Read Komrem ṬONGPHÔNG 12 Bible Online

ṬONGPHÔNG 12 - Komrem bible

ṬONGPHÔNG 12

¹Khava sōa marvâna chîk sik kalentak inkhat jōng inlâra nuhmeinu inkhat in kani kha pōn kapōa a’nsia, ake thōia thla, khana alu chunga ârsi 12, lukhua a’nkhua ka-om.

²Amanu khan nai inrangtak a anei sik a, anaiha kaphua anat kadea inkōia ka-om.

³Marvân chunga a’n-ip neinâk ahlop inkhat inlâr. Akalentak Rihren kasen alu 7 araki 10 kanei khana aluhei chunga lukhu kanei inkhat leika-om.

⁴Ama khan arahmei vâng bōirōk a ârsi sem thuma sem khat raleichunga akei mathlâk a kae. Khana nuhmeinu nai jōng matet sik kha ajo’ntet lim leh made loina sik, nuhmeinu hmaikunga ama kangir ṭhak a ka-om.

⁵Khan chu nuhmeinu khan sapase inkhat, jât rakip chunga thir khōnghre vâng vai karôn sik, amatet joa kae. Tâk-kha naite kha ankasut a Pathen len in-ongna hnenga anṭhōia ka-om jo.

⁶Khana nuhmeinu kha nêrdiram thōia katlân jo, khava hmun a khan kani 1,260 Pathen in amanu kaṭha man omna sik aleimantluk pek a kae.

⁷Khava pha marvâna re kasōk jo. Michael leh ngeva he’n rihren leh angevahei re an-intukpui jo;

⁸tâk rihren kha antor joa ama leh angevahei kha marvâna an-om sik hnōmpek mak jo hei.

⁹Khana rihren kalentak kha anhei hlonsōt jo, ama kha hmalaia mari kha kae, arahming Diabol a-emak leh Seitan inti vânhnōi kahōn inthlapa kha kae. Ama leh angevahei seng raleichunga anjōnghlon mathlâk jo hei.

¹⁰Khava sōa marvân chunga rasa inhnaktak inkhat katheia hing’hin ahri, “Tûnchu Pathen huksōtna kha kajōng jo! Tûnchu Pathen in Reng changna aratha neina kha amalâr jo! Tûnchu ama Messiah khan aratha neina kha amalâr jo! Ajârchu asûn-ajâna nisōpuihei masetna kapek ṭhak, Pathen hmaikunga kangirpa kha marvâna inphut hlon mathlâk a ka-om jo.

¹¹Nisōpuihei talei phôngsōt kemōngte thisen leh dikna khan ama kha aleitor jo; khana anmani anhringkhō phesōtna leh thina sik katlunga le’ntluk hei.

¹²Khava jâra, marvânhei leh achunga ka-om rakip nangni inpâk ruh! Tâk-kha tuipui leh raleichung sik a chu heituk-hrep a ṭitpek ka-om sik! Ajârchu Diabol khan apha bongkhat rōkte anei jo hi amanhret jâra hnuk kana tak a nanlangting kajōng inhlut joa kae.”

¹³Rihren khan ama raleichunga jōnghlon mathlâk achang jo kha amanhret pha, sapa kaneinu kha ahnong joa kae.

¹⁴Khana nuhmeinu kha hmuvânlai mathla 2 inpek a khana inphut nêrdiram thōia kajōng jo. Khava ram thōia khan kum 3 leh thla 6, mari khan heite asukset makna sik a razen sik kae jo.

¹⁵Khava pha mari khan nuhmei kahnunga khan tuidung kapō tuikalen vâng mantlen hlonna sik abeia aheiphusōt jo.

¹⁶Tâk-kha ralei in nuhmeinu kha a’nthōpuia rihren beia tui ahei kasōk kha abei aleiman-ânga amade manhlut sō jo.

¹⁷Khava pha rihren kha nuhmeinu chunga khan ahnuk kana chet joa, Jesu ṭongdik malâr leh Pathen ṭongpek kajui taksenthei kachang, amanu sōnhei chunga re katlo sik a kasōk joa kae.

¹⁸Khana rihren kha tuipui panga kangir jo.