Read Komrem ṬONGPHÔNG 16 Bible Online

ṬONGPHÔNG 16 - Komrem bible

ṬONGPHÔNG 16

¹Khava sōa bek-inn shunga inphut rasa inhnaktak inkhat in ngeva 7 hei hneng ahei hri: “Vase inna Pathen hnuk natna thlengkam 7 kha raleichunga vabun mathla roh ati kathei!”

²Ngeva hma-inkei kha kasea athlengkam kha raleichunga abun mathlâk jo. Ranhring limsyem inmuk hei leh achîkna aja a’nzet kanei chunga ṭit ka-om leh nat inhnaktak akapōr hong inlâr jo.

³Khava sōa ngeva 2 tlukna khan athlengkam kha tuipui chunga abun mathlâk jo. Khana tui kha mi kathi thisen kapō hongkachang jo, khana tuipui chunga ka-om ranhring rakip kathi jo hei.

⁴Khava sōa ngeva 3 tlukna khan athlengkam kha tuidung leh tuihnar pûtna rakip chunga abun mathlâk jo, khana tuihei kha thisen kachangsō jo.

⁵Khava tui ka-ensui ngeva khan ajōng hri kha ke’n kathei, “Aleika-omsa, alaka-om, Eh A’ntheng Inkhat, naṭongtan kha kadik-hei!

⁶Anmani’n Pathen mihei leh sânkathemhei thisen anta leimasō achang jâra, thisen anta-in sik a napek hei. Anmani’n anrahōi kasōk hrep kha antarahlâng kae!”

⁷Khava sōa maichâma inphut rasa inkhat katheia hinga ahri, “Rōngpu Pathen Akahratpen! Naṭongtan hei kadik khana intlun heia kae!”

⁸Khava sōa ngeva 4 tlukna khan athlengkam kha kani chunga abun mathlâk jo, khana kani kalum khan mihring akânghlon sik kha hnōmpek jo kae.

⁹Khana mihei kha kani lum inhnak in akâng jo hei pha, hiva hrisehei chunga ratha kaneipa Pathen rahming kha anmani’n anhâksêr jo. Tâk-kha anmani’n Rōngpu lûrna leh lenna manpâkna sik a anmalung thleng dekmak hei.

¹⁰Khava sōa ngeva 5 tlukna khan athlengkam kha ranhring len in-ongna chunga abun mathlâk jo. Khava Ranhring rengram rakip chunga khō inthim jo, khana mihe’n annat ande hla a anmalei ansekhang jo,

¹¹khana anmani’n annatna leh anpûrna ande hla jâra marvân Pathen kha anhâksêr. Tâk-kha anmani’n an-omchen kaṭhamak a inphut inlemak hei.

¹²Khava sōa ngeva 6 tlukna khan athlengkam kha Euphrates tuidung kalena abun mathlâk jo. Nisōtinga inphut reng akahong hei hluttheina sik tuidung kha kachâr jo.

¹³Khava sōa rathla a’nthengmak 3 uṭok kapōa kaleihmu hei. Anmani rihren beia inphut, ranhring beia inphut, sânkathem inhlem beia inphut heikasōk hei.

¹⁴Anmani kha ṭōn-inlak katlosōt rathla kaṭhamak-hei kha kae. Hiva rathla 3 hei hi Akahratpen Pathen Kani lûnpui ning re katlo sik a vânhnōi raleia renghei kaṭhōi intûp sik a kasesōt jo hei.

¹⁵“Rangei ruh! Kei inru kapōa kajōng sik eng! Mipui kâra pōnsi derkei loa oma inzak ratō makna sik, kahlimtak a leh kasingthei tak a apōn ader aka-en kaṭha mi kha mikahōi kae!”

¹⁶Khava sōa Hebrew ṭonga Armageddon inti hmun a khan rathlahei kha’n renghei kha aheiṭhōi mantûp jo hei.

¹⁷Khava sōa ngeva 7 tlukna khan athlengkam kha bōirōk chunga abun mathlâk jo. Khava pha Bek-inn shunga len in-ongna inphut rasa inhnaktak inkhat in ahri, “Hi intlo jo!” ati.

¹⁸Khava pha khō inphe, khō inria, khōjang kapōk, lingnu inhnaktak a innok joa kae. Mihring insyembia inphut hiva kapō lingnu la’nnok phungmak, lingnu innok rakip kâra a’nhnakpen kha kae!

¹⁹Khana khōpui kalenpen kha sem thuma kakōi jo, khan chu ram rakip a khōpuihei kha insuset sō jo hei. Babylon akalen kha Pathen in amandonsōt khana ama hnuk natna kōkleia inphut ju kha aleiman-in.

²⁰Tuikekhum ram rakip inhmu mak jo, tlâng rakip om mak jo hei.

²¹Mihring chunga kilograme 50 kakhea akahrik kahre bōirōk a inphut jōngkatla. Khana khava kahre tasuk manrimna kha a’nhnakrei jâra mihe’n Pathen anhâksêra kae.