranga kajōng sik jo!

¹⁵Khava sōa ngeva 7 tlukna khan apengkun kha atuma, marvân chunga rasa inhnaktak kasōk a ajōng hri, “Vânhnōi raleichunga vairônna ratha kha tûnchu ni-Rōngpu leh ama Messiah ta kachang jo, ama’n are-rea vai arôn sik jo kae!”

¹⁶Khava sōa upa 24 Pathen hma anlen in-ongna inphut hong-inkun heia anhmai ṭlōng laia anmakhup a Pathen ankamuk jo,

¹⁷khana anti: “Akahratpen Rōngpu Pathen, aka-om leh aleika-omsa! Keini’n nang kanmanpâk che, ajârchu naratha hratna kha na’nloa nang in vai narôn manphut joa kae!

¹⁸Jât-hlop hei anhnuk kanasō jo, ajârchu nahnuk natna sik pha kha jōng katlung jo, akathihei ṭong tanna sik pha jōng katlung jo. Nang kaṭit mihei akasin akalen ankhenga, nasōk-hei, sânkathemhei, khana nami rakip tloman pekna sik pha kha jōng katlung jo. Raleichung kasukset hei kha suksetna sik pha jo kae!”

¹⁹Marvân chunga Pathen bek-inn kha inhlânga, Ṭongtep Bôm kha inhmua kae. Khava pha khō inri, khōjang jōng kapōk, khō inphe, lingnu innok, khana kahre inhnaktak katla a kae.